မိူဝ်ႈဝၼ်းထီႉ 10 July 2022 (လိူၼ်ပႅတ်ႇမႂ်ႇ 13 ၶမ်ႈ ပီႊတႆး 2116 ၼီႈ) ယူႇတီႈ ယိင်းဢွၼ်ႇ လႆႈတၢင်တူဝ်ၸုမ်းတႆးၽွမ်ႉၵၼ်သေ ဢဝ်တူဝ်ငိုၼ်း 10 သႅၼ်ပျႃး ၵႂႃႇလူႇတၢၼ်းဝႆႉတီႈ ၸဝ်ႈသြႃႇ ပိူဝ်ႈတႃႇႁဵတ်းသိမ်ႇမႂ်ႇ ဝႃႈၼႆ။

မိူဝ်ႈဝၼ်းထီႉ 11 July 2022 ၼႆႉ ယူႇတီႈၸၢႆးၶိူဝ်းႁၢၼ်ၵေႃႈ လႆႈတၢင်တူဝ် ၸုမ်းတႆးၽွမ်ႉၵၼ်သေ ၸွႆႈလူႇတၢၼ်းတီႈ ၸဝ်ႈၶူးၺႃႇၼသီရီႉ (ၸဝ်ႈမၢၼ်ႇတႃဢွၼ်ႇ)  တႃႇသၢင်ႉငိုၼ်း 15 သႅၼ်ပျႃး တွၼ်ႈတႃႇၸဝ်ႈပေႃႈသိလ်ထမ်းၶူးဝႃး ဝုၼ်းၸုမ်ႉ တေဢွၵ်ႇထမ်ႈ တီႈမိူင်းၵႅတ်ႇ ၼႂ်းဝၼ်းထီႉ 1 August 2022 ဢၼ်တေမႃးထိုင်ၼႆႉ ဝႃႈၼႆ။

ၼႂ်းဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ ၸုမ်းတႆးၽွမ်ႉၵၼ် လႆႈၸွႆႈထႅမ်ငိုၼ်းတွင်းတီႈ ၵူၼ်းထူပ်းၽေး သၽႃႇဝ ၼမ်ႉၼွင်းလူၵ်ႈ ဢၼ်လႆႈလူႉသဵင်ႈၵႂႃႇ လႄႈ ၸိူဝ်းလႆႈတၢင်းမၢတ်ႇၸဵပ်းၼၼ်ႉ တႃႇသၢင်ႉငိုၼ်းမၢၼ်ႈ 1,000,000 ပျႃး (သိပ်းသႅၼ်ပျႃးတဵမ်တဵမ်၊ တူၵ်းမႅၼ်ႈငိုၼ်းထႆး 16,000 ဝၢတ်ႇ) ဝႃႈၼႆ။

သင်ဝႃႈ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ႁဝ်း မီးလွင်ႈၶႂ်ႈၸွႆႈထႅမ် ငိုၼ်းတွင်း ပီႈၼွင်ႉပၢႆႈၽေးလႄႈသင်၊ ၵေႃႉသိုၵ်း တပ်ႉသိုၵ်းၸိုင်ႈတႆး ဢၼ်တူင်ႉ ၼိုင်ဝႆႉ ၼႂ်းၼႃႈသိုၵ်းလႄႈသင်၊ ၶႂ်ႈႁူမ်ႈႁွမ်းလူႇတၢၼ်းငိုၼ်း ၼႂ်းၼႃႈၵၢၼ် သႃႇသၼႃႇ ဢိၵ်ႇတင်း ၶႂ်ႈၸွႆႈထႅမ်ပၢႆးပၺ်ႇၺႃႇ လႄႈ ပၢႆးယူႇလီ ပေႃးၼႆၸိုင် ၵပ်းသိုပ်ႇလႆႈတီႈ ၸုမ်းတႆးၽွမ်ႉၵၼ် ၸၢႆးၶိူဝ်းႁၢၼ် မၢႆၾူၼ်းမၢၼ်ႈ 09 960 217 636၊ ယိင်းဢွၼ်ႇ မၢႆၾူၼ်းမၢၼ်ႈ 09 787 441 018၊ မွၵ်ႇၵွၼ် မၢႆၾူၼ်းၶႄႇ 158 875 349 49 လႆႈယူႇၶႃႈဢေႃႈ။

ၼႂ်းဝၼ်းထီႉ 11 July 2022 ၼႆႉၵူၺ်းၼင်ႇၵဝ်ႇ ၽူႈမီးၼမ်ႉ လၢႆလၢႆၵေႃႉ ႁူမ်ႈၵၼ်သေ ၸွႆႈထႅမ် သွၵ်းတိၼ်ၶဵဝ် 136 ၵူႈ တူၵ်းမႅၼ်ႈသၢင်ႉငိုၼ်း 515 တေႃႇလႃႇ ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး (RCSS) သေ ၽူႈမီးၼမ်ႉၸႂ် ၸိူဝ်းႁူမ်ႈႁွမ်းၵၼ် ၸွႆႈထႅမ်ၼၼ်ႉ မိူၼ်ၼင်ႇ− 1. ၸၢႆးႁၵ်ႉတႆး LA (USA) 200 တေႃႇလႃႇ၊ 2. ၼၢင်းသႅင်တၢၼ်း တူၼ်ႈတီး (USA) 200 တေႃႇလႃႇ၊ 3. ၸၢႆးဝၼ်းလႅင်း ၵဵင်းလူမ်း (USA) 105 တေႃႇလႃႇ၊ 4. ၸၢႆးၵူႇ (USA)  50 တေႃႇလႃႇ၊ 5. ပီႈၼွင်ႉ ယၢင်းၽိူၵ်ႇ (USA) 20 တေႃႇလႃႇ၊ 6. ပီႈၼွင်ႉ ယၢင်းလႅင် (USA) 20 တေႃႇလႃႇ၊ 7. ၸၢႆးၸၢမ်ႇမိူင်း သိုၵ်းၵဝ်ႇ SSPP (USA)  20 တေႃႇလႃႇ ဢိၵ်ႇတင်း ၸၢႆးၼူၵ်ႉ၊ ၼၢင်းလိူၼ် ၸွႆႈထႅမ်သွၵ်းတိၼ်ၶဵဝ် 5 ၵူႈ သေဢမ်ႇၵႃး ႁူင်းၵၢၼ် လုင်းသႂ် ဝဵင်းလမ်းလုၵ်ႉၵႃ ပထုမ်းထႃးၼီး (ၸိုင်ႈထႆး) ၸွႆႈထႅမ်သိူဝ်ႈ 101 ၽိုၼ် ဝႃႈၼႆ။

မိူဝ်ႈဝၼ်းထီႉ 12 July 2022 ယူႇတီႈၵေႃၵမ်ၵၢၼ်ၸွႆႈထႅမ် ပူၵ်းပွင် ၵူၼ်းထူပ်းၽေး ၼမ်ႉၼွင်းလူၵ်ႈ လႆႈႁပ်ႉတၢင်းၸွႆႈထႅမ် တီႈၸဝ်ႈၼႃႈတီႈႁူင်းယႃ ပၢင်ႇမၢၵ်ႇၽႃႈ ‌လႄႈ ပီႈၼွင်ႉၼႂ်းမိူင်းထႆး ၸိူဝ်းယူႇသၢင်ႈၵိၼ်သဝ်းတီႈပွၵ်ႉ မွၵ်ႇၶမ်း ဢိူင်ႇပၢင်ႇမၢၵ်ႇၽႃႈ၊ မႄႈႁွင်ႈသွၼ် လႆႈမႃးၵမ်ႉၸွႆႈထႅမ် ၶဝ်ႈၼမ်ႉတၢင်းၵိၼ် ၵူၼ်းထူပ်းၽေး သၽႃႇဝ ၼမ်ႉၼွင်းလူၵ်ႈ တီႈငဝ်ႈၸိုင်ႈ လွႆတႆးလႅင်း တႃႇလူတ်ႉၵႃး 2 လမ်းသေ ၽူႈမီးၼမ်ႉၸႂ် ဢၼ်လႆႈၸွႆႈထႅမ်ၼႆႉ ပဵၼ်  ‌မႄႈလဵင်ႉၵၼ်းတႃး၊ လုင်းလႅင်းသီ ပႃႈယိင်း မႄႈႁွင်ႈသွၼ် လၢၼ်ႉၶိတ်ႉၸလိူၼ်း‌ မႄႈႁွင်ႈသွၼ် ဝႃႈၼႆ။ ၶွင်ၵိၼ်ယႅမ်ႉ ဢၼ်ၽူႈမီးၼမ်ႉၸႂ် လႆႈမႃးၸွႆႈထႅမ် ၵူၼ်းထူပ်းၽေးသၽႃႇဝ ၼမ်ႉၼွင်းလူၵ်ႈ ၼၼ်ႉ မိူၼ်ၼင်ႇ− ၶဝ်ႈသၢၼ်၊ ၼမ်ႉမၼ်းၵိၼ်၊ ၶဝ်ႈသွႆးမမ၊ ၼမ်ႉၼူမ်းထူင်ႇယႂ်ႇ၊ ၵိူဝ်၊ ၽၵ်းမီႇလႅင်း၊ ၼမ်ႉၸိုၼ်ႈသႂ် (ၼမ်ႉမူတ်းသႂ်) ဢိၵ်ႇတင်း ၶွင်ၵိၼ်ယႅမ်ႉ ထႅင်ႈလၢႆလၢႆလွင်ႈ ဝႃႈၼႆ။

သင်ဝႃႈ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ႁဝ်းၶဝ်  ၶႂ်ႈႁွမ်းလူႇတၢၼ်း ၸွႆႈထႅမ်ၵူၼ်းထူပ်းၽေးသၽႃႇဝ ၼမ်ႉၼွင်းလူၵ်ႈ တီႈငဝ်ႈၸိုင်ႈ လွႆတႆးလႅင်း ပေႃးၼႆၸိုင် ၵပ်းသိုပ်ႇၸွႆႈထႅမ်လႆႈတီႈ ၵေႃၵမ်ၵၢၼ်ၸွႆႈထႅမ်ပူၵ်းပွင် ၵူၼ်းထူပ်းၽေးၼမ်ႉလူၵ်ႈ ၸွမ်းၼင်ႇၶွင်ႇသီႇဢဝ်ၶိုၼ်းၸိုင်ႈတႆး (RCSS) ၶွတ်ႇၽွတ်ႈၶိုၼ်ႈမႃးပဵၼ်တၢင်းၵၢၼ်ၼၼ်ႉ ၸၢႆးဢူး မၢႆၾူၼ်းထႆး  092 442 0040  ၊ ၸၢႆးလၢဝ်သႂ် မၢႆၾူၼ်းထႆး 061 057 5117 လႄႈ ၸၢႆးၶမ်းလိူၼ် မၢႆၾူၼ်းထႆး 061 465 6040 ၼႆႉလႆႈယူႇဢေႃႈ။

သင်ဝႃႈပီႈၼွင်ႉႁဝ်းၶဝ် ယူႇဝႆႉၼႂ်းမိူင်းတႆးသေ ၶႂ်ႈႁွမ်းလူႇတၢၼ်း ၸွႆႈထႅမ်ၵူၼ်းထူပ်း ၽေးသၽႃႇဝ ၼမ်ႉၼွင်းလူၵ်ႈ တီႈငဝ်ႈၸိုင်ႈ လွႆတႆးလႅင်း ပေႃးၼႆၸိုင် ၵပ်းသိုပ်ႇၸွႆႈထႅမ်လႆႈတီႈ  ၸဝ်ႈႁၢၼ် ၼၢင်းၸၢမ်ၽွင်း ၽူႈၵွၼ်းလုမ်းၵပ်းသၢၼ် လူင်ပွင်ၸိုင်ႈ ဝဵင်းတူၼ်ႈတီႈ မၢႆ Kpay 09 899 698 879 Nang San Phaung လႆႈယူႇဢေႃႈ။

ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၵေႃႈ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ် ႁဝ်းၶဝ် ၵူႈၵေႃႉၵူႈၸဝ်ႈ ဢၼ်လႆႈၸွႆႈထႅမ် ၵေႃႉသိုၵ်း တပ်ႉသိုၵ်းၸိုင်ႈတႆး လႄႈ ၵူၼ်းထူပ်းၽေး သၽႃႇဝ ၼမ်ႉၼွင်းလူၵ်ႈ တေႉတေႉဝႃႈဝႃႈယူႇ ၼႆယဝ်ႉ။

တႆးလွတ်ႈလႅဝ်း