ပၢင်ပွႆးႁပ်ႉတွၼ်ႈ ပီႊမႂ်ႇတႆး 2117 ၼီႈ တီႈငဝ်ႈၸိုင်ႈ လွႆတႆးလႅင်း

ၸွမ်းၼင်ႇ ၾိင်ႈထုင်းတႆးႁဝ်းၶႃႈမီးၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်းပၢင်ၵိၼ်ၶဝ်ႈႁူမ်ႈမူႇသေ သူင်ႇသင်ႇပီႊၵဝ်ႇ ႁပ်ႉတွၼ်ႈပီႊမႂ်ႇတႆး 2117 ၼီႈ တီႈငဝ်ႈၸိုင်ႈ လွႆတႆးလႅင်း ၵႂႃႇယူႇယဝ်ႉ။

မိူဝ်ႈဝၼ်းထီႉ 22 November 20022 (ဝၼ်းလိူၼ်သိပ်းသွင်လပ်း ပီႊတႆး 2116 ၼီႈ) ၶၢဝ်းယၢမ်း 17:00 မူင်းၼၼ်ႉ ၸဝ်ႈသိုၵ်းလူင် ၶိူဝ်းလၢဝ် ၽူႈၸတ်းၵၢၼ် ႁွင်ႈၵၢၼ်လူင်ဢုပ်ႉပိူင်ႇငဝ်ႈၸိုင်ႈ လႆႈဢွၼ်ႁူဝ်ပိုတ်ႇပၢင်ၵိၼ်ၶဝ်ႈႁူမ်ႈမူႇသေ ၽူႈယႂ်ႇၵူၼ်းလူင်လႄႈ ပေႃႈမႄႈၵူၼ်းမိူင်း ဢိၵ်ႇ ၵေႃႉသိုၵ်းၵေႃႉႁၢၼ် ၵိၼ်ၶဝ်ႈႁူမ်ႈမူႇ သူင်ႇသင်ႇပီႊၵဝ်ႇ 2116၊ ႁပ်ႉတွၼ်ႈပီႊမႂ်ႇတႆး 2117 ၼီႈ တီႈပၢင်ႇသိူဝ်လၢႆး ငဝ်ႈၸိုင်ႈလွႆတႆးလႅင်း လိူဝ်ၼၼ်ႉ ၽူႈမီးၼမ်ႉၸႂ်ၸေႇတၼႃႇ ႁဝ်းၶဝ် လႆႈမႃးၸႃႇၵ ၶူဝ်းၼုင်ႈတၢင်းဝႆ လႄႈ ၶဝ်ႈတေႃႇၶဝ်ႈတႅၼ် မိူၼ်ၵၼ် ဝႃႈၼႆ။

ထိုင်မႃး ၶၢဝ်းယၢမ်း 23:50 မူင်းၼၼ်ႉ ၸဝ်ႈသိုၵ်းလူင် ၶိူဝ်းလၢဝ် ၸပ်းတဵၼ်းယွၼ်းသူးသူင်ႇသင်ႇပီႊၵဝ်ႇ 2116 ၼီႈ ဝၢႆးၼၼ်ႉ သိုပ်ႇၸပ်းတဵၼ်း ယွၼ်းသူး ႁပ်ႉၸဵင်ပီႊမႂ်ႇတႆး 2117 ၼီႈ။ လိူဝ်ၼၼ်ႉ ယင်းမီး ၸဝ်ႈႁၢၼ် ယွတ်ႈၶမ်း လႆႈဢဝ်တၢင်းၵႂၢမ်းၽၢၵ်ႇတွၼ်ႈ ပီႊမႂ်ႇတႆး 2117 ၼီႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS မႃးလူဢၢၼ်ႇၼႄၵႂႃႇပႃး ဝႃႈၼႆ။

ထိုင်မႃးဝၼ်းထီႉ 23 November 2022 (လိူၼ်ၸဵင်မႂ်ႇ 1 ၶမ်ႈ ပီႊတႆး 2117 ၼီႈ) ၶၢဝ်းယၢမ်း 07:00 မူင်း ၼၼ်ႉ ၽူႈယႂ်ႇၵူၼ်းလူင် ပေႃႈမႄႈၵူၼ်းမိူင်း ဢိၵ်ႇၵေႃႉသိုၵ်းၵေႃႉႁၢၼ် ၵၢပ်ႈသွမ်းၼႂ် လူႇတၢၼ်းၶဝ်ႈမႂ်ႇၼမ်ႉမႂ်ႇၵႂႃႇ တမ်ႈတီႈသင်ႇၶၸဝ်ႈ ဝတ်ႉလႅင်းႁၢၼ်တႆး ၵႂႃႇယူႇယဝ်ႉ။

တီႈငဝ်ႈၸိုင်ႈလွႆတႆးလႅင်းၼႆႉ ၸွမ်းၼင်ႇ ၶိင်ႇလႂ်ၶၢဝ်းၼၼ်ႉ လႆႈၸတ်းႁဵတ်းပၢင်ပွႆး ၸွမ်းၾိင်ႈငႄႈၾိင်ႈထုင်းမႃးတႃႇသေႇ မိူၼ်ၼင်ႇ ပွႆးပီႊမႂ်ႇတႆး၊ ပွႆးဝၼ်းၸိူဝ်ႉၸၢတ်ႈ၊ ပွႆးသွၼ်းၼမ်ႉ၊ ပွႆးဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်း ၸိုင်ႈတႆး လႄႈ ပွႆးၶဝ်ႈဝႃႇ ဢွၵ်ႇဝႃႇ ၸိူဝ်းၼႆႉ ဝႃႈၼႆသေတႃႉ ဢိင်ၼိူဝ်ငဝ်းလၢႆး လွင်ႈၽႄႈလၢမ်းတၢင်းပဵၼ် COVID-19 သေ ဢမ်ႇလႆႈႁဵတ်းပၢင်ပွႆးယႂ်ႇလူင်ၵိုၼ်းၶွၼ်ႈ မိူၼ်လၢႆလၢႆပီႊပူၼ်ႉမႃး ၼႆယဝ်ႉ။

တႆးလွတ်ႈလႅဝ်း