ၽူႈပွင်ၵၢၼ်သိုၵ်း KNU/KNLA PC ၸၼ်မၢၵ်ႇပွမ်း ၶႃႈတူဝ်ၸဝ်ႈၵဝ်ႇ

မိူဝ်ႈဝႃးဝၼ်းထီႉ 11 April 2023 (လိူၼ်ႁႃႈလွင်ႈ 7 ၶမ်ႈ ပီႊတႆး 2117 ၼီႈ) ၼၼ်ႉ ၽူႈၶၢၼ်ပၢၵ်ႇ KNU/KNLA PC ၸဝ်ႈသိုၵ်းလူင် ၸေႃးၵျေႃႇၺုၼ်ႉ ယိုၼ်ယၼ် လၢတ်ႈတီႈသိုဝ်ႇၶၢဝ်ႇဝႃႈ ၸွမ်ႁၢၼ် ၸေႃးဢႄႇၶူႇ ၽူႈပွင်ၵၢၼ်သိုၵ်း KNU/KNLA PC ၸၼ်မၢၵ်ႇပွမ်း 2 လုၵ်ႈသေ ၶႃႈတူဝ်ၸဝ်ႈၵဝ်ႇၶိုၼ်း တီႈႁိူၼ်းမၼ်းၸဝ်ႈ ဢၼ်မီးဝႆႉတီႈ ဝၢၼ်ႈထလေႃႉ၊ ၸႄႈဝဵင်းမျႃႉဝတီႇ ငဝ်ႈၸိုင်ႈ KNU/KNLA PC မိူဝ်ႈယၢမ်းၵၢင်ၼႂ်မွၵ်ႈ 09:00 မူင်းၼၼ်ႉ ဝႃႈၼႆ။

ၸဝ်ႈသိုၵ်းလူင် ၸေႃးၵျေႃႇၺုၼ်ႉ ၽူႈၶၢၼ်ပၢၵ်ႇ KNU/KNLA PC လၢတ်ႈတီႈသိုဝ်ႇၶၢဝ်ႇ Delta News Agency ဝႃႈ “ၵဵဝ်ႇလူၺ်ႈလွင်ႈပၢႆးတူဝ်တႄႉ မၼ်းၸဝ်ႈပဵၼ်ၵူၼ်းပီး သမ်ႉမီးတၢင်းပဵၼ်ၵိုၵ်းတူဝ်ဝႆႉ ယၢမ်းမိူဝ်ႈမီးပၢင်ၵုမ် ၸိူဝ်းၼႆႉၵေႃႈ မၼ်းၸဝ်ႈဢမ်ႇသူႈမႃးၶိုၼ်ႈႁွတ်ႈ၊ တွၼ်ႈပၢႆးၸႂ်မၼ်းၸဝ်ႈတႄႉ ယွၼ်ႉမီးလွင်ႈမိပ်ႇဢီး ၵဵဝ်ႇလူၺ်ႈလွင်ႈပၢင်တိုၵ်း ဢၼ်ပဵၼ်ဝႆႉယူႇမိူဝ်ႈလဵဝ် သွင်ၸုမ်းဢၼ်ယိုဝ်းၵၼ် သမ်ႉမီးလွင်ႈထၢင်ႇၽိတ်းထၢင်ႇပိူင်ႈၼိူဝ်မၼ်းၸဝ်ႈ  ၼႃႈတီႈမၼ်းၸဝ်ႈၵုမ်းၵမ်သမ်ႉ တူၵ်းယူႇၼႂ်းၵႄႈ ပၢင်တိုၵ်းၼၼ်ႉလႄႈ ပူၼ်ႉမႃးလၢႆဝၼ်းၼႆႉ ငိၼ်းမၼ်းၸဝ်ႈလၢတ်ႈဝႃႈ တေႁဵတ်းၸိူင်ႉႁိုဝ်ၼႆယူႇ” ဝႃႈယဝ်ႉ။

ပူၼ်ႉမႃးမိူဝ်ႈဝၼ်းထီႉ 7 April 2023 ၼၼ်ႉၵေႃႈ ၸွမ်ႁၢၼ် ၸေႃးဢႄႇၶူႇ ထွၼ်သၢႆမၢႆ ၽူႈမီးၸၼ်ႉ ဢၼ်ၶဝ်ႈႁူမ်ႈပၢင်တိုၵ်းတီႈ ဝဵင်းသူၺ်ႇၵူၵ်ႉၵူဝ်ႇ ၸဝ်ႈသိုၵ်းလူင် ၸေႃးလႅတ်ႉၵၢႆႇ (ၽၢႆႇၽႅၼ်ၵၢၼ်ပၢႆးတိုၵ်း- ဗျူဟာမှူး) လႄႈတင်း ၽူႈၵွၼ်းတပ်ႉၵွင် 708 ၶုၼ်သိုၵ်း ၸေႃးၵျေႃႇၵရွင်း ဢွၵ်ႇၼႂ်းမုၵ်ႉၸုမ်းပႅတ်ႈ ၼႆယဝ်ႉ။

ပၢင်တိုၵ်းဢၼ်ပဵၼ်ယူႇၼႂ်းၼႃႈတီႈၵုမ်းၵမ် တပ်ႉၸုမ်း 7 KNU ၼႆႉ ယူႇတီႈၸုမ်းလုၵ်ႉၽိုၼ်ႉၼင်ႇၵၼ်ၵေႃႈ ၵၢဝ်ႇၼႄးဝႃႈ ၸွမ်ႁၢၼ် ၸေႃးဢႄႇၶူႇ ႁူမ်ႈႁွမ်းၶွင်ႇသီႇသိုၵ်းမၢၼ်ႈၼႆသေ ယူႇတီႈၶွင်ႇသီႇသိုၵ်းမၢၼ်ႈ တင်း BGF ၵေႃႈ သမ်ႉဢဝ်ႁႅင်းသိုၵ်းသေ မိပ်ႇဢီႈလွၵ်ႇငိူတ်ႈဝႆႉဝႃႈ ယႃႇႁႂ်ႈႁူမ်ႈႁွမ်းၸုမ်းလုၵ်ႉၽိုၼ်ႉၶဝ် ဝႃႈၼႆ။

ယွၼ်ႉမီးတၢင်းပဵၼ် ယဵဝ်ႈဝၢၼ်၊ လိူတ်ႈသုင်၊ လူမ်းႁူဝ်ၸႂ် ၸိူဝ်းၼႆႉသေဢမ်ႇၵႃး ထႅင်ႈၽၢႆႇၼိုင်ႈၵေႃႈ ယွၼ်ႉမီးလွင်ႈလွၵ်ႇငိူတ်ႈတဵၵ်းဢီး လွင်ႈၵၢၼ်သိုၵ်းၵၢၼ်သိူဝ် ၵေႃႈပိူင်ၼိုင်ႈလႄႈ ၸွမ်ႁၢၼ် ၸေႃးဢႄႇၶူႇ ၸင်ႇလႆႈၶႃႈတူဝ်ၸဝ်ႈၵဝ်ႇၵႂႃႇၸိူင်ႉၼၼ်ၼႆယဝ်ႉ။

ၸႃႇပၼ ၸွမ်ႁၢၼ် ၸေႃးဢႄႇၶူႇၼႆႉ တေၸတ်းႁဵတ်းၵႂႃႇမိူဝ်ႈၼႆႉ ဝၼ်းထီႉ 12 April 2023 တီႈငဝ်ႈၸိုင်ႈ KNU/KNLA PC ၸွမ်းၼင်ႇၾိင်ႈထုင်းမီးၼၼ်ႉၼႆယဝ်ႉ။

တႆးလွတ်ႈလႅဝ်း