ႁွင်ႈၵၢၼ်လူင်ပၢႆးယူႇလီ သမ်းယႃႈႁႄႉၵင်ႈၶႆႈဝတ်းယႂ်ႇ လႄႈ ပၼ်ၵႂၢမ်းႁူႉ လၢႆးႁႄႉၵင်ႈတၢင်းပဵၼ်မၢၵ်ႇလႅင်း တီႈငဝ်ႈၸိုင်ႈလွႆတႆးလႅင်း

ၼင်ႇႁိုဝ်ပေႃႈမႄႈၵူၼ်းမိူင်း ပေႃးတေႁူႉလွင်ႈၽေးတၢင်းပဵၼ်မၢၵ်ႇလႅင်း လႄႈ လွၵ်းလၢႆးႁႄႉၵင်ႈ ၵုမ်းထိင်း ၽွင်းတိတ်းၸပ်းတၢင်းပဵၼ်ၼၼ်ႉ မေႃယႃ ၼႂ်းႁွင်ႈၵၢၼ်လူင်ပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး လႆႈလူင်းႁူပ်ႉထူပ်း ပေႃႈမႄႈၵူၼ်းမိူင်း ၼႂ်းပိုၼ်ႉတီႈသေ ပၼ်ၵႂၢမ်းႁူႉ ၵဵဝ်ႇလူၺ်ႈ လွၵ်းလၢႆးႁႄႉၵင်ႈ တၢင်းပဵၼ်မၢၵ်ႇလႅင်း လႄႈ လႆႈသမ်းယႃႁေႉၵင်ႈၶႆႈဝတ်းယႂ်ႇပၼ် လုၵ်ႈဢွၼ်ႇ လႄႈ ပေႃႈမႄႈၵူၼ်းမိူင်း တီႈငဝ်ႈၸိုင်ႈလွႆတႆးလႅင်းၵႂႃႇ ဝႃႈၼႆ။

မိူဝ်ႈဝၼ်းထီႉ 5 November 2022 (လိူၼ်သိပ်းသွင်မႂ်ႇ 13 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ် 09:00 မူင်းၼၼ်ႉ မေႃယႃ ႁူင်းယႃလွႆတႆးလႅင်း ႁွင်ႈၵၢၼ်လူင်ၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA လႆႈလူင်းပိုၼ်ႉတီႈသေ ပၼ်ၵႂၢမ်းႁူႉ ၵဵဝ်ႇလူၺ်ႈလွင်ႈ လၢႆးႁႄႉၵင်တၢင်းပဵၼ် မၢၵ်ႇလႅင်း တီႈပီႈၼွင်ႉ ပွၵ်ႉ (1)၊ ပွၵ်ႉ (2)၊ ပွၵ်ႉ (3)၊ ပွၵ်ႉ (4) ငဝ်ႈၸိုင်ႈလွႆတႆးလႅင်းၵႂႃႇ ဝႃႈၼႆ။

လွင်ႈလူင်းၼႂ်းပိုၼ်ႉတီႈသေ ပၼ်ၵႂၢမ်းႁူႉတီႈၵူၼ်းမိူင်းၼႆႉ ၸုမ်းမေႃယႃၶဝ် လႆႈလၢတ်ႈၼႄ လွၵ်းလၢႆးႁႄႉၵင်ႈတၢင်းပဵၼ်မၢၵ်ႇလႅင်း လႄႈ သမ်းယႃႁေႉၵင်ႈ ၶႆႈဝတ်းယႂ်ႇ မိူၼ်ၼင်ႇ ယႃ 4-GCFUL လႆႈသမ်းပၼ်ၵူၼ်းလူင်သေ ယႃ MEASLES သမ့် သမ်းပၼ်လုၵ်ႈဢွၼ်ႇၵႂႃႇ ဝႃႈၼႆ။

ယွၼ်ႉရႃႇသီႇဢုတုလႅၵ်ႈလၢႆႈသေ ၵူၼ်းမိူင်းလၢႆလၢႆတီႈ ဢွၼ်ၵၼ်ပဵၼ် တၢင်းပဵၼ်ၶႆႈဝတ်းၵၼ်လႄႈ ၼင်ႇႁိုဝ်တေပဵၼ်လွင်ႈႁႄႉၵင်ႈဝႆႉလူင်ႈၼႃႈၼႆသေ ယူႇတီႈမေႃယႃၽၢႆႇပၢႆးယူႇလီ ငဝ်ႈၸိုင်ႈလွႆတႆးလႅင်း ၸင်ႇလူင်းၼႂ်းပိုၼ်ႉတီႈသေ သမ်းပၼ်ယႃႁႄႉၵင်ႈၶႆႈဝတ်းယႂ်ႇ လႄႈ ပၼ်ၵႂၢမ်းႁူႉ ၵဵဝ်ႇၵပ်းတၢင်းပဵၼ်မၢၵ်ႇလႅင်း ၵႂႃႇဝႃႈၼႆ။

တႆးလွတ်ႈလႅဝ်း