ၽူႈၸၢႆးရၢတ်ႉသျႃး သိုပ်ႇပၢႆႈၶဝ်ႈ Georgia လူၺ်ႈဢမ်ႇသူၼ်ၸႂ်မၢႆမီႈမႂ်ႇ

ဝၢႆးသေရၢတ်ႉသျႃး မူၼ်ႉမႄးၵႄႈၶႆမၢႆမီႈမႂ်ႇယဝ်ႉၼၼ်ႉ ၽူႈၸၢႆးၼႂ်းမိူင်းရၢတ်ႉသျႃး တိုၵ်ႉသိုပ်ႇပၢႆႈ လူၺ်ႈယွၼ်ႉဢမ်ႇၶႂ်ႈႁၢပ်ႇထၢမ်းၵၢၼ်သိုၵ်း ‌တႃႇၶဝ်ႈတိုၵ်း ယူႇၶရဵၼ်းသေ ပၢႆႈ‌ၶဝ်ႈမိူင်းႁိမ်းႁွမ်း မိူၼ်ၼင်ႇ Georgia ဢမ်ႇထၢတ်ႇဢမ်ႇဝၢႆး ဝႃႈၼႆ။

သိုဝ်ႇၶၢဝ်ႇၼွၵ်ႈမိူင်းဢွၵ်ႇဝႆႉဝႃႈ မိူင်း Georgia ပဵၼ်ထႅင်ႈမိူင်းၼိုင်ႈ ဢၼ်ၵူၼ်းမိူင်းရၢတ်ႉသျႃး ပၢႆႈၶဝ်ႈသွၼ်ႈသဝ်းၼမ် ၼႂ်းၶၢဝ်းတၢင်း 24 ၸူဝ်ႈမူင်းၵူၺ်း မီးၵႃးၼမ်ထိုင် 3,000 လမ်း ၸႅၼ်ႇထႅဝ်ပႂ်ႉတီႈလၢၼ်ႇၶၢမ်ႈမိူင်း၊ တႄႇၸဵမ်မိူဝ်ႈ ရၢတ်ႉသျႃးၶဝ်ႈတိုၵ်းယူႇၶရဵၼ်းမႃးၼႆႉ မီးၵူၼ်းမိူင်းရၢတ်ႉသျႃး ၶၢမ်ႈလၢၼ်ႇလႅၼ်လိၼ် ၶဝ်ႈၵႂႃႇၼႂ်းဝဵင်းလူင်ထပီႇလီႇသီႇ (Tbilisi) မိူင်း Georgia ယဝ်ႉ ဢမ်ႇယွမ်း 40,000 ၵေႃႉ ဝႃႈၼႆ။

ၵူၼ်းမိူင်းရၢတ်ႉသျႃး ဢၼ်ပၢႆႈၶဝ်ႈၵႂႃႇသွၼ်ႈသဝ်း တီႈဝဵင်းလူင်ထပီႇလီႇသီႇ (Tbilisi) လၢတ်ႈတီႈ သိုဝ်ႇၶၢဝ်ႇ Reuters ဝႃႈ မိူဝ်ႈလႆႈယိၼ်းၶၢဝ်ႇ မီးလွင်ႈၵဵပ်းႁွမ်သိုၵ်းမႂ်ႇၼၼ်ႉ မၼ်းၸၢႆးၽႃႈဝၢင်းၵၢၼ်ဝႆႉၵူႈလွင်ႈလွင်ႈသေ ႁွင်ႉဢဝ်လုၵ်ႈလၢင်းၼၢင်း‌မေးမၼ်းၸၢႆး ၶိုၼ်ႈလူတ်ႉ ၶၢမ်ႈလၢၼ်ႇလႅၼ်လိၼ် ပၢႆႈၶဝ်ႈၼႂ်းမိူင်း Georgia ၊ ဝၢႆးသေၶၢမ်ႈပူၼ်ႉလႅၼ်လိၼ်ယဝ်ႉ ၸိူဝ်းၶဝ်ၸၢင်ႈၵူၼ်းၼႂ်းပိုၼ်ႉတီႈ ၼႄသဵၼ်ႈတၢင်းတေႃႇထိုင် ဝဵင်းလူင်ထပီႇလီႇသီႇ ဝႃႈၼႆ။

တႄႇၸဵမ်မိူဝ်ႈဝၼ်းထီႉ 21 September 2022 ပူၼ်ႉမႃးၼႆႉ ၵူၼ်းမိူင်းရၢတ်ႉသျႃး ပၢႆႈၵႂႃႇၼွၵ်ႈမိူင်း မိူၼ်ၼင်ႇ Georgia ၊ Kazakhstan ၊ Finland ၊   Mongolia ၸဵမ်ၸိူဝ်းၼႆႉ ဢမ်ႇထၢတ်ႇဢမ်ႇဝၢႆး လႄႈၸွမ်းလႅၼ်လိၼ်ၶၢမ်ႈမိူင်းၼၼ်ႉၵေႃႈ မီးလူတ်ႉၸႅၼ်ႇၶပ်ႉၵၼ်ယၢဝ်းၵူႈတီႈသေတႃႉ ၸဝ်ႈၼႃႈတီႈၽၢႆႇၵဵဝ်ႇၶွင်ႈၵေႃႈ ပၼ်ၶႂၢင်ႉၸိူဝ်းၶဝ်ဢွၵ်ႇၼွၵ်ႈမိူင်းယူႇ ဝႃႈၼႆ။

ၽၢႆႇတၢင်းၵၢင်ႁၢဝ်ၵေႃႈ သၢႆၵၢၼ်မိၼ် ဢၼ်လုၵ်ႉတီႈဝဵင်းလူင်မွတ်ႉသၵူဝ်ႇ ၵႂႃႇၼွၵ်ႈမိူင်းၼၼ်ႉ မီးၵူၼ်းဢွၵ်ႇၼွၵ်ႈမိူင်းတဵမ်ၵူႈလမ်း လႄႈ ၵူႈဝၼ်း ၼႆယဝ်ႉ။

တႆးလွတ်ႈလႅဝ်း