ႁႅင်းၵၢၼ်ယၢၼ်မိူင်း ၸူမ်ၼမ်ႉတၢႆလၢႆဝၼ်းယဝ်ႉ ၸင်ႇထူပ်းႁၼ်ၶၢပ်ႈတူဝ်

ႁႅင်းၵၢၼ်ယၢၼ်မိူင်း ဢၼ်ပဵၼ်ပီႈၼွင်ႉတႆးၵေႃႉၼိုင်ႈ ၸူမ်ၼမ်ႉတၢႆလႆႈလၢႆဝၼ်း ယဝ်ႉ ၸင်ႇမီးၵူၼ်းၵႂႃႇထူပ်းႁၼ်ၶၢပ်ႈတူဝ်တၢႆၼႂ်းၼွင် ၼႆယဝ်ႉ။

မိူဝ်ႈဝၼ်းထီႉ 9 August 2024 (လိူၼ်ၵဝ်ႈမႂ်ႇ 5 ၶမ်ႈ ပီႊတႆး 2118 ၼီႈ) မီးၵူၼ်းၵႂႃႇထူပ်း ႁၼ်ၶၢပ်ႈတူဝ်တၢႆ ဢၼ်မီးဢၢႆတူႇဢၢႆၼဝ်ႈ ၽူးယူႇၼိူဝ်ၼွင်ၼမ်ႉ ၼႂ်းပိုၼ်ႉတီႈ ဝၢၼ်ႈႁူၺ်ႈမၢၵ်ႇၶိူဝ်သူမ်ႈ ပွၵ်ႉ 5 ဢိူင်ႇမွၵ်ႇၸမ်ႇပႄႇ ၸႄႈဝဵင်းမႄႈႁွင်ႈသွၼ် ၸႄႈတွၼ်ႈမႄႈႁွင်ႈသွၼ်သေ လႆႈပွင်ႇပၼ်တီႈၽူႈမီးပုၼ်ႈၽွၼ်းထႆးၶဝ် ၵႂႃႇၵူတ်ႇထတ်း တူၺ်းတႄႉ ဢမ်ႇလႆႈမီးႁွႆးမၢတ်ႇၸဵပ်း ဢၼ်ထုၵ်ႇႁဵတ်းႁၢႆႉသင် သေလွင်ႈ လႄႈ လႆႈႁူႉဝႃႈ ၵူၼ်းၵေႃႉဢၼ်ၸူမ်ၼမ်ႉတၢႆၼၼ်ႉ ၸိုဝ်ႈႁွင်ႉ လုင်းတုၺ်ႉ ဢႃႇယု 54 ပီႊ ႁႅင်းၵၢၼ်ယၢၼ်မိူင်း ဢၼ်ပဵၼ်ပီႈၼွင်ႉတႆး ဝႃႈၼႆ။

လုင်းတုၺ်ႉၼႆႉ ပဵၼ်ၵူၼ်းဢၼ်တိတ်းၸပ်းႁိၼ်ႉလဝ်ႈ လႄႈ ႁဵတ်းႁႂ်ႈၵေႃႉပဵၼ် မေးလႆႈဢုမ်ႈလုၵ်ႈပၢႆႈပႅတ်ႈ မီးၶၢဝ်းတၢင်း 10 ပီႊပၢႆယဝ်ႉသေ လႆႈယူႇႁင်းၵူၺ်းၵေႃႉ လဵဝ် ၼႆယဝ်ႉ။

ၽၢႆႇတၢင်းၽူႈမီးပုၼ်ႈၽွၼ်းၶဝ် လၢမ်းၶၢတ်ႈဝႃႈ မၼ်းၸၢႆးလႆႈဢွၵ်ႇႁိူၼ်းၵႂႃႇႁႃ ၵိၼ်ၸၢင်ႈ တႃႇႁႃငိုၼ်းမႃးသိုဝ်ႉၵိၼ်လဝ်ႈ မိူၼ်ၼင်ႇၵူႈဝၼ်း လႄႈ မဝ်းလဝ်ႈယဝ်ႉ ႁဵတ်းႁႂ်ႈၶီႈလိုတ်းတူၵ်းလူင်းၵႂႃႇၼႂ်းၼွင်ၼမ်ႉသေ လူႉသဵင်ႈတၢႆ ထိုင်တီႈၶၢပ်ႈတူဝ်ပေႃးၽူးယူႇၼိူဝ်ၼမ်ႉ ဝႃႈၼႆ။

ဝၢႆးသေဢမ်ႇလႆႈႁၼ် လုင်းတုၺ်ႉ ပွၵ်ႈၶိုၼ်းႁိူၼ်းယၢမ်းၵၢင်ၶမ်ႈၼၼ်ႉၵေႃႈ  ၽၢႆႇတၢင်းပေႃႈမႄႈပီႈၼွင်ႉ လႆႈဢွၼ်ၵၼ်ဢွၵ်ႇၸွမ်း ႁႃပဵၼ်ၶၢဝ်းတၢင်း 3 ဝၼ်း တေႃႇထိုင် မီးၵူၼ်းၵႂႃႇထူပ်းႁၼ်မၼ်းၸၢႆး တၢႆၽူးယူႇၼိူဝ်ၼမ်ႉၼၼ်ႉ ၼႆယဝ်ႉ။

တႆးလွတ်ႈလႅဝ်း