ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် တိတ်းၸပ်းၸိူဝ်ႉမႅင်းတၢင်းပဵၼ် COVID-19 တီႈမိူင်းထႆး မီး 14 ၵေႃႉ

တီႈမိူင်းထႆး မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တိူဝ်းၶိုၼ်ႈမႃး ၼိုင်ႈဝၼ်းလႂ်ၼိုင်ႈဢိတ်းသေ တီႈမိူင်းထႆး မီးႁႅင်းၵၢၼ်ယၢၼ်မိူင်း ၼပ်ႉႁူဝ်လၢၼ်ႉမၼ်း ယူႇသၢင်ႈၵိၼ်သဝ်းဝႆႉလႄႈ ၸွမ်းၼင်ႇ ႁွင်ႈၵၢၼ်ၽၢႆႇပၢႆးယူႇလီမိူင်းထႆး ပိုၼ်ၽၢဝ်ႇဝႆႉၼၼ်ႉ မီးႁႅင်းၵၢၼ်ယၢၼ်မိူင်း မိူင်းႁူမ်ႈတုမ် 14 ၵေႃႉ တိတ်းၸပ်းၸိူဝ်ႉမႅင်းတၢင်းပဵၼ် COVID-19 ၼႆယဝ်ႉ။

တေႃႇထိုင်မိူဝ်ႈၼႆႉ ဝၼ်းထီႉ 16 April 2020 (လိူၼ်ႁႃႈလွင်ႈ 9 ၶမ်ႈ ပီႊတႆး 2114 ၼီႈ) တီႈမိူင်းထႆး မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် COVID-19 တိူဝ်းၼမ်ၶိုၼ်ႈမႃးထႅင်ႈ 29 ၵေႃႉ ႁူမ်ႈၵူၼ်း တိတ်းၸပ်းၸိူဝ်ႉမႅင်းတၢင်းပဵၼ် COVID-19 မီး (2,672) ၵေႃႉ၊ ၵူၼ်းလူႉတၢႆမီး (46) ၵေႃႉသေ ၼႂ်းၵူၼ်း တိတ်းၸပ်းၸိူဝ်ႉမႅင်းတၢင်းပဵၼ် သွင်ႁဵင်ပၢႆၼၼ်ႉ ပႃးႁႅင်းၵၢၼ်ယၢၼ်မိူင်း မိူင်းႁူမ်ႈတုမ် 14 ၵေႃႉ ဝႃႈၼႆ။

ၼႂ်းၵူၼ်းဢၼ်တိတ်းၸပ်း ၸိူဝ်ႉမႅင်းတၢင်းပဵၼ် COVID-19 တီႈမိူင်းထႆးၼၼ်ႉ လိူဝ်သေ ၵူၼ်းမိူင်းထႆးယဝ်ႉ ၵူၼ်းၼွၵ်ႈမိူင်းတႄႉ တေမီးမိူၼ်ၼင်ႇ ၵူၼ်းမိူင်းၶႄႇ ဢၼ်ယူႇသဝ်းၼႂ်းမိူင်းထႆး တိတ်းၸပ်းၼမ်သေ ပိူၼ်ႈလႄႈ တၢမ်းမႃးၵေႃႈ ပဵၼ်ၵူၼ်းမိူင်းၽရင်ႇသဵတ်ႇသေ ၵူၼ်းမိူင်းႁူမ်ႈတုမ်သမ်ႉ ပဵၼ်ထီႉသၢမ် ဢၼ်မီးလွင်ႈ တိတ်းၸပ်းၸိူဝ်ႉမႅင်းတၢင်းပဵၼ် COVID-19  ဝႃႈၼႆ။

ယွၼ်ႉဝႃႈ ၸိူဝ်ႉမႅင်းတၢင်းပဵၼ် COVID-19 တိုၵ်ႉၽႄႈလၢမ်းယူႇလႄႈ ၼင်ႇႁိုဝ်ပေႃးတေၵုမ်းထိင်းလႆႈ လွင်ႈၽႄႈလၢမ်းၸိူဝ်ႉမႅင်းတၢင်းပဵၼ်တီႈၼႂ်းမိူင်းထႆးၼၼ်ႉ တႄႇၸဵမ်မိူဝ်ႈ ဝၼ်းထီႉ 3 April 2020 (လိူၼ်ႁႃႈမႂ်ႇ 11 ၶမ်ႈ ပီႊတႆး 2114 ၼီႈ)ၼၼ်ႉ လူင်ပွင်ၸိုင်ႈမိူင်းထႆး လႆႈပိုၼ်ၽၢဝ်ႇ ၸႂ်ႉပိူင်တိုဝ်းၵမ်ပၵ်းပိူင်မၢႆမီႈ ငဝ်းလၢႆးၶိုၵ်ႉၶၵ်ႉသေယဝ်ႉ ႁၢမ်ႈၵူၼ်းမိူင်းဢွၵ်ႇၼွၵ်ႈႁိူၼ်းယေး ၶၢဝ်းယၢမ်းၵၢင်ၶိုၼ်း 10 မူင်းတေႃႇထိုင် ၵၢင်ၼႂ် 4 မူင်း (ၶၢဝ်းယၢမ်းမိူင်းထႆး) လႄႈ ႁၢမ်ႈၵူၼ်းၸူႉတုမ်ၵၼ် ၸဵမ်ၸိူဝ်းၼႆႉ။

လိူဝ်သေၼၼ်ႉဢမ်ႇၵႃး လူင်ပွင်ၸိုင်ႈမိူင်းထႆး လႆႈပိုၼ်ၽၢဝ်ႇႁႄႉႁၢမ်ႈတူဝ်ႈတင်းမိူင်းထႆး တေဢမ်ႇလႆႈ ၶၢႆလဝ်ႈ၊ ပီႇယႃႇ လႄႈ ၶိူင်ႈမဝ်းမိင်း ၽွင်းၶၢဝ်းပွႆးသွၼ်းၼမ်ႉ ဝႃႈၼႆ။

ၵူၺ်းၵႃႈ ယင်းတိုၵ်ႉမီးႁႅင်းၵၢၼ်ယၢၼ်မိူင်း ၵမ်ႈၽွင်ႈ ႁဵတ်းၽိတ်းပၵ်းပိူင်မၢႆမီႈ ၸွမ်းမၢႆမီႈငဝ်းလၢႆး ၶိုၵ်ႉၶၵ်ႉသေ ၸူႉတုမ်ၵၼ် တင်ႈဝူင်းၵိၼ်ၵျေႃႇၵၼ် မွၵ်ႈ (5) ၵေႃႉ တီႈၼႂ်းႁွင်ႈၼွၼ်း၊ ႁွင်ႈသဝ်းၸိူဝ်းၼႆႉလႄႈ ၸဝ်ႈၼႃႈတီႈပလိၵ်ႈထႆး ၶဝ်ႈတီႉၺွပ်းဢဝ်တၢင်းၽိတ်းၵေႃႈ မီးဝႆႉတင်းၼမ်။

ယွၼ်ႉလူၺ်ႈ ႁႅင်းၵၢၼ်ယၢၼ်မိူင်း ဢၼ်ယူႇဝႆႉတီႈၼႂ်းၸႄႈတွၼ်ႈၵဵင်းမႆႇ ၸိုင်ႈထႆးၼၼ်ႉ ၵမ်ႈပႃႈၼမ် ပဵၼ်ပီႈၼွင်ႉႁႅင်းၵၢၼ်တႆး ႁဝ်းၶႃႈလႄႈ ၸွမ်းၼင်ႇ ပၵ်းပိူင်ဢုပ်ႉပိူင်ႇဝၢၼ်ႈမိူင်း ၸွမ်းမၢႆမီႈငဝ်းလၢႆး ၶိုၵ်ႉၶၵ်ႉသေ ဢမ်ႇဝႃႈတေၵႂႃႇလႂ် တေႁဵတ်းသင်ၵေႃႈယဝ်ႉ ထုၵ်ႇလီႁဵတ်းသၢင်ႈတိုဝ်းၵမ်ၸွမ်း ပိူင်ဢုပ်ႉပိူင်ႇမိူင်းထႆး မီးၼၼ်ႉယူႇ ၼႆယဝ်ႉ။

တီႈမိူင်းထႆးၼႆႉ မီးႁႅင်းၵၢၼ်ယၢၼ်မိူင်း မိူင်းႁူမ်ႈတုမ် 3 လၢၼ်ႉပၢႆသေ ယွၼ်ႉဝႃႈ ၽွင်းၼႆႉ ၶွမ်ႇပၼီႇ ႁူင်းၸၢၵ်ႈၵမ်ႈၽွင်ႈ လႆႈပိၵ်ႉဢိုတ်းဝႆႉယဝ်ႉလႄႈ ႁႅင်းၵၢၼ်ယၢၼ်မိူင်းၵမ်ႈၽွင်ႈ ဢမ်ႇမီးတီႈႁဵတ်းၵၢၼ်သေ ဢွၼ်ၵၼ်ၶႂ်ႈပွၵ်ႈမိူဝ်းၶိုၼ်း မိူင်းၽႂ်မၼ်းယူႇ၊ ပုၼ်ႈတႃႇၵူၼ်းၸိူဝ်းဢၼ်ၶႂ်ႈပွၵ်ႈမိူဝ်းၶိုၼ်းၼၼ်ႉၵေႃႈ ယူႇတီႈႁွင်ႈၵၢၼ်တိတ်းတေႃႇၼွၵ်ႈမိူင်း မိူင်းႁူမ်ႈတုမ် လႆႈပိုၼ်ၽၢဝ်ႇဝႆႉဝႃႈ ႁႂ်ႈလႆႈဢွၼ်ၵၼ်ပွၵ်ႈမိူဝ်းၶိုၼ်း ဝၢႆးလင် ဝၼ်းထီႉ 30 April 2020 ၼႆယဝ်ႉ။

တႆးလွတ်ႈလႅဝ်း