ႁႅင်းၵၢၼ်မိူင်းႁူမ်ႈတုမ် ႁေႃႈၵႃးပၢႆႈပလိၵ်ႈထႆး ပဵၼ်ၽေးၵိုင်ႉၵၢင်ႉတၢႆတင်းလမ်း

မိူဝ်ႈၼႆႉဝၼ်းထီႉ 20 November 2024 (လိူၼ်သိပ်းသွင်လွင်ႈ 5 ၶမ်ႈ ပီႊတႆး 2118 ၼီႈ) ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် လႆႈႁပ်ႉလွင်ႈပွင်ႇလႅင်းဝႃႈ မီးၽေးၵိုင်ႉၵၢင်ႉ တီႈတၢင်းငွၵ်း ဝတ်ႉၵေႃႇရႅတ်ႉ သဵၼ်ႈတၢင်း ပၢင်းလဵၼ်း−တွၼ်းတုမ်း ပွၵ်ႉ 8 ဢိူင်ႇ ပၢင်ပႃ ၸႄႈဝဵင်းပၢင်းလဵၼ်း ၸႄႈတွၼ်ႈၼၶွၼ်းပထူမ် သေ ၸင်ႇလႆႈ ၵႂႃႇၵူတ်ႇထတ်းၸွႆႈထႅမ် ထူပ်းႁၼ်ၵႃးပိၼ်ႈတူၵ်းၼႂ်းႁွင်ႈၼမ်ႉ လႄႈ ထူပ်းႁၼ် ၶၢပ်ႈတူဝ်တၢႆ ၼႂ်းၵႃး 2 ၵေႃႉ၊ ၼႂ်းၼမ်ႉ 5 ၵေႃႉ၊ ဢၼ်လူႉသဵင်ႈတၢႆၼၼ်ႉ ပဵၼ်ယိင်း 5 ၵေႃႉ၊ ၸၢႆး 2 ၵေႃႉ ၵူၼ်းလုတၢႆၼၼ်ႉ ပဵၼ်ၽႂ်ၽွင်ႈၼႆတႄႉ ယင်းပႆႇၸၢင်ႈလၢတ်ႈလႆႈ ၼႆယဝ်ႉ။

ၼႂ်းလူတ်ႉၼၼ်ႉ ၵူၺ်းထူပ်းႁၼ်ဝႂ်ၵပ်းတူဝ်ၵူၼ်းမိူင်းႁူမ်ႈတုမ်မၢၼ်ႈ ဢႃႇယုၼႂ်း ၵႄႈ 20−30 ပီႊ လႄႈ တီႈၵူၼ်းႁေႃႈၵႃးၼၼ်ႉ ထူပ်းႁၼ်ဝႂ်ၶႂၢင်ႉႁေႃႈလူတ်ႉၵႃး ၸူဝ်ႈၶၢဝ်း ၸိုဝ်ႈႁွင်ႉ ဢွင်ႇဢွင်ႇဢူး (MR.AUNG AUNG OO) သေ မီးၶူဝ်းၶွင်ဢမူၺ်ႇ ၵိုၵ်းၶၢပ်ႈတူဝ် ၵေႃႉလႂ်ၵေႃႉၼၼ်ႉၵေႃႈမီးယူႇလၢႆလၢႆမဵဝ်း ဢိၵ်ႇတင်း တူဝ်ငိုၼ်းႁူမ်ႈၵၼ်တင်းမူတ်းမီး 13,000 ဝၢတ်ႇ ဝႃႈၼႆ။

ဢွၼ်တၢင်းတေပဵၼ်ၽေးၵိုင်ႉၵၢင်ႉၼၼ်ႉ ပလိၵ်ႈထႆး ႁူင်းပလိၵ်ႈၸႄႊဝဵင်း ပၢင်းလဵၼ်း ဢွၵ်ႇၵူတ်ႇထတ်းလူတ်ႉၶိူင်ႈ ယူႇၼၼ်ႉ  ထူပ်းႁၼ်ၵႃးလမ်းၼၼ်ႉ ၵိုတ်းဝႆႉသေ ႁၼ်ဝႃႈမီးလွင်ႈပႅၵ်ႇပိူင်ႈဝႆႉလႄႈ တေယွၼ်းၶဝ်ႈၵူတ်ႇထတ်း ၵႃးၼၼ်ႉသမ်ႉ ၶုၼ်ႇႁေႃႈၽႃႇလၢၼ်ႇပၢႆႈဝႆးဝႃႈဝႆး ပလိၵ်ႈၶဝ် ၸင်ႇၵပ်းၸၢၵ်ႈ ပွင်ႇပၼ်လၢၼ်ႇၽၢႆႇၼႃႈ ႁႂ်ႈပႂ်ႉတီႉၺွပ်းသေတႃႉ သမ်ႉမႃးပဵၼ်ၽေးၵိုင်ႉၵၢင်ႉ ပိၼ်ႈတူၵ်းႁွင်ႈၼမ်ႉသေ ႁဵတ်းႁႂ်ႈမီးၵူၼ်းမိူင်းႁူမ်ႈတုမ် လူႉသဵင်ႈတၢႆလၢႆၵေႃႉ လႄႈ ၽၢႆႇတၢင်းပလိၵ်ႈထႆး လၢမ်းၶၢတ်ႈဝႃႈ ၸိူဝ်းၶဝ်လႅပ်ႈတေၶၢႆႉတီႈႁဵတ်းၵၢၼ် ၵႂႃႇထႅင်ႈၸႄႈတွၼ်ႈၼိုင်ႈ ၼႆယဝ်ႉ။

တႆးလွတ်ႈလႅဝ်း