ႁွင်ႈၵၢၼ်ၽၢႆႇတိတ်းတေႃႇၼွၵ်ႈမိူင်း မိူင်းႁူမ်ႈတုမ် တုၵ်းယွၼ်းၵူၼ်းႁႅင်းၵၢၼ်ယၢၼ်မိူင်း ယႃႇႁႂ်ႈၼႅတ်ႈပွၵ်ႈမိူဝ်းႁိူၼ်းၶိုၼ်း

မိူဝ်ႈဝၼ်းထီႉ 11 April 2020 (လိူၼ်ႁႃႈလွင်ႈ 4 ၶမ်ႈ ပီႊတႆး 2114 ၼီႈ) ယူႇတီႈႁွင်ႈၵၢၼ် ၽၢႆႇတိတ်းတေႃႇၼွၵ်ႈမိူင်း မိူင်းႁူမ်ႈတုမ် လႆႈဢွၵ်ႇလိၵ်ႈပိုၼ်ၽၢဝ်ႇဝႃႈ ၵူၼ်းႁႅင်းၵၢၼ်ယၢၼ်မိူင်း ၸိူဝ်းယူႇသဝ်းဝႆႉၼႂ်းမိူင်းထႆးသေ ဢၼ်တေပွၵ်ႈၶိုၼ်း တီႈမိူင်းႁူမ်ႈတုမ်ၼၼ်ႉ ႁႂ်ႈဢွၼ်ၵၼ်ပွၵ်ႈမိူဝ်းၶိုၼ်း ဝၢႆးလင်သဵင်ႈလိူၼ် April 2020 ၼႆယဝ်ႉ။

မိူဝ်ႈဢွၼ်တၢင်းၼႆႉ ယူႇတီႈႁွင်ႈၵၢၼ် ၽၢႆႇတိတ်းတေႃႇၼွၵ်ႈမိူင်း မိူင်းႁူမ်ႈတုမ် လႆႈပိုၼ်ၽၢဝ်ႇဝႆႉဝႃႈ ပုၼ်ႈတႃႇၵူၼ်းႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ၸိူဝ်းယူႇသဝ်းဝႆႉ ၼႂ်းမိူင်းထႆး ၸူဝ်ႈၽွင်းယၢမ်းၼႆႉ ယႃႇပေၼႅတ်ႈဢွၼ်ၵၼ်ပွၵ်ႈမိူဝ်းၶိုၼ်း၊ ႁႂ်ႈလႆႈဢွၼ်ၵၼ်ပွၵ်ႈမိူဝ်း ဝၢႆးလင်ပွႆးသွၼ်းၼမ်ႉ ဢမ်ႇၼၼ် ဝၢႆးလင် ဝၼ်းထီႉ 15 April 2020 (လိူၼ်ႁႃႈလွင်ႈ 8 ၶမ်ႈ ပီႊတႆး 2114 ၼီႈ)ၼႆသေတႃႉၵေႃႈ ယွၼ်ႉဝႃႈ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တီႈၼႂ်းမိူင်းႁူမ်ႈတုမ် တိူဝ်းၼမ်ၶိုၼ်ႈမႃး ၵူႈဝၼ်းဝၼ်းသေ မီးၵူၼ်းတိတ်းၸပ်းၸိူဝ်ႉမႅင်း COVID-19  (40) ပၢႆယဝ်ႉလႄႈ ယူႇတီႈ ႁွင်ႈၵၢၼ်ၽၢႆႇတိတ်းတေႃႇၼွၵ်ႈမိူင်း မိူင်းႁူမ်ႈတုမ် ၸင်ႇလႆႈပိုၼ်ၽၢဝ်ႇထႅင်ႈ ၵမ်းၼိုင်ႈဝႃႈ ႁႂ်ႈၵူၼ်းႁႅင်းၵၢၼ်ယၢၼ်မိူင်း ဢၼ်မီးၼႂ်းမိူင်းထႆး ႁႂ်ႈလႆႈဢွၼ်ၵၼ် ပွၵ်ႈၶိုၼ်းဝၢႆးလင်ဝၼ်းထီႉ 30 April 2020 (လိူၼ်ႁူၵ်းမႂ်ႇ 9 ၶမ်ႈ ပီႊတႆး 2114 ၼီႈ)ၼႆႉ ၸင်ႇၵွႆႈပွၵ်ႈၶိုၼ်းႁိူၼ်းၼႆယဝ်ႉ။

ယွၼ်ႉဝႃႈ မိူဝ်ႈဝၼ်းထီႉ 9 April 2020 (လိူၼ်ႁႃႈလွင်ႈ 2 ၶမ်ႈ ပီႊတႆး 2114 ၼီႈ) ၼၼ်ႉ ၽၢႆႇဢုပ်ႉပိူင်ႇမိူင်းထႆးလႆႈသပ်းၸႅင်ႈၶၢဝ်ႇ ပိုၼ်ၽၢဝ်ႇၵႂႃႇဝႃႈ ပုၼ်ႈတႃႇၵူၼ်းၸိူဝ်းဢၼ်ယူႇသဝ်းဝႆႉၼႂ်းမိူင်းထႆး ဢၼ်ဢႃႇယုဝီႇသႃႇတေမူတ်းၸိူဝ်းၼၼ်ႉ ယူႇသဝ်းၵႂႃႇ လႆႈၼႂ်းမိူင်းထႆး တေႃႇပေႃးထိုင် ဝၼ်းထီႉ 30 April 2020 (လိူၼ်ႁူၵ်းမႂ်ႇ 9 ၶမ်ႈ ပီႊတႆး 2114 ၼီႈ) တေဢမ်ႇဢဝ်တၢင်းၽိတ်း ယွၼ်ႉလွင်ႈဝႂ်ဝီႇသႃႇမူတ်း ဝႃႈၼႆ။

ၵူၺ်းၵႃႈ ယွၼ်ႉဝႃႈတီႈမိူင်းထႆး ပိုၼ်ၽၢဝ်ႇၸႂ်ႉတိုဝ်းငဝ်းလၢႆးၶိုၵ်ႉၶၵ်ႉ တေဢမ်ႇလႆႈဢွၵ်ႇၼွၵ်ႈပိုၼ်ႉတီႈ ၽွင်းယၢမ်းၵၢင်ၶိုၼ်း 10 မူင်းထိုင် ၵၢင်ၼႂ် 4 မူင်းၼႆလႄႈ ၵူၼ်းႁႅင်းၵၢၼ်ယၢၼ်မိူင်း ဢၼ်မီးတီႈမိူင်းထႆးသမ်ႉ လႆႈထူပ်းတင်းယၢပ်ႇၽိုတ်ႇ မိူၼ်ၼင်ႇ လွင်ႈယူႇသၢင်ႈၵိၼ်သဝ်း၊ ၵၢၼ်ငၢၼ်းတႃႇတေႁဵတ်းၸိူဝ်းၼႆႉၵေႃႈ ဢမ်ႇမီးလႄႈ ၼႅတ်ႈဢွၼ်ၵၼ်ၶႂ်ႈပွၵ်ႈၶိုၼ်းမိူင်းၽႂ်မၼ်းသေ ဢမ်ႇပေႃးၶႂ်ႈပႂ်ႉလႆႈ တေႃႇပေႃးထိုင် လိူၼ်ၼႆႉသဵင်ႈ၊ ၵမ်ႈၽွင်ႈၵေႃႈ ၶႂ်ႈမိူဝ်းၼႃႇလႄႈ လၵ်ႉမိူဝ်းၸိူဝ်းၼႆႉၵေႃႈမီး၊ ၸိူဝ်းဢၼ်လၵ်ႉမိူဝ်းသမ်ႉ မၢင်ၸိူဝ်း ထုၵ်ႇၸဝ်ႈၼႃႈတီႈထႆး တီႉၺွပ်းဢဝ်တၢင်းၽိတ်းၵေႃႈ ယၢမ်ႈမီးမႃးလႄႈ လွင်ႈၼႆႉၵေႃႈ လီလႆႈမႆႈၸႂ်ယူႇ ၼႆယဝ်ႉ။

ပေႃးဝၢႆးလင်ပွႆးသွၼ်းၼမ်ႉၼႆႉၸိုင် ၸုမ်းတူင်ႉၼိုင် ပုၼ်ႈတႃႇၵူၼ်းႁႅင်းၵၢၼ်ယၢၼ်မိူင်းဢွၼ်ၵၼ် လၢမ်းၶၢတ်ႈဝႆႉဝႃႈ ၵူၼ်းႁႅင်းၵၢၼ်ယၢၼ်မိူင်း တီႈမိူင်းထႆး တေပွၵ်ႈၶိုၼ်းႁိူၼ်း ၼပ်ႉႁူဝ်သႅၼ်ၼႆလႄႈ ယူႇတီႈၸုမ်းတူင်ႉၼိုင်တူင်ႇဝူင်းၵူၼ်းၶဝ် ဢွၼ်ၵၼ်တိုၵ်းသူၼ်း လူင်ပွင်ၸိုင်ႈဝႆႉဝႃႈ ႁႂ်ႈႁၢင်ႈႁႅၼ်း တီႈယူႇတၼ်းသဝ်း ဢွင်ႈတီႈၵဵပ်းတူဝ် ႁႂ်ႈၶိုတ်းတၼ်းဝႆႉၼႆယဝ်ႉ။

တီႈၼႂ်းမိူင်းထႆးၼႆႉ မီးၵူၼ်းႁႅင်းၵၢၼ်ယၢၼ်မိူင်း မိူင်းႁူမ်ႈတုမ် မွၵ်ႈ 3 လၢၼ်ႉပၢႆသေ ယွၼ်ႉဝႃႈ ၶွမ်ႇပၼီႇႁူင်းၸၢၵ်ႈၼႂ်းမိူင်းထႆး ပိၵ်ႉဢိုတ်းလႄႈ ၵူၼ်းႁႅင်းၵၢၼ်ယၢၼ်မိူင်း ဢၼ်ဢမ်ႇမီးတီႈႁဵတ်းၵၢၼ်ၼၼ်ႉ မီးဝႆႉတင်းၼမ်၊ မၢင်ၸိူဝ်းၵေႃႈ ယွၼ်ႉဝႃႈ ဢမ်ႇလႆႈၵႃႈသၢႆႈတႅၼ်းၶိုၼ်းသေ ယူႇသဝ်းဝႆႉၵေႃႈမီး၊ ၵၢၼ်တႃႇတေႁဵတ်းထႅင်ႈၵေႃႈ ႁႃပႆႇလႆႈလႄႈ ဢွၼ်ၵၼ်ၶႂ်ႈပွၵ်ႈမိူဝ်းၶိုၼ်း ႁိူၼ်းၽႂ်မၼ်းၵေႃႈ မီးတင်းၼမ်ၼႆယဝ်ႉ။

ယွၼ်ႉၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းႁၢဝ်ႈႁႅင်း ၸွတ်ႇတူဝ်ႈၵႂႃႇၵူႈမိူင်းမိူင်း ၼႂ်းလုမ်ႈၾႃႉလႄႈ ဢမ်ႇဝႃႈ ၵၢၼ်ပၢႆးမၢၵ်ႈမီး၊ ပၢႆးယူႇလီ၊ လွင်ႈယူႇသၢင်ႈၵိၼ်သဝ်း၊ လွင်ႈဢွၵ်ႇတႃႈဢွၵ်ႇတၢင်းၸိူဝ်းၼႆႉၵေႃႈ မီးလွင်ႈတုမ်ႉတိူဝ်ႉတင်းၼမ်၊ ပုၼ်ႈတႃႇၵူၼ်းႁႅင်းၵၢၼ်ယၢၼ်မိူင်း ဢၼ်ယူႇသၢင်ႈၵိၼ်သဝ်း  ႁဵတ်းၵၢၼ် ယူႇၸိူဝ်းၼၼ်ႉၵေႃႈ ယွၼ်ႉပိူဝ်ႈၸိုင်ႈမိူင်းတေႃႇၸိုင်ႈမိူင်း ဢွၼ်ၵၼ်ပိၵ်ႉဢိုတ်း လၢၼ်ႇၶဝ်ႈဢွၵ်ႇမိူင်း မူတ်းယဝ်ႉလႄႈ ၵမ်ႈၽွင်ႈၵေႃႈ ပႆႇၸၢင်ႈပွၵ်ႈၶိုၼ်းမိူဝ်းႁိုဝ်း၊ ၵၢၼ်ငၢၼ်းၵေႃႈ ပႆႇၸၢင်ႈႁဵတ်းသေ လႆႈထူပ်းတင်းယၢပ်ႇၽိုတ်ႇဝႆႉတင်းၼမ်ၼႆယဝ်ႉ။

တႆးလွတ်ႈလႅဝ်း