CNDF ပိုၼ်ၽၢဝ်ႇဝႃႈ လႆႈၶဝ်ႈတိုၵ်းသိမ်းတပ်ႉပႃးရ် ဢၼ်ပဵၼ်တပ်ႉပၢင်သဝ်း သိုၵ်းမၢၼ်ႈ မီးဝႆႉၽၢႆႇၼိူဝ်မႄႈၼမ်ႉမၼိပူႇရ ၸႄႈဝဵင်းၽလမ်း မိူင်းၶျၢင်း ၼၼ်ႉသေ တီႉၺွပ်းလႆႈသိုၵ်းမၢၼ်ႈ ၸၼ်ႉၶုၼ်သိုၵ်းလူင် ၵေႃႉၼိုင်ႈလႄႈ တီႉၺွပ်းလႆႈတူဝ်လိပ်းၵူၼ်းသိုၵ်းမၢၼ်ႈ 14 ၵေႃႉသေ လႆႈတူဝ်တၢႆ 11 ၵေႃႉ သိမ်းလႆႈပႃးၵွင်ႈ 19 လဝ်း ဢိၵ်ႇတင်း မၢၵ်ႇမိုဝ်ႉၸိုၼ်းယၢမ်းတင်းၼမ်ဝႃႈၼႆ။
သိုဝ်ႇၶၢဝ်ႇ Yangon Khit Thit Media ဢွၵ်ႇၼႄဝႆႉဝႃႈ မိူဝ်ႈဝႃးဝၼ်းထီႉ 10 April 2023 (လိူၼ်ႁႃႈလွင်ႈ 6 ၶမ်ႈ ပီႊတႆး 2117 ၼီႈ) ယၢမ်းၵၢင်ၼႂ်မွၵ်ႈ 05:30 မူင်းၼၼ်ႉ တပ်ႉၵႅတ်ႇၶႄၸိူဝ်ႉၸၢတ်ႈၶျၢင်း CNDF ၶဝ်ႈသိမ်းတပ်ႉသိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ဝၢၼ်ႈပႃးရ် ယၢၼ်ၵႆၵၼ်တင်းဝဵင်းၽလမ်း မွၵ်ႈ 12 လၵ်း ၼၼ်ႉသေ လႆႈပဵၼ်ပၢင်တိုၵ်းၵၼ်ၸမ်ႁိမ်း ၸူဝ်ႈမူင်းၶိုင်ႈ ၼႆႉၼႆယဝ်ႉ။
ၽူႈၶဝ်ႈၸုမ်းၵႅတ်ႇၶႄၸိူဝ်ႉၸၢတ်းၶျၢင်းၵေႃႉၼိုင်ႈ လၢတ်ႈၼႄဝႃႈ “လႆႈငိၼ်းဝႃႈသိုၵ်းမၢၼ်ႈၶဝ် တူၵ်းသုမ်းၼမ်လႄႈ လႆႈဢဝ်ႁိူဝ်းမိၼ်လမ်းၼိုင်ႈ လုၵ်ႉတီႈၶူင်ႇႁိူဝ်းမိၼ်တတႃးဢူး မႃးၸွႆႈယိုဝ်းပၼ် ၼႂ်းပၢင်တိုၵ်း မႃးပွႆႇမၢၵ်ႇသႂ်ႇႁိမ်းဝၢၼ်ႈပႃးရ် 6 လုၵ်ႈ သေဢမ်ႇၵႃး ၶိုၼ်းပိၼ်ႇႁူဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈဝဵင်းဝေႇပူႇလႃႉ ထႅင်ႈ 2 လုၵ်ႈလႄႈ တိူဝ်ႉၸပ်းၵူၼ်းမိူင်းလူႉတၢႆတင်းၼမ်၊ ယုမ်ႇယမ်ဝႃႈ ၶဝ်သုမ်းတပ်ႉၶဝ်သေ ၸင်ႇပွႆႇမၢၵ်ႇသႂ်ႇၵူၼ်းမိူင်းၵူၺ်း” ဝႃႈၼႆ။
ၼႂ်းပၢင်တိုၵ်းၼၼ်ႉ ၽၢႆႇ CNDF သိမ်းလႆႈၶိူင်ႈၵွင်ႈၵၢင်ႇသိုၵ်းမၢၼ်ႈ ၵွင်ႈ MA1 − 3 လဝ်း၊ ၵွင်ႈ MA2 − 1 လဝ်း၊ ၵွင်ႈ MA3 − 2 လဝ်း၊ ၵွင်ႈ MA4 − 1 လဝ်း၊ ၵွင်ႈ G3 − 12 လဝ်း၊ မႅၵ်ႉၵွင်ႈ MA − 20 မႅၵ်ႉ၊ ၶိူင်ႈလူင် 60mm – 2 လဝ်း၊ မၢၵ်ႇ 60 MM – 58 လုၵ်ႈ၊ ဢီႇၵႃႇၼႃႇ/မၢၵ်ႇသုပ်းပၢႆၵွင်ႈ – 8 လုၵ်ႈ၊ မႅၵ်ႉၵွင်ႈ G3 – 37 ဢၼ်၊ မၢၵ်ႇၽႃႇ – 10 လုၵ်ႈ၊ မၢၵ်ႇ 40 MM – 33 လုၵ်ႈ၊ မၢၵ်ႇပွမ်း – 12 လုၵ်ႈ၊ မၢၵ်ႇယဵပ်ႇ(မၢၵ်ႇၽူႇ) 50 လုၵ်ႈ၊ မၢၵ်ႇယဵပ်ႇ− 500 လုၵ်ႈ၊ မၢၵ်ႇၵွင်ႈ MA− 1,000 လုၵ်ႈ လႄႈ မၢၵ်ႇၵွင်ႈ G3 − 2,500 လုၵ်ႈသေ ၸုတ်ႇၽဝ်ပႅတ်ႈတပ်ႉသိုၵ်းမၢၼ်ႈၶဝ်ၼႆယဝ်ႉ။
လွင်ႈၶဝ်ႈလူမ်ႇတိုၵ်းၶိုၼ်ႈသိမ်းတပ်ႉသိုၵ်းမၢၼ်ႈပွၵ်ႈၵမ်းၼႆႉ ၵူၼ်းမိူင်းလူႉသဵင်ႈၸွမ်း ၵေႃႉၼိုင်ႈလႄႈ ၵူၼ်းသိုၵ်း CNDF တူၵ်းသုမ်း ၵေႃႉၼိုင်ႈ ၼႆယဝ်ႉ။
တႆးလွတ်ႈလႅဝ်း