ႁွင်ႈၵၢၼ်လူင်ပၢႆးပၺ်ႇၺႃႇ RCSS ၸတ်းပၢင်လူင်းၵၢၼ်သွၼ် ႁူင်းႁဵၼ်းပူၵ်းပွင်ၼမ်ႉၵတ်ႉၶူး ၸုပ်ႈ 1 တီႈငဝ်ႈၸိုင်ႈလွႆတႆးလႅင်း

ၼင်ႇႁိုဝ်ပေႃးတေပဵၼ်ၵၢၼ်ၽိူမ်ႉထႅမ် ၼမ်ႉၵတ်ႉၶူးသွၼ်မေႃသွၼ်ၶဝ် လႄႈ ၽူႈႁၢပ်ႇၵၢၼ်ၶဝ်ၼႆၼၼ်ႉ ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး (RCSS) ၸင်ႇလႆႈၸတ်းပၼ် ၵၢၼ်သွၼ် ႁူင်းႁဵၼ်းပူၵ်းပွင်ၼမ်ႉၵတ်ႉၶူး ၸုပ်ႈ 1 တီႈငဝ်ႈၸိုင်ႈလွႆတႆးလႅင်း တႄႇဢဝ်ဝၼ်းထီႉ 11 December 2023 တေႃႇထိုင်ဝၼ်းထီႉ 11 June 2024 ၶၢဝ်းတၢင်း 6 လိူၼ်ပၢႆၼၼ်ႉ ပဵၼ်ဢၼ်ယဝ်ႉတူဝ်ႈလီငၢမ်းလႄႈ ၸင်ႇလႆႈၸတ်းႁဵတ်းပၢင်လူင်းၵၢၼ်သွၼ် ၼႆယဝ်ႉ။

မိူဝ်ႈဝၼ်းထီႉ 16 June 2024 (လိူၼ်ၸဵတ်းမႂ်ႇ 10 ၶမ်ႈ ပီႊတႆး 2118 ၼီႈ) ၶူးသွၼ် ႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ဢွၼ်ႁူဝ်ၸတ်းႁဵတ်း ပၢင်လူင်းၵၢၼ်သွၼ် ႁူင်းႁဵၼ်းပူၵ်းပွင်ၼမ်ႉၵတ်ႉၶူး ၸုပ်ႈ 1 တီႈငဝ်ႈၸိုင်ႈလွႆတႆးလႅင်းသေ မီးၽူႈယႂ်ႇၵူၼ်းလူင် ၼႂ်းမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၶိုၼ်ႈႁွတ်ႈပၼ်ႁႅင်းတင်းၼမ် ၼႆယဝ်ႉ။

ၼႂ်းပၢင်လူင်းၵၢၼ်သွၼ်ၼၼ်ႉ ၸွမ်ႁၢၼ် ၶိူဝ်းငိုၼ်း ၵႅမ်ႁူဝ်ပဝ်ႈ 2 / ၽူႈပွင်ၵၢၼ်သိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး လႆႈမွၵ်ႇလၢတ်ႈၶေႃႈၵႂၢမ်း ပၼ်ႁႅင်းၸႂ်လုၵ်ႈႁဵၼ်းၶဝ်ၵႂႃႇဝႃႈ “ၶေႃႈယိူင်းဢၢၼ်းဢၼ်တႄႇတင်ႈမႃးႁူင်းႁဵၼ်းၸိူဝ်ႉၸၢတ်ႈ ဢၼ်ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆးႁဝ်းၶႃႈ ဢွၼ်တႄႇတင်ႈမႃးၼၼ်ႉ မီးယိူင်းဢၢၼ်း 5 ၶေႃႈ မုၵ်ႉၸုမ်းမီးၶေႃႈယိူင်းဢၢၼ်းယဝ်ႉ ၼင်ႇႁိုဝ် လုၵ်ႈႁဵၼ်းႁဝ်းၶႃႈတေမေႃႁၵ်ႉၸိူဝ်ႉၸၢတ်ႈၼၼ်ႉ လုၵ်ႈႁဵၼ်းႁဝ်းလူဝ်ႇႁူႉပိုၼ်းႁဝ်းၵွၼ်ႇ ၶဝ်ၸင်ႇတေမေႃႁၵ်ႉၵၢၼ်ၸိူဝ်ႉၸၢတ်ႈ ဢမ်ႇဝႃႈ ၸဵမ်ၾိင်ႈငႄႈၾိင်ႈထုင်း လွင်ႈယဵၼ်ႇငႄႈ ၸႃႉၵႂႃႇၸိူဝ်းၼႆႉ ႁဝ်းလူဝ်ႇမေႃသွၼ်ပၼ်ၵႂႃႇၸွမ်း ဢမ်ႇၸႂ်ႈလိၵ်ႈလၢႆးၵူၺ်း မိူၼ်ၼင်ႇလွင်ႈဢၼ်လုၵ်ႈႁဵၼ်းၶဝ် ၼပ်ႉထိုဝ်ၶူးသွၼ်ၼၼ်ႉၵေႃႈ လူဝ်ႇႁဵတ်းသၢင်ႈၸွမ်းႁႂ်ႈတဵမ်ထူၼ်ႈ၊ ၶူးၵေႃႈပဵၼ်ၸၼ်ႉသုင် ပၢႆးဝူၼ်ႉႁဝ်းၵေႃႈလူဝ်ႇလႆႈပဵၼ်ၸၼ်ႉသုင် ၶူးသွၼ်ႁဝ်းၵူႈၸၼ်ႉၸၼ်ႉ ၵေႃႉလႂ်ႁပ်ႉပုၼ်ႈၽွၼ်းဢၼ်လႂ်ၵေႃႈ ႁဝ်းၶႃႈၵိုင်ႇလီဢဝ် မႄး၊ ႁၵ်ႉ၊ ၽွမ်ႉ၊ ၸွႆႈ ၼၼ်ႉ ႁဵတ်းၵၢၼ်ႁူမ်ႈၵၼ်ၵႂႃႇ ၼင်ႇႁိုဝ်ယိူင်းဢၢၼ်းႁဝ်းၶႃႈ 5 ပိူင်ၼၼ်ႉ တေယိုၼ်းဢဝ်လႆႈ လႄႈ ဢွင်ႇပူၼ်ႉၽၢၼ်ႇပေႉၵႂႃႇလႆႈ ” ၼႆယဝ်ႉ။

ၼွၵ်ႈလိူဝ်သေၼၼ်ႉ ၶူးပူင်သွၼ် ဢိၵ်ႇပႃးၽူႈယႂ်ႇၵူၼ်းလူင် ၼႂ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ထႅင်ႈလၢႆလၢႆၸဝ်ႈ လႆႈမွၵ်ႇလၢတ်ႈၶေႃႈၵႂၢမ်း ပၼ်ႁႅင်းၸႂ်လုၵ်ႈႁဵၼ်းၶဝ်ၵႂႃႇသေ ဝၢႆးၼၼ်ႉၵေႃႈ မီးပၢင်ယိုၼ်ႈဢၢပ်ႈပၼ်ဝႂ်လုၵ်ႈႁဵၼ်း ဢိၵ်ႇတင်း မွပ်ႈဢၢပ်ႈပၼ်ၶူဝ်းၶွင်ၸႂ်ႉတိုဝ်း တႃႇလုၵ်ႈႁဵၼ်းသေ လိူဝ်ၼၼ်ႉ ၽူႈယႂ်ႇၵူၼ်းလူင်၊ ၶူးပူင်သွၼ် လႄႈ လုၵ်ႈႁဵၼ်း လႆႈထၢႆႇၶႅပ်းႁၢင်ႈ ႁူမ်ႈၵၼ်ပဵၼ်တီႈမၢႆတွင်းၵႂႃႇ ၼႆယဝ်ႉ။

ၵၢၼ်သွၼ် ႁူင်းႁဵၼ်းပူၵ်းပွင်ၼမ်ႉၵတ်ႉၶူးၼႆႉ မိူဝ်းၼႃႈမႃး ၼင်ႇႁိုဝ်ပေႃးတေ ၸတ်းႁဵတ်းလႆႈထႅင်ႈၼၼ်ႉၵေႃႈ ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး တေသိုပ်ႇၶတ်းၸႂ်ၵႂႃႇထႅင်ႈယူႇ ၼႆယဝ်ႉ။

တႆးလွတ်ႈလႅဝ်း