ၵဵဝ်ႇလွင်ႈပၼ်ႁႃလူင်မိူင်းႁူမ်ႈတုမ်သေ ၽွင်းလူင်ၽၢႆႇၼွၵ်ႈမိူင်း ဢႃႇသီႇယၼ်ႇ တေၸတ်းႁဵတ်းပၢင်ၵုမ်ၶိုၵ်ႉတွၼ်း

တႃႇတေဢုပ်ႇဢူဝ်း ၵဵဝ်ႇလွင်ႈၶၵ်ႉၵၢၼ်ငမ်းယဵၼ် ၼႂ်းမိူင်းႁူမ်ႈတုမ်ၼႆသေ ၽွင်းလူင်ၽၢႆႇၼွၵ်ႈမိူင်း ဢႃႇသီႇယၼ်ႇ တေၸတ်းႁဵတ်းပၢင်ၵုမ်ၶိုၵ်ႉတွၼ်း ၼႂ်းဝၼ်းထီႉ 27 October 2022 (လိူၼ်သိပ်းသွင်မႂ်ႇ 4 ၶမ်ႈ ပီႊတႆး 2116 ၼီႈ) တီႈမိူင်းဢိၼ်ႇတူဝ်ႇၼီးသျႃးၼႆ ႁွင်ႈၵၢၼ်လူင်ၽၢႆႇၼွၵ်ႈမိူင်းၵမ်ႇပေႃးတီးယႃး လႆႈပိုၼ်ၽၢဝ်ႇၵႂႃႇ မိူဝ်ႈဝၼ်းထီႉ 23 October 2022 ၼင်ႇၼႆ။

ပၢင်ၵုမ်ၶိုၵ်ႉတွၼ်း ဢၼ်တေၸတ်းႁဵတ်းၵႂႃႇတီႈ လုမ်းၽူႈၼမ်းၼႂ်းၵူႈလွင်ႈလွင်ႈ ဢႃႇသီႇယၼ်ႇ Association of Southeast Asian Nations (ASEAN) တီႈဝဵင်းလူင်ၵျႃႇၵႃႇတႃႇ ၸိုင်ႈမိူင်းဢိၼ်ႇတူဝ်ႇၼီးသျႃးၼၼ်ႉ တေဢုပ်ႇဢူဝ်းၵၼ် လွင်ႈၶေႃႈလႆႈၸႂ် ၶၵ်ႉၵၢၼ်ငမ်းယဵၼ် 5 ၶေႃႈ ဢၼ်ၸုမ်းသိုၵ်းမၢၼ်ႈ လႄႈ ဢႃႇသီႇယၼ်ႇ လႆႈတူၵ်းလူင်းၵၼ်ဝႆႉၼၼ်ႉၼႆယဝ်ႉ။

မိူဝ်ႈပီႊၵၢႆ 2021 ၼႆႉ ၼင်ႇႁိုဝ်တေၵႄႈလိတ်ႈလႆႈ ပၼ်ႁႃလွင်ႈသုၵ်ႉယုင်ႈ ၼႂ်းမိူင်းႁူမ်ႈတုမ်ၼႆသေ ၽူႈၼမ်းၸုမ်းသိုၵ်းမၢၼ်ႈယိုတ်းမိူင်း လႄႈ ၽူႈၼမ်းၸိုင်ႈမိူင်း ၼႂ်းၸုမ်းဢႃႇသီႇယၼ်ႇ လႆႈမီးၶေႃႈတူၵ်းလူင်းၵၼ်ဝႆႉ 5 ၶေႃႈၼႆ Chum Sounry ၽူႈတၢင်လၢတ်ႈ ႁွင်ႈၵၢၼ်လူင်ၽၢႆႇၼွၵ်ႈမိူင်းၵမ်ႇပေႃးတီးယႃး လၢတ်ႈတီႈ သိုဝ်ႇၶၢဝ်ႇ Reuters ၼင်ၼႆ။
ၼႂ်းမိူင်းႁူမ်ႈတုမ်ၼႆႉ ဝၢႆးသေၸုမ်းသိုၵ်းမၢၼ်ႈ ယိုတ်းဢၢမ်းၼၢတ်ႈ လူင်ပွင်ၸိုင်ႈၼူၵ်ႉယုင်း NLD ဢၼ်ဢွင်ႇသၢၼ်းသုၵျီႇဢွၼ်ႁူဝ်ၵႂႃႇ မိူဝ်ႈလိူၼ် February 2021 ၼၼ်ႉ ဝၢၼ်ႈမိူင်းလႆႈသုၵ်ႉယုင်ႈဢူၼ်ၵဝ်း ဢမ်ႇၼိမ်ဢမ်ႇသဝ်း တေႃႇထိုင်ဝၼ်းမိူဝ်ႈၼႆႉယဝ်ႉ။

ၸုမ်းသိုၵ်းမၢၼ်ႈယိုတ်းမိူင်းၼႆႉ လႆႈတီႉၺွပ်းၵုမ်းၶင်တူဝ် ဢွင်ႇသၢၼ်းသုၵျီႇ လႄႈ ၽူႈၸိူဝ်းလုၵ်ႉမႃးသၢၼ်ၶတ်းၶဝ် ၼပ်ႉႁူဝ်ႁဵင် သေဢမ်ႇၵႃး ယင်းၸႂ်ႉဢဵၼ်ႁႅင်း ၶိူင်ႈယိပ်းၵွင်ႈၵၢင်ႇ ၼင်ႇမိူၵ်ႈမႂ်ႈသေ ၶဝ်ႈယႃႉပၢင်ၼႄၵၢင်ၸႂ်ပႃးယူႇယဝ်ႉ။
ပၢင်ၵုမ်ၶိုၵ်ႉတွၼ်း ၽွင်းလူင်ၽၢႆႇၼွၵ်ႈမိူင်း ဢႃႇသီႇယၼ်ႇ ၼႆႉ မီးယိူင်းဢၢၼ်း တႃႇႁႃၶေႃႈၼႄႉၼမ်း တွၼ်ႈတႃႇၶၵ်ႉၵၢၼ်လွင်ႈငမ်းယဵၼ်ၼႂ်းမိူင်းႁူမ်ႈတုမ် ဢွၼ်တၢင်းတေၸတ်းႁဵတ်း ပၢင်ၵုမ်လူင်ဢႃႇသီႇယၼ်ႇ ဢၼ်တေမီးၼႂ်းလိူၼ်ၼႃႈ November 2022 ၼႆႉ ဝႃႈၼႆ။

ယွၼ်ႉပိူဝ်ႈၸုမ်းသိုၵ်းမၢၼ်ႈယိုတ်းမိူင်း ဢမ်ႇႁဵတ်းၸွမ်းၶေႃႈလႆႈၸႂ်ႁူမ်ႈၵၼ် ဢၼ်ဝႃႈ ႁႂ်ႈဢုပ်ႇဢူဝ်းၸွမ်း ၽၢႆႇသၢၼ်ၶတ်း လႄႈ ၵိုတ်းယိုတ်းလွင်ႈပိုတ်းယိုဝ်းၵၼ် ၼႆၸိူဝ်းၼၼ်ႉလႄႈ ၸုမ်းဢႃႇသီႇယၼ်ႇၵေႃႈ ၶႂ်ႈသဵင်ႈၸႂ်မႃးလွႆးလွႆးယဝ်ႉ ဝႃႈၼႆ။
Saifuddin Abdullah ၽွင်းလူင်ၽၢႆႇၼွၵ်ႈမိူင်းမလေးသျႃး လၢတ်ႈၵႂႃႇမိူဝ်ႈလိူၼ်ပူၼ်ႉမႃး ၼၼ်ႉဝႃႈ တေသိုပ်ႇယိပ်းၵမ်ၵႂႃႇ ၶေႃႈလႆႈၸႂ်ၸိူဝ်းၼၼ်ႉၼႄႇ ဢမ်ႇၼၼ် လႅၵ်ႈလၢႆႈ လွၵ်းလၢႆးမႂ်ႇၼႄႇ ဢၼ်ဝႃႈၼၼ်ႉ ၼႂ်းပၢင်ၵုမ်လူင်ဢႃႇသီႇယၼ်ႇ ဢၼ်တေၸတ်းႁဵတ်းၵႂႃႇၼႂ်းလိူၼ် November 2022 ၼႆႉ လူဝ်ႇလႆႈတႅပ်းတတ်းပၼ်ယူႇ ၼႆယဝ်ႉ။

တႆးလွတ်ႈလႅဝ်း
Source: Reuters