သိုၵ်းမၢၼ်ႈသိုပ်ႇဢဝ်ႁိူဝ်းမိၼ် ပွႆႇမၢၵ်ႇသႂ်ႇၼႂ်းၸိုင်ႈတႆးပွတ်းႁွင်ႇလႄႈ ၵူၼ်းမိူင်းလူႉတၢႆမၢတ်ႇၸဵပ်းၸွမ်းၼမ်

ဝၢႆးလင်ႁူဝ်ၼႃႈသိုၵ်းမၢၼ်ႈ မိၼ်းဢွင်ႇလၢႆႇ ၵႂႃႇမိူင်းၶႄႇမႃးယဝ်ႉၼႆႉ သိုၵ်းမၢၼ်ႈဢဝ်ႁိူၼ်းမိၼ်ပွႆႇမၢၵ်ႇသႂ်ႇၼႂ်းၸိုင်ႈတႆးပွတ်းႁွင်ႇ တိူဝ်းႁၢဝ်ႈႁႅင်းမႃးလိူဝ်ၵဝ်ႇလႄႈ ႁဵတ်းႁႂ်ႈႁိူၼ်းယေး တီႈယူႇတၼ်းသဝ်းၵူၼ်းမိူင်း လူႉၵွႆယွၵ်းယွႆၸွမ်းတင်းၼမ် ၵူၼ်းမိူင်းၵေႃႈ လႆႈမၢတ်ႇၸဵပ်းလူႉတၢႆၸွမ်းဢမ်ႇဢေႇ ၼႆယဝ်ႉ။

မိူဝ်ႈဝႃးၼႂ်းဝၼ်းထီႉ 17 November 2024 (လိူၼ်းသိပ်းသွင်လွင်ႈ 2 ၶမ်ႈ ပီႊတႆး 2118 ၼီႈ) ၶၢဝ်းယၢမ်း 11:30  မူင်းပၢႆၼၼ်ႉ ႁိူဝ်းမိၼ်ၸုမ်းသိုၵ်းမၢၼ်ႈၶဝ် မႃးပွႆႇမၢၵ်ႇသႂ်ႇၼႂ်းဝၢၼ်ႈလူင် ၸႄႈဝဵင်းမိူင်းငေႃႉသေ ၵူၼ်းမိူင်းလႆႈမၢတ်ႇၸဵပ်းႁၢဝ်ႈႁႅင်းၸွမ်း 4 ၵေႃႉ ႁိူၼ်းယေးလႆႈလူႉၵွႆၸွမ်း 15 လင် ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ “တီႈၼၼ်ႉ ဢမ်ႇမီးသိုၵ်းၸုမ်းလႂ်မႃးပၵ်းသဝ်းဝႆႉၶႃႈ သိုၵ်းမၢၼ်ႈတင်ႈၸႂ်မႃးပွႆႇသႂ်ႇၵူၼ်းမိူင်းၵူၺ်း မၢၵ်ႇလူင်ဢၼ်ၶဝ်မႃးပွႆႇၼၼ်ႉ လႆႈႁူႉဝႃႈပဵၼ်မၢၵ်ႇဢၼ်မီးၼမ်ႉၼၵ်း 300 ပွင်ႇၼႆၶႃႈ ၵူၼ်းလူႉတၢႆတႄႉဢမ်ႇမီးၼင်ႇၵဝ်ႇ ဢၼ်လႆႈမၢတ်ႇၸဵပ်းႁၢဝ်ႈႁႅင်းမီး 2 ၵေႃႉ ပဵၼ်ထဝ်ႈယိင်းၼင်ႇၵၼ် ၵေႃႉၼိုင်ႈၺႃးတီႈၵၢၼ်ႈၶေႃး၊ တီႈၶႃလူင်၊ ထႅင်ႈၵေႃႉၼိုင်ႈၵေႃႈ တိူဝ်ႉၺႃးတီႈၶေႃး လႄႈၸွမ်းတူဝ်၊ ထႅင်ႈ 2 ၵေႃႉတႄႉ မၢတ်ႇၸဵပ်းဢိတ်းဢွတ်းၶႃႈ တီႈမိူင်းငေႃႉႁဝ်းၶႃႈၼႆႉ ၸဵမ်မိူဝ်ႈသိုၵ်းလွႆ TNLA ၶဝ်တိုၵ်းသိမ်းလႆႈယဝ်ႉၼၼ်ႉ သိုၵ်းမၢၼ်ႈဢမ်ႇမႃးပွႆႇမၢၵ်ႇသႂ်ႇသေပွၵ်ႈ ပွၵ်ႈၼႆႉလႆႈဝႃႈပဵၼ်ဢွၼ်တၢင်းသုတ်းယဝ်ႉ” လၢတ်ႈၼႄၼင်ႇၼႆ။

ၼႂ်းဝူင်ႈၼႆႉၵူၺ်း သိုၵ်းမၢၼ်ႈပွႆႇမၢၵ်ႇသႂ်ႇၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇတီႈၼွင်ၶဵဝ်၊ မိူင်းၵုတ်ႈ၊ ၵူတ်ႉၶၢႆ ပႃးတင်းမိူင်းငေႃႉၸိူဝ်းၼႆႉလႄႈ ၵူၼ်းမိူင်းဢၼ်လႆႈမၢတ်ႇၸဵပ်းလူႉတၢႆၸွမ်းၼၼ်ႉ မီးၸမ် 40 ပၢႆယဝ်ႉ ပႃးၸဵမ်လုၵ်ႈဢွၼ်ႇလဵၵ်ႉ၊ တီႈယူႇတၼ်းသဝ်းၵူၼ်းမိူင်းၵေႃႈ လႆႈလူႉၵွႆၸွမ်းၼပ်ႉႁူဝ်သိပ်းမိူၼ်ၵၼ်သေ တေႃႇထိုင်ယၢမ်းလဵဝ် ဢမ်ႇမီးသိုၵ်းၸုမ်းလႂ် ႁပ်ႉဢဝ်ပုၼ်ႈၽွၼ်းသၢႆႈတႅၼ်းၶိုၼ်း ၼႆယဝ်ႉ။

ၽူႈထတ်းသၢင်ၵၢၼ်မိူင်းၵေႃႉၼိုင်ႈတႄႉလၢတ်ႈဝႃႈ “ဝၢႆးႁူဝ်ၼႃႈသိုၵ်းမၢၼ်ႈ မိၼ်းဢွင်ႇလၢႆႇ ဢွၵ်ႇၶၢဝ်းတၢင်းၵႂႃႇမိူင်းၶႄႇသေၶိုၼ်းပွၵ်ႈမႃးၼႆႉ ၶဝ်တိူဝ်းဢဝ်ႁိူဝ်းမိၼ်ပွႆႇမၢၵ်ႇ ႁၢဝ်ႈႁႅင်းလိူဝ်ၵဝ်ႇ  ၽၢႆႇတၢင်းမိူင်းၶႄႇၵေႃႈဢမ်ႇလၢတ်ႈသင်ၸွမ်း ၼႂ်းၸိုင်ႈတႆးပွတ်းႁွင်ႇၼႆႉ ဢၼ်တိုၵ်ႉမီးပၢင်တိုၵ်းၵေႃႈ ပဵၼ်ၼႂ်းၵႄႈ ၼွင်ၶဵဝ်လႄႈ ပၢင်ဢူးလူင်ၵူၺ်း ၵူၺ်းၵႃႈသိုၵ်းမၢၼ်ႈဢမ်ႇလိူၵ်ႈတီႈလိူၵ်ႈတၢင်းသေ တင်ႈၸႂ်ပွႆႇမၢၵ်ႇ ၼင်ႇၵၢင်ၸႂ်ၶဝ်” ၼႆယဝ်ႉ။

တႆးလွတ်ႈလႅဝ်း