ၽွၼ်းလီ လႄႈ ၽွၼ်းၸႃႉ ၽၵ်းမီႇႁေႃ

ၼႂ်းဝၼ်းမိူဝ်ႈၼႆႉ ႁဝ်းဢွၼ်ၵၼ်မႃးတူၺ်း ၽွၼ်းလီ လႄႈ ၽွၼ်းၸႃႉ ၽၵ်းမီႇႁေႃ ဢၼ်ၶၢတ်ႇဢမ်ႇလႆႈ ၼႂ်းၵၢၼ်ႁဵတ်းၵိၼ်ၶဝ်ႈၵိၼ်ၽၵ်းၼၼ်ႉယဝ်ႉ။

ၽၵ်းမီႇႁေႃၼႆႉ မီးၸိုဝ်ႈၽၢႆႇတၢင်းပၢႆးသၢႆႈဝႃႈ Allium Sativum ၼႆသေ ပဵၼ်ဢီႈယႃသၽႃႇဝ မဵဝ်းၼိုင်ႈ။ ၵမ်ႈပႃႈၼမ် တေၸႂ်ႉတိုဝ်းၼႂ်းလွင်ႈႁုင်ၽၵ်း ၼွၵ်ႈလိူဝ်သေမၼ်းၸွႆႈလူတ်းယွမ်းဢၢႆၶႅဝ်းလႆႈယဝ်ႉ မၼ်းယင်းၽိူမ်ႉထႅမ်ပၼ် ဢရသႃႇၽၵ်း ႁႂ်ႈၶိုၵ်ႉၶႅမ်ႉၶိုၼ်ႈမႃးထႅင်ႈလႄႈ မီးၽွၼ်းလီတင်းၼမ်တင်းလၢႆ ယူႇယဝ်ႉ။ ဢၼ်လွင်ႈယႂ်ႇသမ်ႉ ပဵၼ်ဢီႈယႃ ဢၼ်သူင်ႇၽွၼ်းလီပၼ်တူဝ်ၶိင်း ၵူၼ်းႁဝ်းၼၼ်ႉယဝ်ႉ။

ၽွၼ်းလီၽၵ်းမီႇႁေႃ 8 ၶေႃႈ

1. ယူတ်းယႃလွင်ႈပဵၼ်ဝတ်းပဵၼ်ဢၢၼ်

ၼႂ်းၽၵ်းမီႇႁေႃၼၼ်ႉ မီးထၢတ်ႈ Antioxidants ဢၼ်ၸွႆႈသၢင်ႈပၼ်လွင်ႈႁႄႉၵင်ႈ ၼႂ်းတူဝ်ၶိင်းသေ သင်ၸိူဝ်ႉပဵၼ်ဝတ်းပဵၼ်ဢၢၼ်ၼႆၵေႃႈ ႁႂ်ႈသွႆးၽၵ်းမီႇႁေႃ ၸေႈၼမ်ႉမႆႈ ဢမ်ႇၼၼ်ၵေႃႈ တူမ်ႈသေ ၵိၼ်ၼႆၸိုင် တေၸွႆႈႁဵတ်းႁႂ်ႈဝတ်းႁၢႆလႆႈဝႆး ၼၼ်ႉယဝ်ႉ။

2. လူတ်းယွမ်းၶႆမၼ်းၼႂ်းလိူတ်ႈ

လွင်ႈၵႆႉၵိၼ်ပၼ်ၽၵ်းမီႇႁေႃၼႆႉ မၼ်းတေၸွႆႈလူတ်းယွမ်း Cholesterol လႄႈ ၶႆမၼ်းၼႂ်းလိူတ်ႈသေ မီးၽွၼ်းလီၸွႆႈလူတ်းယွမ်းၶၵ်ႉၵၢၼ်ႁၢႆႉႁႅင်း လွင်ႈၵိူတ်ႇပဵၼ် တၢင်းပဵၼ်ႁူဝ်ၸႂ်ၼၼ်ႉ ၼႆယဝ်ႉ။

3. လူတ်းယွမ်းလွင်ႈၵိူတ်ႇပဵၼ် တၢင်းပဵၼ်ၵႅၼ်ႇသႃႇ

ၽၢႆႇၵၢၼ်ၶူၼ်ႉၶႂႃႉၶဝ် ပိုတ်ႇလၢတ်ႈဝႃႈ ၽၵ်းမီႇႁေႃ တေၸၢင်ႈမီးၽွၼ်းလီ တႃႇတေႃႇ သူႈတၢင်းပဵၼ်ၵႅၼ်ႇသႃႇ ယွၼ်ႉပိူဝ်ႈၼႂ်းၽၵ်းမီႇႁေႃၼၼ်ႉ ဢွၵ်ႇထၢတ်ႈလူတ်းယွမ်း ၶၵ်ႉၵၢၼ်လွင်ႈၵိူတ်ႇပဵၼ်ၼိူဝ်ႉငွၵ်ႈ ၼၼ်ႉယဝ်ႉ။

4. ၵႄႈတၢင်းပဵၼ်ၽိဝ်ၼင် ၸဵပ်းယဵၼ်း

သင်ၸိူဝ်ႉဝႃႈ ၽိဝ်ၼိူဝ်ႉၼင်ၸဵပ်းယဵၼ်း လူၺ်ႈၽၢင်ႁၢင်ႈဢမ်ႇမႅၼ်ႈၸွမ်းသေၸိူဝ်ႉ သေပိူင်လႄႈ ဢွၵ်ႇတုမ်ႇလႅင် ဢမ်ႇၼၼ် ၶူမ်းၶူမ်းၵၢႆးၵၢႆး ၸိုင် ႁႂ်ႈဢဝ်ၼမ်ႉမၼ်းၽၵ်းမီႇႁေႃ တႃးပၼ်ၸွမ်းႁိမ်းႁွမ်းမၼ်းၼႆ တေၸွႆႈလူတ်းယွမ်း လွင်ႈၸဵပ်းယဵၼ်း လႄႈ ၸွႆႈၵႄႈပၼ်လွင်ႈၶူမ်းလႆႈ ၼႆယူႇ။

5. ၸွႆႈၵႄႈလွင်ႈၶူၼ်ႁူဝ်ႁူင်ႈ

ထၢတ်ႈ Allicin လႄႈ Sulfur ဢၼ်မီးၼႂ်းၽၵ်းမီႇႁေႃၼၼ်ႉ ၸွႆႈလူတ်းယွမ်းလွင်ႈ ၶူၼ်ႁူဝ်ႁူင်ႈလႆႈ။ သွႆးၽၵ်းမီႇႁေႃမၢင်မၢင်သေ လေႃးၵၼ်တင်း ၼမ်ႉမၼ်းမၢၵ်ႇၵွၵ်ႇ ဢမ်ႇၼၼ် ၼမ်ႉမၼ်းမၢၵ်ႇဢုၼ်ယဝ်ႉ ဢဝ်မႃးတႃးၶူၼ်ႁူဝ် ၼူတ်ႈၸွမ်းၼင်ႁူဝ် မဝ်မဝ်ၸိုင် မၼ်းတေၸွႆႈလူတ်းယွမ်းလွင်ႈၶူၼ်ႁူဝ်ႁူင်ႈၼၼ်ႉယဝ်ႉ။

6. လူတ်းယွမ်းလွင်ႈၸဵပ်းၸွမ်းလုပ်ႇတေႃႇ

ၽၵ်းမီႇႁေႃၼႆႉ မီးၽွၼ်းလီ ၸွႆႈႁဵတ်းႁႂ်ႈလိူတ်ႈလႅၼ်ႈလႆလႆႈလီၶိုၼ်ႈ ၵွပ်ႈၼၼ် မၼ်းၸင်ႇတေၸၢင်ႈၸွႆႈလူတ်းယွမ်းလွင်ႈၸဵပ်းၸွမ်းလုပ်ႇတေႃႇၶေႃႈတေႃႇၼႂ်းတူဝ်ၶိင်း ႁႂ်ႈယူႇသႃႇလူမ်ၸႂ် ၼၼ်ႉယဝ်ႉ။

7. ႁႄႉၵင်ႈလွင်ႈမႅင်းၶူပ်းမႅင်းၸီႈ

ၵူၼ်းမိူဝ်ႈၵွၼ်ႇၶဝ် ၸႂ်ႉၽၵ်းမီႇႁေႃ ပဵၼ်ယႃႁႄႉၵင်ႈယုင်း သေဢမ်ႇၵႃး မိူဝ်ႈတေ ၵႂႃႇၼႂ်းထိူၼ်ႇၼၼ်ႉ တွၼ်ႈတႃႇတေႁႄႉၵင်ႈ ယႃႇႁႂ်ႈမူင်ႈမႅင်းၶူပ်းၸီႈၼၼ်ႉၵေႃႈ ဢဝ်ၽၵ်းမီႇႁေႃသွႆး လေႃးၵၼ်တင်းၶီႈၽိုင်ႈသေ တႃးၸွမ်းတိၼ်ၸွမ်းမိုဝ်း ယွၼ်ႉဢၢႆၽၵ်းမီႇႁေႃလႄႈ မူင်ႈမႅင်းတေဢမ်ႇၶူပ်းဢမ်ႇၸီႈ ၼႆယဝ်ႉ။

8. ယူတ်းယႃသိဝ်

ၼွၵ်ႈလိူဝ်သေ ၽၵ်းမီႇႁေႃ မီးထၢတ်ႈၸွႆႈႁႄႉၵင်ႈလႆႈတၢင်းပဵၼ်ယဝ်ႉၼၼ်ႉ မၼ်းယင်းၶႃႈၸိူဝ်ႉမႅင်း  ပႅတ်ႉတီးရီးယႃး Bacteria လႆႈထႅင်ႈလူးၵွၼ်ႇ၊ လွၵ်းလၢႆး ယူတ်းယႃသိဝ်ၸမ်း သွႆးၽၵ်းမီႇႁေႃယဝ်ႉ ဢဝ်တၢင်ႇဝႆႉတီႈဢၼ်မီးသိဝ်ၼႆ မၼ်းတေၸွႆႈ လူတ်းယွမ်းပၼ်လႆႈ ၼၼ်ႉယဝ်ႉ။

ၽွၼ်းႁၢႆႉၸႃႉ ၽၵ်းမီႇႁေႃ သင်ၵိၼ်ၼမ်ပူၼ်ႉတီႈ

လွင်ႈဢၼ်ဝႃႈ ၽၵ်းမီႇႁေႃ မီးၽွၼ်းလီတင်းၼမ်တင်းလၢႆၼႆၼၼ်ႉၵေႃႈ လႆႈဝႃႈ ထုၵ်ႇမႅၼ်ႈယူႇ ၵူၺ်းၵႃႈ ဢီႈသင်ၵေႃႈယဝ်ႉ ပေႃးၵိၼ်ၼမ်လူၼ်ႉပူၼ်ႉတီႈၵေႃႈ မၼ်းတေၸၢင်ႈမီး ၽွၼ်းတုမ်ႉယွၼ်ႈ ၽွၼ်းႁၢႆႉၸႃႉ တေႃႇတူဝ်ၶိင်းၵူၼ်းႁဝ်းလႆႈ ၼၼ်ႉယဝ်ႉ။ တေႃႈၼင်ႇၼၼ် ၽၵ်းမီႇႁေႃၼႆႉ မၼ်းမီးထၢတ်ႈဢၼ်ႁဵတ်းႁႂ်ႈ လိူတ်ႈလႅဝ်ႈလႆလီသေ ပေႃးမီးႁွႆးၸဵပ်းမႃးၼႆ တေႁဵတ်းႁႂ်ႈလိူတ်ႈဢွၵ်ႇဢမ်ႇၵိုတ်း ၼၼ်ႉယဝ်ႉ။

ပႅၵ်ႉသမ်ႉဝႃႈ ၽၵ်းမီႇႁေႃ မီးၽွၼ်းလီၼမ် ဝႃႈၼႆသေတႃႉၵေႃႈ ပေႃးၵိၼ်ၼမ် ပူၼ်ႉတီႈၸိုင် တေၸၢင်ႈပဵၼ်ၽွၼ်းႁၢႆႉၸႃႉလႆႈမိူၼ်ၵၼ်၊ တွၼ်ႈတႃႇၽူႈၸိူဝ်းမီး တၢင်းပဵၼ်ၵိုၵ်းတူဝ် လႄႈ ဢၼ်လႆႈၵိၼ်ဢီႈယႃယူႇတႃႇသေႇၼၼ်ႉ ထုၵ်ႇလီလႆႈ ဢုပ်ႇဢူဝ်းၵၼ်တင်းမေႃယႃ တွၼ်ႈတႃႇလွင်ႈလွတ်ႈၽေးၼၼ်ႉယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.thairath.co.th/lifestyle/health-and-beauty/2011805