ႁႅင်းၵၢၼ်မိူင်းႁူမ်ႈတုမ် ၼႂ်းမိူင်းထႆး ၵိၼ်ၸၢင်ႈလၵ်ႉလွမ်တေႃႉယႃႈမဝ်းၵမ်

မိူဝ်ႈဝၼ်းထီႉ 17 November 2024 (လိူၼ်သိပ်းသွင်လွင်ႈ 2 ၶမ်ႈ ပီႊတႆး 2118 ၼီႈ) ၼၼ်ႉ ၸဝ်ႈၼႃႈတီႈထႆး လၢႆလၢႆၽၢႆႇလႄႈ ၽၢႆႇဢုပ်ႇပိူင်ႇၸႄႈဝဵင်းသင်ႇၶလႃႉပူးရီး ႁူမ်ႈၵၼ်လူင်းၵူတ်ႇထတ်း  တီႈလၢၼ်ႇၵူတ်ႇထတ်း ရူမ်ႉၼမ်ႉၵရဵၵ်း ပွၵ်ႉ 8 ဢိူင်ႇၼွင်လူး ၸႄႈဝဵင်းသင်ႇၶလႃႉပူးရီး ၸႄႈတွၼ်ႈၵၢၼ်းၸၼပူးရီး သေ လႆႈႁႄႉၵိုတ်းၵူတ်ႇထတ်း ၵႃးလမ်းၼိုင်ႈ  ဢၼ်ၵူၼ်းႁေႃႈၵႃး ပဵၼ်ၵူၼ်းမိူင်းႁူမ်ႈတုမ်  လၵ်ႉလွမ်ၶဝ်ႈမိူင်းထႆးယဝ်ႉ ယိပ်းတိုဝ်းဝႆႉဝတ်းဝႂ် ဢၼ်ဢမ်ႇၸႂ်ႈၵူၼ်းထႆး လႄႈ လႆႈၵူတ်ႇထတ်းႁၼ်ယႃႈမတီႈၼႂ်းၵႃးၼၼ်ႉ ႁူမ်ႈတင်းမူတ်းမွၵ်ႈ 170,000 မဵတ်ႉ ၼႆယဝ်ႉ။

ၸွမ်းၼင်ႇၸဝ်ႈၼႃႈတီႈထႆးၶဝ် ၸႅတ်ႈထၢမ် လႄႈ လႆႈႁူႉဝႃႈ ၵူၼ်းမိူင်းႁူမ်ႈတုမ် ၼၼ်ႉ လႆႈၵပ်းသိုပ်ႇၵိၼ်ၸၢင်ႈၽၢၼ်ႇတၢင်းၾူၼ်း ႁႂ်ႈၵႂႃႇႁေႃႈၵႃး ၼႂ်းၵိဝ်ႇ 1 ဝၢၼ်ႈၾရႃႉၸေႇတီႇသၢမ်ဢူင်း ဢိူင်ႇၼွင်လူး ၸႄႈဝဵင်းသင်ႇၶလႃႉပူးရီး သေ တေလႆႈႁေႃႈၵႂႃႇသူင်ႇတီႈ ၼႂ်းဝဵင်းသင်ႇၶလႃႉပူးရီး တေမီးၵူၼ်းႁပ်ႉၶွင်ပႂ်ႉဝႆႉ ၵူၺ်းၵႃႈသမ်ႉမႃးထုၵ်ႇၸဝ်ႈၼႃႈတီႈၶဝ် တီႉၺွပ်းပႅတ်ႈဢွၼ်တၢင်း ဝႃႈၼႆ။

တႆးလွတ်ႈလႅဝ်း