ၾႆးမႆႈႁိူၼ်း လႄႈ သွင်ၵေႃႉပေႃႈလုၵ်ႈလႆႈလူႉသဵင်ႈတၢႆ

မိူဝ်ႈၼႂ်း ဝၼ်းထီႉ 17 October 2024 (လိူၼ်သိပ်းဢဵတ်းမူၼ်း ပီႊတႆး 2118 ၼီႈ) ယၢမ်း 13:00  ၾႆးသႅင်လႅတ်ႇသျွတ်ႉသေ မႆႈႁိူၼ်း ၸၢႆးပျႃး+ၼၢင်းဢေႃႉ ဝၢၼ်ႈပၢင်ႇလႅမ်း ဢိူင်ႇၼမ်ႉထမ်ႈမူဝ် ၸႄႈဝဵင်းလွႆလႅမ် လႄႈ ၵေႃႉပဵၼ် ၸၢႆးပျႃး ဢႃႇယု 37 ပီႊ လႄႈတင်း လုၵ်ႈၸၢႆး ဢႃႇယု 1 ပီႊပၢႆၶိုင်ႈ လႆႈလူႉသဵင်ႈတၢႆၵႂႃႇ ၼႆယဝ်ႉ ။

ၵူၼ်းၼႂ်းပိုၼ်ႉတီႈ လၢတ်ႈၼႄဝႃႈ မိူဝ်ႈၽွင်းၾႆးပႆႇသျွတ်ႉၼၼ်ႉ လုၵ်ႈဢွၼ်ႇၶႆႈၼွၼ်းလႄႈ ပေႃႈမၼ်း ၸင်ႇဢဝ်ၵႂႃႇၼွၼ်းဝႆႉၼႂ်းႁိူၼ်းသေ မႄႈမၼ်းသမ်ႉလွႆးၶူဝ်းဝႆႉ တၢင်းလင်ႁိူၼ်း ၽိူဝ်ႇႁၼ်ၾႆးမႆႈၵေႃႈဢမ်ႇတၼ်းဢဝ်လႆႈသင်ယဝ်ႉ၊ ၵေႃႉပဵၼ်ၸၢႆးပျႃး ပေႃႈလုၵ်ႈဢွၼ်ႇၼၼ်ႉၵေႃႈ မိူဝ်ႈမၼ်းလုၵ်ႉတီႈၵျွင်းမုၼ်ၸဝ်ႈ ပွၵ်ႈမိူဝ်းႁိူၼ်းယူႇၼၼ်ႉ လႆႈႁၼ်ၾႆးမႆႈႁိူၼ်း လႄႈ ဢၢင်ႈၶဝ်ႈၵႂႃႇဢဝ်လုၵ်ႈမၼ်း ဢၼ်ၼွၼ်းဝႆႉၼႂ်းႁိူၼ်းၼႆသေ ၾႆးလႆႈႁုပ်ႇပႃးၵႂႃႇ လၢတ်ႈၼႄၼင်ႇၼႆ။

ၵူၼ်းၼႂ်းဝၢၼ်ႈၶဝ်ၵေႃႈ လႆႈၸွႆႈဢဝ်သူင်ႇယူတ်းယႃ တီႈႁူင်းယႃတူၼ်ႈတီးသေ မိူဝ်ႈထိုင်ႁူဝ်ပူင်း ဢမ်ႇတၼ်းထိုင်ႁူင်းယႃၼၼ်ႉ လႆႈလူႉသဵင်ႈၵႂႃႇလႄႈ ထိုင်မႃး မိူဝ်ႈၼႆႉ ဝၼ်းထီႉ 18 October 2024 ၼႆၵေႃႈ ႁဵတ်းပၢင်မႃႇသႃႇပူၼ်ႉၶၢပ်ႈတူဝ်ၵႂႃႇ တီႈဝဵင်းတူၼ်ႈတီး ၼႆယူႇယဝ်ႉ။

တႆးလွတ်ႈလႅဝ်း