ၵူဝ်းရီးယႃးႁွင်ႇလၢတ်ႈ ဢွင်ႇမၢၼ်ယဝ်ႉ မၢၵ်ႇမိတ်ႉသႆး ႁူဝ်တိုၵ်း 4.5 တၢၼ်ႇ

မိူဝ်ႈဝၼ်းထီႉ 1 July 2024 (လိူၼ်ၸဵတ်းလွင်ႈ 10 ၶမ်ႈ ပီႊတႆး 2118 ၼီႈ) ၵူဝ်းရီးယႃးႁွင်ႇ ဢွၵ်ႇမႃးလၢတ်ႈဝႃႈ မၢၵ်ႇမိတ်ႉသႆးပွႆႇတူဝ် ဢၼ်ႁဵတ်းဢွၵ်ႇမႂ်ႇ မီးၼမ်ႉၵတ်ႉတေႃႉတၢင်ႇလႆႈႁူဝ်တိုၵ်း 4.5 တၢၼ်ႇ ၼၼ်ႉ ပဵၼ်ဢၼ်ဢွင်ႇမၢၼ်ၵႂႃႇယဝ်ႉ ဝႃႈၼႆ။

သိုဝ်ႇၶၢဝ်ႇၵူဝ်းရီးယႃးႁွင်ႇ ဢွၵ်ႇဝႆႉဝႃႈ ၵၢၼ်ၸၢမ်းမၢၵ်ႇမိတ်ႉသႆးပွႆႇတူဝ်ဢၼ်မႂ်ႇၼႆႉ မီးၸိုဝ်ႈဝႃႈ Hawasongpho-11 Da-4.5 လႄႈ လႆႈႁဵတ်းၵၢၼ် ႁူမ်ႈတင်းႁူဝ်တိုၵ်းပွမ်ဢၼ်မိူၼ်တႄႉ တႃႇၸၢမ်းတူၺ်း ၼမ်ႉၵတ်ႉၵၢၼ်မိၼ် လႄႈလွင်ႈမႅၼ်ႈယမ်။ ယဝ်ႉၵေႃႈ တေမီးလွင်ႈၸၢမ်းမၢၵ်ႇမိတ်ႉသႆး သႅၼ်းလႅဝ်ၵၼ်ၼႆႉထႅင်ႈ ၼႂ်းလိူၼ် July 2024 ၼႆႉ တႃႇၸၢမ်းတူၺ်း ႁႅင်းမၢၵ်ႇတႅၵ်ႇၶွင် ႁူဝ်တိုၵ်းလူင်ၼၼ်ႉ ဝႃႈၼႆ။

ၼႂ်းဝၼ်းလဵဝ်ၵၼ်ၵူၺ်း တပ်ႉသိုၵ်းၵူဝ်းရီးယႃးၸၢၼ်း ဢွၵ်ႇမႃးလၢတ်ႈဝႃႈ ၵူဝ်းလီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆး 2 လုၵ်ႈ လုၵ်ႈၼိုင်ႈ မိူၼ်ဝႃႈတေပဵၼ် KN-23 ယိုဝ်းၵႂႃႇလႆႈမွၵ်ႈ 600 ၵီႇလူဝ်ႇမီႇတိူဝ်ႇ၊ ထႅင်ႈလုၵ်ႈၼိုင်ႈ ယိုဝ်းၵႂႃႇလႆႈ မွၵ်ႈ 120 ၵီႇလူဝ်ႇမီႇတိူဝ်ႇၼႆႉ ဝႃႈၼႆ။

Hwasongpho-11 ဢမ်ႇၼၼ် Hwasong-11 ၼၼ်ႉ လႆႈဝႃႈပဵၼ်မၢၵ်ႇမိတ်ႉသႆးပွႆႇတူဝ်ယိုဝ်းၵႆ ဢၼ်ႁဵတ်းဢွၵ်ႇမႃးလူၺ်ႈၵူဝ်းရီးယႃးႁွင်ႇလႄႈ ႁူႉၸၵ်းၵၼ်ထႅင်ႈၼႂ်းၸိုဝ်ႈ KN-23 လႄႈ KN-24 ၼႆယူႇ၊ မိူၼ်ဝႃႈ KN-32 ၼၼ်ႉ တေပဵၼ်မၢၵ်ႇမိတ်ႉသႆး ဢၼ်ၵူဝ်းရီးယႃးႁွင်ႇ ၸတ်းႁႃပၼ်ရၢတ်ႉသျႃး တွၼ်ႈတႃႇပၢင်တိုၵ်းၼႂ်းယူႇၶရဵၼ်း လႆႈဢၢင်ႈဢိင်မႃးတီႈ ၽူႈမီးပုၼ်ႈၽွၼ်းယူႇၶရဵၼ်း လႆႈၵူတ်ႇထတ်းတူၺ်း ၸၢၵ်ႇမၢၵ်ႇမိတ်ႉသႆး ဢၼ်ရၢတ်ႉသျႃးယိုဝ်း ၸဵမ်မိူဝ်ႈၼႂ်းလိူၼ် December 2023 ၼၼ်ႉမႃး ၼႆယဝ်ႉ။

တႆးလွတ်ႈလႅဝ်း