ၽူႈမီးၼမ်ႉၸႂ် ၸွႆႈထႅမ်ၶူဝ်းၶွင်ၸႂ်ႉတိုဝ်းလႄႈ ၶွင်ၵိၼ်ယႅမ်ႉတီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA

ယိူင်းဢၢၼ်းႁႂ်ႈလႆႈပဵၼ်ႁႅင်းၸႂ် ၵေႃႉသိုၵ်း ၵေႃႉႁၢၼ်ၶဝ်ၼႆသေ ၽူႈမီးၼမ်ႉၸႂ် ၸွႆႈထႅမ် ၶူဝ်းၶွင်ၸႂ်ႉတိုဝ်းလႄႈ ၶွင်ၵိၼ်ယႅမ်ႉ တီႈၵေႃႉသိုၵ်း တပ်ႉသိုၵ်းၸိုင်ႈတႆး (RCSS/SSA) ဝႃႈၼႆ။

မိူဝ်ႈဝၼ်းထီႉ 5 July 2022 (လိူၼ်ပႅတ်ႈမႂ်ႇ 8 ၶမ်ႈ ပီႊတႆး 2116 ၼီႈ) ၽူႈမီးၼမ်ႉၸႂ် ၼၢင်းသႂ်ၸႂ်လႅင်း ဝဵင်းလႃႈသဵဝ်ႈ ၸွႆႈထႅမ် ၽႃႈယၢင် 24 ၵဵၼ် တူၵ်းမႅၼ်ႈသၢင်ႉငိုၼ်းထႆး 8,585 ဝၢတ်ႇ ဢိၵ်ႇတင်း ပီႈၼွင်ႉႁႅင်း ၵၢၼ်ယၢၼ်မိူင်းၵေႃႈ ၸွႆႈထႅမ် ၽႃႈယၢင် 6 ၵဵၼ် တူၵ်းမႅၼ်ႈသၢင်ႉငိုၼ်းထႆး 2,040 ဝၢတ်ႇ သေဢမ်ႇၵႃး ပီႈၼွင်ႈႁႅင်းၵၢၼ်ယၢၼ်မိူင်းၵူၺ်းၼင်ႇၵဝ်ႇ ၸွႆႈထႅမ် ၶွင်ၵိၼ်ယႅမ်ႉ မိူၼ်ၼင်ႇ− ၼိူဝ်ႉၵႆႇ 400 ၵီးလူဝ်း၊ ၽၵ်းယိူဝ်ႈၼၢင်းၶဵဝ်လႄႈ ၽႃႈၽႅၼ်ႇထႅင်ႈ လၢႆလၢႆလွင်ႈ တႃႇလူတ်ႉၵႃး 2 လမ်းသေ ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး (RCSS/SSA) ဢၼ်မီးတီႈငဝ်ႈၸိုင်ႈလွႆတႆးလႅင်း ဝႃႈၼႆ။

မိူၼ်ၼင်ႇၼၼ် ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ၸုမ်းၵူၼ်းၼုမ်ႇ ဝဵင်းပၢင်လူင် လႆႈၸွႆႈထႅမ်ၶွင်ၵိၼ်ယႅမ်ႉလႄႈ ၶူဝ်းၶွင်ၸႂ်ႉတိုဝ်းတီႈ ၵေႃႉသိုၵ်း တပ်ႉသိုၵ်းၸိုင်ႈတႆး မိူၼ်ၼင်ႇ− 1. မၢၵ်ႇၶိူဝ်သူမ်ႈ၊ 2. ဢႃႇလူး၊ 3. တႅင်၊ 4. ၶႆႇၵႆႇ၊ 5. သွၵ်းတိၼ်၊ 6. ၽႃႈယၢင် ႁူမ်ႈတင်းမူတ်း တူၵ်းမႅၼ်ႈသၢင်ႉငိုၼ်းမၢၼ်ႈ 983,000 ပျႃး (ၵဝ်ႈသႅၼ်ပႅတ်ႇမိုၼ်ႇသၢမ်ႁဵင်ပျႃးတဵမ်တဵမ်) ဝႃႈၼႆ။

မိူဝ်ႈဝၼ်းထီႉ 4 July 2022 ၼၼ်ႉ ၸုမ်းႁၵ်ႉၸိူဝ်ႉၸၢတ်ႈ(မိူဝ်းမၢဝ်း) ၸွႆႈထႅမ် ယႃႈယႃ တီႈၵေႃႉသိုၵ်း တပ်ႉသိုၵ်းၸိုင်ႈတႆး မိူၼ်ၼင်ႇ− Paracetamol 5 ၵွင်ႇ၊ Mixagrip 11 ၵွင်ႇ တူၵ်းမႅၼ်သၢင်ႉငိုၼ်းမၢၼ်ႈ 270,500 ပျႃး (သွင်သႅၼ်ၸဵတ်းမိုၼ်ႇႁႃႈပၢၵ်ႇပျႃးတဵမ်တဵမ်)သေဢမ်ႇၵႃး ယင်းမီးပႃး ၽူႈမီးၼမ်ႉၸႂ် ဝဵင်းမူႇၸေႊ ဢၼ်ဢမ်ႇၶႂ်ႈဢွၵ်ႇၸိုဝ်ႈသဵင် လႆႈဢဝ် ႁူဝ်ထူဝ်ႇထႅဝ်ႈမွင် တႃႇ 196 ဢႅပ်ႇ တူၵ်းမႅၼ်ႈသၢင်ႉငိုၼ်းမၢၼ်ႈ 230,000 ပျႃး (သွင်သႅၼ်သၢမ်မိုၼ်ႇပျႃးတဵမ်တဵမ်) ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး (RCSS/SSA) မိူၼ်ၵၼ် ဝႃႈၼႆ။

ၼႂ်းဝၼ်းလဵဝ်ၵၼ်ၼႆႉၵူၺ်းၼင်ႇၵဝ်ႇ ၸုမ်းၽွမ်ႉႁူမ်ႈမိူင်းမၢဝ်း လႆႈဢဝ်ငိုၼ်းၶႄႇ 1,050 ယွၼ်ႇ ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး (RCSS/SSA) ဢိၵ်ႇတင်း ၽၢၵ်ႇၶေႃႈၵႂၢမ်း ပၼ်ႁႅင်းၸႂ် လႄႈ ယွၼ်းသူးပၼ် ႁႂ်ႈၵေႃႉသိုၵ်း ၵေႃႉႁၢၼ် ႁႂ်ႈယူႇလီၵိၼ်ဝၢၼ် လွတ်ႈၽေး ၶဵၼ်ၵူႈၵေႃႉၵူႈၸဝ်ႈလႄႈ ဢွင်ႇပေႉၽူႈၶဵၼ်သေၵမ်း ဝႃႈၼႆ။

ယူႇတီႈၽူႈမီးပုၼ်ႈၽွၼ်း RCSS ၵေႃႈ လႆႈတၢင်တူဝ်ၵေႃႉသိုၵ်း ၵေႃႉႁၢၼ်ၶဝ်တင်းသဵင်ႈသေ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ႁဝ်းၶဝ် ၵူႈၵေႃႉၵူႈၸဝ်ႈ တေႉတေႉဝႃႈဝႃႈ ယူႇယဝ်ႉ။

တႆးလွတ်ႈလႅဝ်း