COVID−19 ၵူဝ်းရီးယႃးႁွင်ႇၵိုင်ႉၵၢင်ႉၽႄႈလၢမ်းႁႅင်း မီးၵူၼ်းတိတ်းၸပ်းၸမ် 2 လၢၼ်ႉ

မိူဝ်ႈၼႆႉ ဝၼ်းထီႉ 20 May 2022 (လိူၼ်ႁူၵ်းလွင်ႈ 6 ၶမ်ႈ ပီႊတႆး 2116 ၼီႈ) သိုဝ်ႇၶၢဝ်ႇၵူဝ်းရီးယႃးႁွင်ႇ KCNA လၢႆးငၢၼ်း ၵဵဝ်ႇလူၺ်ႈလွင်ႈ COVID-19 ၼႂ်းၶၢဝ်းတၢင်း 24 ၸူဝ်ႈမူင်းၼၼ်ႉ မီးၵူၼ်းတိတ်းၸပ်းမႃးထႅင်ႈ 262,000 ၵေႃႉ ၵူၼ်းလူႉသဵင်ႈတၢႆထႅင်ႈ 1 ၵေႃႉ ဝႃႈၼႆ။

ၵူဝ်းရီးယႃးႁွင်ႇၵေႃႈ ယိုၼ်ယၼ်ဝႃႈ ထူပ်းႁၼ်ၵူၼ်းတိတ်းၸပ်း COVID-19 တိူဝ်းၶိုၼ်ႈမႃး ၼိုင်ႈဝၼ်းလႂ် 200,000-300,000 ၵေႃႉ တႄႇၸဵမ်မိူဝ်ႈဝၼ်းထီႉ 12 May 2022 မႃး၊ ယၢမ်းလဵဝ်ၼႆႉ ႁူဝ်ၼပ်ႉၵူၼ်းတိတ်းၸပ်းႁူမ်ႈတၢင်းမူတ်း မီးယူႇ 1.98 လၢၼ်ႉၵေႃႉလႄႈ ၵူၼ်းလူႉသဵင်ႈတၢႆၵႂႃႇယဝ်ႉ 63 ၵေႃႉၼႆယူႇ။

ၸိူင်ႉႁိုဝ်ၵေႃႈလီ ၽူႈထတ်းသၢင်ၶဝ်တႄႉ တူၺ်းႁၼ်ဝႃႈ ၵဵဝ်ႇလူၺ်ႈၶေႃႈမုၼ်းလွင်ႈၽႄႈလၢမ်း COVID-19 ၼႂ်းၵူဝ်းရီးယႃးႁွင်ႇၼႆႉ ယုမ်ႇယမ်ဝႃႈ လူင်ပွင်ၸိုင်ႈၼၼ်ႉၶတ်းၸႂ်ၵဵပ်းဝႆႉၶေႃႈမုၼ်း ဢၼ်ပဵၼ်တႄႉမီးတႄႉယူႇ ၸွမ်းလူၺ်ႈငဝ်းလၢႆးတၢင်းၵၢၼ်မိူင်း ဢမ်ႇၼၼ်ၵေႃႈ ယွၼ်ႉဢမ်ႇမီးၶိူင်ႈမိုဝ်းလႄႈ ဢဵၼ်ႁႅင်းဢမ်ႇပဵင်းပေႃး ဢၼ်တေလမ်းၸွမ်းသဵၼ်ႈတၢင်း လွင်ႈၽႄႈလၢမ်းၸိူဝ်ႉမႅင်းၼႆႉလႆႈ ဝႃႈၼႆ။

ၽူႈလူင်ႉလႅၼ်ႇၽၢႆႇပၢႆးယူႇလီၶဝ်လၢႆလၢႆၵေႃႉၵေႃႈ ၶတ်းၸႂ်ပၼ်ၾၢင်ႉမႃးၶၢဝ်းႁိုင်ဝႃႈ လွင်ႈၽႄႈလၢမ်းၸိူဝ်ႉမႅင်း COVID-19 ၼႂ်းၵူဝ်းရီးယႃးႁွင်ႇၼၼ်ႉ တေၸၢင်ႈမီးလွင်ႈႁၢႆႉႁႅင်း တေႃႇၵူၼ်းမိူင်းမႃး ယွၼ်ႉပဵၼ်မိူင်းဢၼ်မီးၵူၼ်းၽၢၼ်ၵိၼ်းတုၵ်ႉယၢၵ်ႈၼမ်လႄႈ ဢမ်ႇမီးၶိူင်ႈၵမ်ႉၵႅမ်ၽၢႆႇပၢႆးယူႇလီတဵမ်ထူၼ်ႈပဵင်းပေႃး ပၢႆးယူႇလီၵမ်ႈၼမ်ၵေႃႈ ၵမ်ႉၸွႆႈပၼ်တီႈၵူၼ်းမီးဢႃႇၼႃႇၶဝ်ၼၼ်ႉၵူၺ်း ဝႃႈၼႆ။

ဝူင်ႈပူၼ်ႉမႃးၼႆႉၵေႃႈ ႁွင်ႈၵၢၼ်လူင်ၽၢႆႇၼွၵ်ႈမိူင်း ဢမေႇရိၵၢၼ်ႇ လႆႈယိုၼ်ႈပၼ်တၢင်းၸွႆႈထႅမ် ၽၢႆႇယႃႁႄႉၵင်ႈ COVID-19 လႄႈ လွင်ႈၸွႆႈထႅမ်တၢင်ႇလွင်ႈ ပၼ်တီႈၵူဝ်းရီးယႃးႁွင်ႇၵႂႃႇယူႇ။

ၽူႈထတ်းသၢင်ၶဝ်လၢတ်ႈဝႃႈ ပႅၵ်ႈသမ်ႉ ၵူဝ်းရီးယႃးႁွင်ႇ ယိုၼ်ယၼ်ဝႃႈ ထူပ်းႁၼ်ၵူၼ်းတိတ်းၸပ်း ၸိူဝ်ႉမႅင်း COVID-19 ၼႂ်းမိူင်းယဝ်ႉသေတႃႉ ၼၼ်ႉဢမ်ႇလႆႈပွင်ႇဝႃႈ လူင်ပွင်ၸိုင်ႈတေယိၼ်းၸူမ်းသေ ႁပ်ႉတၢင်းၸွႆႈထႅမ်ၼွၵ်ႈမိူင်းၵႂႃႇ လိူဝ်သေၼၼ်ႉ ယင်းတေသိုပ်ႇမုင်ႈၼႃႈၸၢမ်းမၢၵ်ႇမိတ်ႉသႆးထႅင်ႈလူးၵွၼ်ႇ တႃႇငိူင်ႉဝႄႈဢမ်ႇႁႂ်ႈပိူၼ်ႈႁၼ် တီႈဢူၼ်ႈဢွၼ်ႇၶဝ် ဝႃႈၼႆ။

မိူဝ်ႈပူၼ်ႉမႃးၼၼ်ႉ ၵူဝ်းရီးယႃးႁွင်ႇပၢၵ်ႈပႅတ်ႈ ဢမ်ႇသူၼ်ၸႂ်ၵၢၼ်ၸွႆႈထႅမ် ၵဵဝ်ႇလွင်ႈတၢင်းပဵၼ် COVID-19 လၢႆလၢႆလွင်ႈယူႇ ႁူမ်ႈပႃး လွင်ႈသူင်ႇယႃႁႄႉၵင်ႈပၼ်ၸိူဝ်းၼႆႉ။

တႆးလွတ်ႈလႅဝ်း