ႁႅင်းၵၢၼ်ယၢၼ်မိူင်း မဝ်းလဝ်ႈဢဝ်မိတ်ႈထိူဝ်ၶေႃးၵၼ်တၢႆၶိုၼ်း

ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ဢၼ်ၵႂႃႇႁႃႁဵတ်းၵၢၼ်ၼႂ်းမိူင်းထႆးၼၼ်ႉ မဝ်းလဝ်ႈယဝ်ႉသေ ဢဝ်မိတ်ႈထိူဝ်ၶေႃႈဢူၺ်းၵေႃႉတၢႆၶိုၼ်း ၼႆယဝ်ႉ။

မိူဝ်ႈဝႃးဝၼ်းထီႉ 7 July 2024 (လိူၼ်ပႅတ်ႇမႂ်ႇ 2 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းၸဝ်ႈၼႃႈတီႈပလိၵ်ႈထႆး တီႉၺွပ်းလႆႈ ၵျေႃႇထႅတ်ႉ (Kyaw Htet) ဢႃႇယု 30 ပီႊ ပဵၼ်ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် တီႈႁိမ်းသဵၼ်ႈတၢင်းလူမ်ႉၵၢဝ်ႉ မိၼ်းပူးရီး ဝဵင်းလူင်မိူင်းၵွၵ်ႇ ဢၼ်ၶႃႈႁႅမ်ဢူၺ်းၵေႃႉမၼ်းၶိုၼ်း ၽွင်းၵိၼ်လဝ်ႈမဝ်းၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ လႆႈမီးမႃးဝၢႆးသေ မိူဝ်ႈဝၼ်းထီႉ 5 July 2024 ဝၼ်းဢၼ် မူဝ်းဝိၼ်း (Moe Win) ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ထုၵ်ႇၺႃးဢူၺ်းၵေႃႉမၼ်း ဢဝ်မိတ်ႈထိူဝ်ၶေႃးတၢႆ ၼႂ်းဢွင်ႈတီႈလိုဝ်ႈၵူၼ်းႁဵတ်းၵၢၼ်ၵေႃႇသၢင်ႈတီႈၼိုင်ႈ ၼႂ်းၵိဝ်ႇၵၢၼ်းၸၼႃးၽိသဵၵ်ႇ 12 သၽၢၼ်းသုင် ဝဵင်းလူင်မိူင်းၵွၵ်ႇၼၼ်ႉ ၼႆယဝ်ႉ။

ၸွမ်းၼင်ႇပလိၵ်ႈထႆးၶဝ် လႆႈၸႅတ်ႈထၢမ်ၼၼ်ႉသေ ၵျေႃႇထႅတ်ႉ (Kyaw Htet) ယွမ်းႁပ်ႉဝႃႈ ယွၼ်ႉမၼ်းၸၢႆးမဝ်းလဝ်ႈသေ လႆႈလူင်းမိုဝ်းႁဵတ်းၵႂႃႇ ဢွၼ်တၢင်းတေပၢႆႈဢွၵ်ႇမႃး ၵူၺ်းဢမ်ႇႁူႉဝႃႈ ဢူၺ်းၵေႃႉမၼ်းၼၼ်ႉ တေလူႉသဵင်ႈတၢႆ ဝႃႈၼႆ။

ၸိူင်ႉႁိုဝ်ၵေႃႈလီ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ်ၵေႃႈ လႆႈႁဵတ်းသၢင်ႈပၼ်တၢမ်ႇ တၢင်းၽိတ်းၵႂႃႇၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ၼႆယဝ်ႉ။

တႆးလွတ်ႈလႅဝ်း