EU-ၵူဝ်းရီးယႃးၸၢၼ်း တုၵ်းယွၼ်းၵူဝ်းရီးယႃးႁွင်ႇ ၵိုတ်းလွင်ႈၸွႆႈထႅမ်ရၢတ်ႉသျႃး

မိူဝ်ႈဝၼ်းထီႉ 4 November 2024 (လိူၼ်သိပ်းသွင်မႂ်ႇ 4 ၶမ်ႈ ပီႊတႆး 2118 ၼီႈ) ၼၼ်ႉ ႁူမ်ႈတုမ်ယူးရူပ်ႇ (EU) လႄႈ ၵူဝ်းရီးယႃးၸၢၼ်း လႆႈၸတ်းႁဵတ်းပၢင်ၵုမ်ၵၼ် တီႈၼႂ်း ဝဵင်းလူင် Seoul မိူင်းၵူဝ်းရီးယႃးၸၢၼ်းယဝ်ႉသေ ယူႇတီႈ တူဝ်တႅၼ်းၸၼ်ႉသုင် ဢၼ်ပဵၼ်ၽၢႆႇပၵ်းပိူင်ၼွၵ်ႈမိူင်း လႄႈ လွင်ႈမၼ်ႈ ၼိမ်သဝ်းႁူမ်ႈတုမ်ယူးရူပ်ႇ ဢိၵ်ႇတင်း ၽွင်းလူင်ၽၢႆႇၼွၵ်ႈမိူင်းၵူဝ်းရီးယႃးၸၢၼ်း လႆႈဢွၵ်ႇသပ်းၸႅင်ႈၶၢဝ်ႇ သၢၼ်ၶတ်း လွင်ႈၵူဝ်းရီးယႃးႁွင်ႇ တေႃႉသူင်ႇၶိူင်ႈယိပ်းလူၺ်ႈၽိတ်းမၢႆမီႈ ၵႂႃႇၸွႆႈထႅမ်ပၼ်ရၢတ်ႉသျႃး တႃႇၸႂ်ႉတိုဝ်းၼႂ်းပၢင်တိုၵ်းယူႇၶရဵၼ်း ဝႃႈၼႆ။

ၼွၵ်ႈလိူဝ်သေၼႆႉ တင်းသွင်ၽၢႆႇယင်းလႆႈတုၵ်းယွၼ်း ႁႂ်ႈၵူဝ်းရီးယႃးႁွင်ႇ ၵိုတ်းယိုတ်းလွင်ႈႁူမ်ႈမိုဝ်းၽၢႆႇၵၢၼ်သိုၵ်းဢၼ်ၽိတ်းပၵ်းပိူင် လႄႈ ထွၼ်သိုၵ်း ၵူဝ်းရီးယႃးႁွင်ႇ ပွၵ်ႈဝၢႆႇၶိုၼ်းၸိုင်ႈမိူင်းတူဝ်ၵဝ်ႇ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူဝ်းရီးယႃးၸၢၼ်း လႄႈ ယူႇၶရဵၼ်း လႆႈလူင်းလၢႆးမိုဝ်း ႁဵတ်းၶေႃႈတူၵ်းလူင်းႁူမ်ႈမိုဝ်းၵၼ် ၽၢႆႇလွင်ႈမၼ်ႈၼိမ်သဝ်း လႄႈ ၽၢႆႇၵၢၼ်သိုၵ်း တင်းမူတ်း မီးယူႇ 15 ၶေႃႈ ႁူမ်ႈထိုင်ပႃး လွင်ႈပူတ်းပွႆႇၶိူင်ႈယိပ်း လႄႈ  လွင်ႈမၼ်ႈၼိမ်သဝ်း Cyber ဝႃႈၼႆ။

ၸိူင်ႉႁိုဝ်ၵေႃႈလီ ၽၢႆႇတၢင်းၵူဝ်းရီးယႃးၸၢၼ်း ဢမ်ႇလႆႈၸွႆႈထႅမ်ၶိူင်ႈယိပ်း မဵဝ်းဢၼ် ပိုတ်းယိုဝ်းလႆႈၼၼ်ႉပၼ်ယူႇၶရဵၼ်း ၵူၺ်းၸွႆႈၶိူင်ႈၵူတ်ႇထတ်းႁႃမၢၵ်ႇတႅၵ်ႇပၼ် ယူႇၶရဵၼ်းမႃးယူႇတႃႇသေႇၼႆသေတႃႉ မိူဝ်ႈဝူင်ႈပူၼ်ႉမႃးၼၼ်ႉ ယူႇတီႈၽွင်းလူင် ၽၢႆႇၼွၵ်ႈမိူင်းၵူဝ်းရီးယႃးၸၢၼ်း လႆႈလၢတ်ႈဝႃႈ ၵူဝ်းရီးယႃးၸၢၼ်း ယင်းတိုၵ်ႉဝူၼ်ႉ သွၼ်ႇ တေသူင်ႇၶိူင်ႈယိပ်းပၼ်ယူႇၶရဵၼ်း တႃႇႁႂ်ႈပဵၼ်ၵၢၼ်တုမ်ႉတွပ်ႇ လွင်ႈဢၼ် ၵူဝ်း ရီးယႃးႁွင်ႇ ၸွႆႈထႅမ်ရၢတ်ႉသျႃး တီႈၼႂ်းပၢင်တိုၵ်းယူႇႁိုဝ် ၼႆယဝ်ႉ။

လွင်ႈဢၼ်ၵူဝ်းရီးယႃးႁွင်ႇ ၸွႆႈထႅမ်ရၢတ်ႉသျႃးၼၼ်ႉ ၽၢႆႇတၢင်းၵူဝ်းရီးယႃးၸၢၼ်း ယုမ်ႇယမ်ဝႃႈ ရၢတ်ႉသျႃး တေၶိုၼ်းၸွႆႈထႅမ် ၵူဝ်းရီးယႃးႁွင်ႇ လူၺ်ႈ Technology လႄႈ ၽၢႆႇၵၢၼ်သိုၵ်း ၽွင်းယၢမ်းဢၼ်ၵူဝ်းရီးယႃးႁွင်ႇ ယင်းတိုၵ်ႉမႄႇၶႂၢၵ်ႈလၢဝ်ပွမ်ၸွပ်ႇ သွၵ်ႈ လႄႈ ၽိူမ်ႉႁႅင်းၼမ်ႉၵတ်ႉမၢၵ်ႇမိတ်ႉသႆးယူႇၼၼ်ႉ ဝႃႈၼႆ။

တႆးလွတ်ႈလႅဝ်း