ပၢင်တိုၵ်း Operation 1027 ပွၵ်ႈၵမ်း (2) လႄႈၽွၼ်းတုမ်ႉယွၼ်ႈၵူၼ်းမိူင်း

ပၢင်တိုၵ်းဢၼ်လႆႈပဵၼ်ၵႂႃႇၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ ၵျွၵ်ႉမႄး၊ သီႇပေႃႉ၊ ၼွင်ၶဵဝ် လႄႈမိူင်းၵုတ်ႈၸိူဝ်းၼႆႉ ႁိၵ်ႈႁွင်ႉဝႃႈ Operation 1027−Part(2) ၼႆယဝ်ႉ မိူဝ်ႈပွၵ်ႈၵမ်း (1) ၼၼ်ႉ ၸုမ်းသိုၵ်းဢူၺ်းလီသၢမ်ၸုမ်း မိူၼ်ၼင်ႇ သိုၵ်းပလွင်ႈ TNLA ၊ သိုၵ်းၵူဝ်းၵၢင်ႉ MNDAA လႄႈသိုၵ်းရၶႅင်ႇ AA ႁူမ်ႈၵၼ်ပိုတ်ႇၼႃႈသိုၵ်းၸွမ်းၵၼ် ဝႃႈၼႆသေတႃႉ ပုၼ်ႈတႃႇပွၵ်ႈၵမ်း (2) ၼႆႉတႄႉ လႆႈႁၼ်ပဵၼ်ဝႆႉလၢႆးၼိုင်ႈ မိူၼ်ၼင်ႇသိုၵ်း TNLA ၶဝ်သမ်ႉႁူမ်ႈတင်း MDY-PDF (တပ်ႉၵႅတ်ႇၶႄၵူၼ်းမိူင်းဝဵင်းလိူဝ်ႇ) ၶဝ်သေ ပိုတ်ႇပၢင်တိုၵ်း၊ မိူၼ်ၼင်ႇ သိုၵ်းၵူဝ်းၵၢင်ႉ MNDAA ၵေႃႈ ႁူမ်ႈတင်းၸုမ်းလုၵ်ႉၽိုၼ်ႉမၢင်ၸုမ်းသေ ပိုတ်ႇပၢင်ႇတိုၵ်းဝႆႉယူႇ ပွတ်းဝဵင်းလႃႈသဵဝ်ႈ။

သင်တေလၢမ်းၶၢတ်ႈတူၺ်းဝႃႈ ယွၼ်ႉသင်ပၢင်တိုၵ်းပွၵ်ႈၼႆႉ မိူၼ်ပဵၼ်ဝႆႉၸုမ်းၽႂ်ၸုမ်းမၼ်း သိုၵ်း TNLA ၵေႃႈ မိူၼ်ဢမ်ႇလႅပ်ႈႁွင်ႉသိုၵ်းၵူဝ်းၵၢင်ႉ MNDAA လႄႈတၢင်ႇၸုမ်းၶဝ်ႈႁူမ်ႈၸွမ်း ပွတ်းၵျွၵ်ႉမႄး၊ ၼွင်ၶဵဝ်၊ မိူင်းၵုတ်ႈၼႆၼၼ်ႉ ႁဝ်းလူဝ်ႇတူၺ်းၶိုၼ်းဝႃႈ မိူဝ်ႈပၢင်တိုၵ်းပွၵ်ႈၵမ်း (1) ယဝ်ႉၵႂႃႇၼၼ်ႉ ၵဵဝ်ႇလူၺ်ႈလွင်ႈၼႃႈတီႈသေ ၸုမ်းဢူၺ်းလီၶဝ်ၼင်ႇၵၼ် ၶိုၼ်းမီးလွင်ႈပတိၵ်ႈၶၢတ်ႈ ပၼ်ႁႃတေႃႇၵၼ်သေ ယၢမ်ႈလႆႈၽိတ်းမေႃးထဵင်ၵၼ်ၶိုၼ်း ယွၼ်ႉၼၼ်သေ ပၢင်တိုၵ်းပွၵ်ႈၼႆႉ တႃႇတေသိမ်းဝဵင်း ဝဵင်းလႂ်ဝဵင်းၼိုင်ႈၼၼ်ႉ ၸင်ႇယူႇတီႈၽႅၼ်ၵၢၼ်ၸုမ်းၽႂ်ၸုမ်းမၼ်းသေ ပိုတ်ႇပၢင်တိုၵ်းၵႂႃႇ၊ ၵူၺ်းဝႃႈၼၼ်သေတႃႉ ၸွမ်းၼွၵ်ႈမၼ်းမၢင်ပိုၼ်ႉတီႈၵေႃႈ တီႈၶဝ်ႁူမ်ႈၵၼ်ပိုတ်ႇပၢင်တိုၵ်းၵေႃႈသမ်ႉလႆႈႁၼ်မီးယူႇ။ မိူဝ်ႈတႄႇပိုတ်ႇပၢင်တိုၵ်းၼၼ်ႉ ယင်းလႆႈႁၼ်သိုၵ်း TNLA ၶဝ် ၸႂ်ႉၸိုဝ်ႈၽႅၼ်ၵၢၼ်ၶဝ်ဝႃႈ Operation 0625 ၼႆယူႇၵႅပ်ႉၵမ်းၼိုင်ႈ ၵူၺ်းၵမ်းလိုၼ်းႁဵတ်းႁိုဝ်သေ ၶိုၼ်းလႅၵ်ႈပဵၼ်ၵႂႃႇ Operation 1027−Part(2) ၼႆၼၼ်တႄႉ ဢမ်ႇလႆႈႁူႉၸွမ်း။

ပၢင်တိုၵ်းပွၵ်ႈၼႆႉ ယူႇတီႈသိုၵ်းပလွင်ႈ TNLA ႁူမ်ႈပႃး MDY-PDF တႄႇပိုတ်ႇၼႃႈသိုၵ်းႁၢဝ်ႈႁႅင်း မိူဝ်ႈၼႂ်းဝၼ်းထီႉ 25 June 2024 သေ ၼႃႈသိုၵ်းပိုတ်ႇယူႇ 3 ၸႄႈဝဵင်း မိူၼ်ၼင်ႇ ၵျွၵ်ႉမႄး၊ ၼွင်ၶဵဝ် လႄႈ မိူင်းၵုတ်ႈ ၸိူဝ်းၼႆႉသေ ၼႂ်းဝၼ်းၼၼ်ႉၵူၺ်း သိမ်းလႆႈႁူင်းပလိၵ်ႈသိုၵ်းမၢၼ်ႈ လႄႈလုမ်းဢုပ်ႉပိူင်ႇသိုၵ်းမၢၼ်ႈ ဢိၵ်ႇပႃးႁူင်းယႃ ဢၼ်မီးတီႈၼႂ်းဝဵင်းၼွင်ၶဵဝ်ၼၼ်ႉယဝ်ႉ၊ တေႃႈၼင်ႇၼၼ် ဢၼ်ပဵၼ်တပ်ႉသိုၵ်းမၢၼ်ႈ ၸၵၶ မၢႆ−1  တပ်ႉၵွင်(ၶမယ) 501 ၊ ( ၶမယ) 502 ၸိူဝ်းဢၼ်ပၵ်းဝႆႉတီႈ ဝဵင်းၵျွၵ်ႉမႄးၼၼ်ႉၵေႃႈ ထုၵ်ႇၶဝ်ႈတိုၵ်းႁၢဝ်ႈႁႅင်းမိူၼ်ၵၼ်သေ ၼႂ်းဝၼ်းႁႅၵ်ႈပၢင်တိုၵ်းၼၼ်ႉၵူၺ်း မီးၵူၼ်းမိူင်းလႆႈတၢင်းမၢတ်ႇၸဵပ်း လူႉတၢႆၸွမ်း ဢမ်ႇတႅမ်ႇၵႂႃႇ 5 ၵေႃႉ လႆႈႁူႉၼင်ႇၼႆ။

ထိုင်ၼႂ်းဝၼ်းထီႉ 26 June 2024 ယၢမ်းဝၢႆးဝၼ်း 2 မူင်းၼၼ်ႉ ၸုမ်းသိုၵ်းပလွင်ႈTNLA ၶဝ်တိုၵ်းသိမ်းဢဝ်လႆႈ ႁူင်းပလိၵ်ႈႁၢၼ် လႄႈ လုမ်းၶႃႈႁၢပ်ႇၵၢၼ်ၶုၼ် တီႈဝဵင်းၵျွၵ်ႉမႄး ဢၼ်ယူႇၼႂ်ႈဢုပ်ႉပိူင်ႇၶွင်သိုၵ်းမၢၼ်ႈဝႆႉၼၼ်ႉလႄႈ ဢိၵ်ႇပႃးသိမ်းလႆႈတပ်ႉၶိူင်ႈလူင်သိုၵ်းမၢၼ်ႈၸိူဝ်းၼႆႉယူႇ ပၢင်တိုၵ်းပဵၼ်ထိုင်ၼႂ်းဝၼ်းထီႉ 27−28 June 2024 ၸိူဝ်းၼႆႉသေ သိုၵ်းပလွင်ႈ TNLA ၶဝ် ၸင်ႇၶဝ်ႈၵုမ်းၵမ်ထိုင်လႆႈပိုၼ်ႉတီႈဝဵင်းၵျွၵ်ႉမႄးသေ ပိုၼ်ၽၢဝ်ႇဢဝ်ဝဵင်းၵျွၵ်ႉမႄးၼႆႉ ၶဝ်ႈၼႂ်းၵၢၼ်ဢုပ်ႉပိူင်ႇၶဝ်ႇသေ ၸင်ႇမၵ်းမၼ်ႈယူႇပဵၼ်ၵႂႃႇၽၢႆႇတႂ်ႈ ၸႄႈတွၼ်ႈၼမ်ႉသၼ်ႇ ၼႆယဝ်ႉ။ ပၢင်တိုၵ်းၼႆႉ ပဵၼ်ၶၢဝ်းတၢင်း 5 ဝၼ်းသေတႃႉ ၼႂ်းဝၼ်းထီႉ 29−30 June 2024 ၼၼ်ႉ သိုၵ်းမၢၼ်ႈ တပ်ႉပႆလိၼ် တီႈဝဵင်းၵျွၵ်ႉမႄးဢၼ်တိုၵ်ႉတေႃႇသူႈသိုၵ်းလွႆၼၼ်ႉ ဢမ်ႇမီးယဝ်ႉ ၵူၺ်းမီးတပ်ႉၵၢင်ႁၢဝ်သိုၵ်းမၢၼ်ႈဢၼ်လုၵ်ႉတၢင်ႇတီႈသေ မႃးပွႆႇမၢၵ်ႇၵူၺ်း။

လႆႈႁၼ်သိုၵ်းပလွင်ႈ TNLA ပိုၼ်ၽၢဝ်ႇဝႆႉၼၼ်ႉတႄႉ ပၢင်တိုၵ်းၶၢဝ်းတၢင်း 5 ဝၼ်းၼႆႉ သိမ်းလႆႈတပ်ႉမၢၼ်ႈ 30 ပၢႆ ဢၼ်မီးၼႂ်းၸႄႈဝဵင်း ၼွင်ၶဵဝ်၊ သီႇပေႃႉ၊ ၵျွၵ်ႉ​မႄး၊ မိူင်းၵုတ်ႈ၊ မိူင်းမိတ်ႈ ၸိူဝ်းၼႆႉလႄႈ မီးသိုၵ်းမၢၼ်ႈ 53 ၵေႃႉ ပႃးၸဵမ်ၽူႈမီးၸၼ်ႉသုင် မိူၼ်ၼင်ႇ ၸၼ်ႉၸဝ်ႈႁၢၼ် (4)ၵေႃႉ၊ ၽူႈၵွၼ်းပလိၵ်ႈႁၢၼ် (1)ၵေႃႉ၊ ၸၼ်ႉႁူဝ်သိုၵ်းလူင် (6)ၵေႃႉ၊ ၸဝ်ႈၼႃႈတီႈပလိၵ်ႈ(ၵုမ်းထိင်းလူတ်ႉၵႃး) ၸၼ်ႉႁူဝ်သိုၵ်း (1)ၵေႃႉ၊ ၸၼ်ႉႁူဝ်သိုၵ်း (11)  ၸၼ်ႉႁူဝ်ႁၢၼ် (9)​ၵေႃႉ၊ လုၵ်ႈတပ်ႉပလိၵ်ႈႁၢၼ် (1)ၵေႃႉလႄႈ ၵူၼ်းသိုၵ်း 19 ၵေႃႉၸိူဝ်းၼႆႉ ယွမ်းသိုၵ်း ဝၢင်းၶိူင်ႈၵွင်ႈၵၢင်ႇပၼ် TNLA ၶဝ်ၼႆယဝ်ႉ။

ယွၼ်ႉသင်လႄႈပဵၼ်မႃးပၢင်တိုၵ်းထႅင်ႈ

ပၢင်တိုၵ်းၼႂ်းမိူင်းတႆးပွတ်းႁွင်ႇ ဢၼ်ပဵၼ်ပူၼ်ႉမႃးၼၼ်ႉ ယွၼ်ႉမိူင်းၶႄႇယူႇပဵၼ်ၵၢင်သေ တိုၵ်းသူၼ်းႁႂ်ႈသွင်ၽၢႆႇဢုပ်ႇဢူဝ်းၵၼ်လႄႈၸင်ႇယဵၼ်ၵႂႃႇ ၵူၺ်းဝႃႈၼႆသေတႃႉ ပၢင်းတိုၵ်းပွၵ်ႈၵမ်းၼႆႉသမ်ႉ ႁၼ်ၽၢႆႇတၢင်းသိုၵ်းမၢၼ်ႈၵၢဝ်ႇၼႄးဝႃႈ ယွၼ်ႉမိူင်းၶႄႇသေပၢင်တိုၵ်းၸင်ႇၵိူတ်ႇၶိုၼ်ႈပဵၼ်မႃးဝႃႈၼႆ။ သိုဝ်ႇၶၢဝ်ႇဢၼ်ယူႇၽၢႆႇသိုၵ်းမၢၼ်ႈၼၼ်ႉ တႅမ်ႈမွၵ်ႇဝႆႉဝႃႈ “မိူဝ်ႈပူၼ်ႉမႃး ၼႂ်းဝၼ်းထီႉ 18 June 2024 ၼၼ်ႉ ယူႇတီႈၽွင်းတၢင်မိူင်းၶႄႇ တဵင်ႉသျီႊၵျုၼ်း မႃးတီႈဝဵင်းလူင်ၼႄႇပျီႇတေႃႇသေ မႃးႁူပ်ႉထူပ်းတင်းၽွင်းလူင်ၽၢႆႇၼွၵ်ႈမိူင်း ၼႂ်းသိုၵ်းမၢၼ်ႈလႄႈ မီးၶေႃႈတုၵ်းယွၼ်းမၢင်မဵဝ်း ၵူၺ်းၵႃႈၽၢႆႇတၢင်းၼႄႇပျီႇတေႃႇ ဢမ်ႇယွမ်းတူၵ်းလူင်းသေ သမ်ႉပၢၵ်ႈပႅတ်ႈလႄႈ မိူင်းၶႄႇဢမ်ႇပဵင်းပေႃးၸႂ်သေ ၸင်ႇသူၼ်းၾႆးႁႂ်ႈပဵၼ်မႃးပၢင်တိုၵ်း” ၼႆၵေႃႈဝႃႈ။

ၵူၺ်းၽၢႆႇတၢင်းသိုၵ်းဢူၺ်းလီၶဝ်တႄႉလၢတ်ႈဝႃႈ ၵွပ်ႈသိုၵ်းမၢၼ်ႈယိုတ်းမိူင်း ပူၼ်ႉပႅၼ်ၶေႃႈတူၵ်းလူင်း ဢၼ်သွင်ၽၢႆႇၵိုတ်းတိုၵ်းၵၼ်ဝႆၼၼ်ႉ သေဢမ်ႇၵႃး မီးလွင်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ ၸွမ်းပိုၼ်ႉတီႈဢၼ်ၵူၼ်းမိူင်း လႄႈၸုမ်းသိုၵ်းဢူၺ်းလီၶဝ် ဢမ်ႇထၢတ်ႇဢမ်ႇဝၢႆးလႄႈ ပၢင်တိုၵ်းၸင်ႇလႆႈၵိူတ်ႇၶိုၼ်ႈပဵၼ်မႃးထႅင်ႈ ၼႆယဝ်။

ၽၢႆႇတၢင်းၵူၼ်းမိူင်းသမ်ႉ ထတ်းသၢင်ဝႃႈ “ဢၼ်ၸုမ်းဢူၺ်းလီပွတ်းႁွင်ႇၶဝ် ၶိုၼ်းပိုတ်ႇပၢင်တိုၵ်းၼႆႉ ယွၼ်ႉၶႂ်ႈလႆႈပိုၼ်ႉတီႈထႅင်ႈလႄႈပိုတ်ႇပၢင်တိုၵ်းၵူၺ်း ဢၼ်သွင်ၽၢႆႇၵိုတ်းတိုၵ်းဢုပ်ႇၵၼ်ၼၼ်ႉၵေႃႈ ပုၼ်ႈတႃႇၸုမ်းဢူၺ်းလီၶဝ်တႄႉ ပဵၼ်ၶၢဝ်းယၢမ်းႁၢင်ႈႁႅၼ်းၽႅၼ်ၵၢၼ်သိုၵ်းမႂ်ႇ ဢမ်ႇၼၼ် လိုဝ်ႈႁိူဝ်ႉပၼ်ၵူၼ်းသိုၵ်းၶဝ်ၵူၺ်း ၵွပ်ႈၶဝ်ယၢမ်ႈတိုၵ်းလႆႈပဵၼ်ဝဵင်းပဵၼ်ဝဵင်းယဝ်ႉလႄႈ ပုၼ်ႈတႃႇၸႄႈဝဵင်းဢၼ်ၵိုတ်းလိူဝ်ၸိူဝ်းၼၼ်ႉၵေႃႈ ၶဝ်တိုၼ်းၶႂ်ႈလႆႈမိူၼ်ၵၼ် သင်ၶဝ်ဢမ်ႇပႆႇမီးလွင်ႈသုမ်းယႂ်ႇသုမ်းလူင်သေပွၵ်ႈၼိုင်ႈၸိုင် ၶဝ်တိုၼ်းပႆႇၵိုတ်းလႆႈ” ၽူႈလူင်ႉလႅၼ်ႇၵၢၼ်မိူင်းပွတ်းႁွင်ႇၵေႃႉၼိုင်ႈ ထတ်းသၢင်ဝႆႉၼင်ႇၼႆ။

ၽွၼ်းတုမ်ႉယွၼ်ႈၵူၼ်းမိူင်းတႆး

ပဵၼ်ၸိူင်ႉႁိုဝ်ၵေႃႈယဝ်ႉ ပၢင်တိုၵ်းဢၼ်ပဵၼ်ၵႂႃႇၼႆႉ မီးၽွၼ်းလီတႃႇပိူၼ်ႈၵေႃႈ ပုၼ်ႈတႃႇၵူၼ်းမိူင်းတႄႉ ႁူႉတိုၼ်းမီးလွင်ႈတုမ်ႉတိူဝ်ႉယူႇယဝ်ႉ။ ယွၼ်ႉပၢင်တိုၵ်းသေ ၵူၼ်းမိူင်းၸိူဝ်းဢမ်ႇမီးတၢင်းၽိတ်းသင် လႆႈလူႉတၢႆယွၼ်ႉမၼ်း၊ လႆႈမၢတ်ႇၸဵပ်းယွၼ်ႉမၼ်း၊ လႆႈပၢႆႈၽေးယွၼ်ႉမၼ်း၊ လႆႈလူႉသုမ်းႁိူၼ်းယေး တီႈယူႇတၼ်းသဝ်း တိူၵ်ႇႁႆႈလွၵ်းၼႃး ဝတ်ႉဝႃးၽႃသိူဝ်ႇၵႂႃႇၸိူဝ်းၼၼ်ႉ ၵမ်းလိုၼ်းၵေႃႈ ဢမ်ႇမီးၸုမ်းလႂ် ၶိုၼ်းဢဝ်ပုၼ်ႈၽွၼ်းၸွႆႈထႅမ်ပၼ်ၶိုၼ်း။ ယွၼ်ႉၼၼ်လႄႈ ပၢင်တိုၵ်းပၢင်လႂ်ၵေႃႈ ဢၼ်ၼႃႇၼႆႉ ပဵၼ်ၵူၼ်းမိူင်းတႃလမ်လမ်ဢွၼ်ႇ ၸိူဝ်းယူႇၼႂ်းပိုၼ်ႉတီႈၼၼ်ႉယဝ်ႉ။

ပၢင်တိုၵ်းဢၼ်လႆႈပဵၼ်ၵႂႃႇၼႂ်း 5 ၸေႊဝဵင်း မိူၼ်ၼင်ႇၸႄႈဝဵင်းၵျွၵ်ႉမႄး၊ ၸႄႈဝဵင်းၼွင်ၶဵဝ်၊ ၸႄႈဝဵင်းမိူင်းမိတ်ႈ၊ ၸႄႈဝဵင်းသီႇပေႃႉ လႄႈၸႄႈဝဵင်းမိူင်းၵုတ်ႈ ၶၢဝ်းတၢင်း (5) ဝၼ်း တႄႇဢဝ်ဝၼ်းထီႉ 25−30 June 2024  ၼၼ်ႉ ၵူၼ်းမိူင်း ၸဵမ်လုၵ်ႈဢွၼ်ႇၵူၼ်းလူင် လူႉတၢႆယွၼ်ႉပၢင်တိုၵ်းမွၵ်ႈ 30 ပၢႆ ဢၼ်မၢတ်ႇၸဵပ်းၵေႃႈ ဢမ်ႇယွမ်း 30 ပၢႆမိူၼ်ၵၼ် ၼႆယဝ်ႉ။ တေႃႈၼင်ႇၼၼ်ၵူၺ်း မိူဝ်ႈၼႂ်းဝၼ်းထီႉ 01 June 2024 ယၢမ်းႁူဝ်ၶမ်ႈ 16:00 မူင်းပၢႆ မီးမၢၵ်ႇလူင်တူၵ်းၼႂ်းဝၢၼ်ႈၸၢမ်ႇၽိူၵ်ႇ ၸႄႈဝဵင်းသီႇပေႃႉလႄႈ တိူဝ့်ၺႃးၵူၼ်းဝၢၼ်ႈ 5 ၵေႃႉ လႆႈမၢတ်ႇၸဵပ်းၸွမ်းမိူၼ်ၵၼ်။

တီႈၼႂ်းၸႄႈဝဵင်းလႃႈသဵဝ်ႈၵေႃႈ တေႃႈၼင်ႇၼၼ် တင်ႈတႄႇၼႂ်းဝၼ်းထီႉ 29 June – 04 July 2024 ၼႆႉ ၸုမ်းသိုၵ်းၵူဝ်းၵၢင်ႉ MNDAA ၶဝ်ႈတိုၵ်းၼႂ်းၸႄႈဝဵင်းလႃႈသဵဝ်ႈလႄႈ မီးၵူၼ်းမိူင်းလႆႈလူႉတၢႆမၢတ်ႇၸဵပ်းၸွမ်းတင်းၼမ် သေဢမ်ႇၵႃး ဢၼ်လႆႈပၢႆၽေးၵႂႃႇတၢင်ႇတီႈၵေႃႈမီးတင်းၼမ်။ ပၢင်တိုၵ်းတီႈၼႂ်းၸႄႈဝဵင်းလႃႈသဵဝ်ႈၼႆႉ တေလႆႈဝႃႈပဵၼ်ၵူႈၽၢႆႇသေ ပုၼ်ႈတႃႉၵူၼ်းမိူင်းၸိူဝ်းယူႇၼႂ်းဝဵင်းတႄႉ ဢမ်ႇၸၢင်ႈပၢႆႈၵႂႃႇလႂ် ၵွပ်ႈသိုၵ်းမၢၼ်ႈၶဝ်ပိၵ်ႉဝႆႉၵူႈၽၢႆႇ ၸွမ်းတၢင်းၶဝ်ႈဢွၵ်ႇဝဵင်းလႃႈသဵဝ်ႈ ၼႆယဝ်ႉ၊ ပၢင်တိုၵ်းဢၼ်ပဵၼ်ယူႇၼႆႉ လၢမ်းၸမ်ထိုင်ၼႂ်းၸႄႈဝဵင်းမိူင်းယႆၸိူဝ်းၼႆႉ ယူႇယဝ်ႉ။

ယွၼ်ႉၼၼ်လႄႈ ပၢင်တိုၵ်းၵိူတ်ႇၶိုၼ်ႈပဵၼ်မႃးမိူဝ်ႈလႂ်ၵေႃႈ ဢၼ်တုမ်ႉယွၼ်ႈႁႅင်းၼႆႉ ဢမ်ႇၸႂ်ႈသိုၵ်းၸုမ်းလႂ် ၵွပ်ႈသိုၵ်းၼႆႉ မီးၵွင်ႈၵၢင်ႇၼင်ႇၵၼ် ၵူၺ်းၵူၼ်းမိူင်းၸိူဝ်းဢမ်ႇမီးတၢင်းၽိတ်းသင်တႄႉ လႆႈလူႉႁၢႆတၢႆယွၼ်ႉမၼ်းတင်းၼမ်ယဝ်ႉ၊ ပေႃးမႃးတူၺ်းၶၢဝ်းၼႆႉၸိုင် မႅၼ်ႈၽွင်းၶၢဝ်းၵၢၼ်ငၢၼ်းလိူင်ႇ ၶၢဝ်းႁႆႈၶၢဝ်းၼႃးယဝ်ႉ ၸုမ်းသိုၵ်းၶဝ်သမ်ႉမႃးပဵၼ်ပၢင်တိုၵ်းၵၼ်ၼင်ႇၼႆသေ ပဵၼ်လွင်ႈတုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉၵူၼ်းမိူင်းယူႇယဝ်ႉ။ ၵမ်းလိုၼ်းၼႆႉ ယွၼ်းသူင်ႇၵႂၢမ်းယွၼ်းသူးထိုင် ၵူၼ်းမိူင်းၸိူဝ်းလႆႈၶၢမ်ႇတၢမ်ႇသိုၵ်းသိူဝ်တင်းသဵင်ႈ ၸဵဝ်းပူၼ်ႉလွတ်ႈလွင်ႈတုၵ်ႉၶသေၵမ်း… ။

လွမ်ႉမိူင်း ၵေးသီး

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း။