Kamala Harris တေဢွၵ်ႇၶၢဝ်းတၢင်းၵႂႃႇတီႈ လႅၼ်ၶႅၼ်ႈၼႃႈလိၼ် ၵူဝ်းရီးယႃးႁွင်ႇ လႄႈ ၵူဝ်းရီးယႃးၸၢၼ်း

ႁိူၼ်းႁေႃၶၢဝ်ဢမေႇရိၵၢၼ်ႇ လႆႈပိုတ်ႇလၢတ်ႈၼႄဝႃႈ Kamala Harris ဢၼ်ပဵၼ် ၵႅမ်ၸွမ်ၸိုင်ႈဢမေႇရိၵၢၼ်ၼၼ်ႉ တေဢွၵ်ႇၶၢဝ်းတၢင်းၵႂႃႇတီႈ လႅၼ်ၶႅၼ်ႈၼႃႈ လိၼ် မိူင်းၵူဝ်းရီးယႃးႁွင်ႇ လႄႈ မိူင်းၵူဝ်းရီးယႃးၸၢၼ်း ၼႂ်းဝၼ်းထီႉ 29 September 2022 ၼႆႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းလူင်ပွင်ၸိုင်ႈဢမေႇရိၵၢၼ်ႇၵေႃႈလႆႈလၢတ်ႈဝႃႈ မိူဝ်ႈၽွင်းၵႅမ်ၸွမ်ၸိုင်ႈဢမေႇရိၵၢၼ်ႇ Kamala Harris ဢွၵ်ႇၶၢဝ်းတၢင်းၵႂႃႇတီႈ မိူင်းၵျႃႇပၢၼ်ႇ တွၼ်ႈတႃႇၶဝ်ႈႁူမ်ႈပၢင်မႃႇသႃႇ Shinzo Abe ၸွမ်ၽွင်းလူင်ၵဝ်ႇ ၵျႃႇပၢၼ်ၼၼ်ႉ တေသိုပ်ႇဢွၵ်ႇၶၢဝ်းတၢင်းၵႂႃႇတီႈၵူဝ်းရီးယႃးၸၢၼ်း ၼႂ်းဝၼ်းၽတ်း ၼႆႉယဝ်ႉဢမ်ႇၵႃး တေဢွၵ်ႇၶၢဝ်းတၢင်းၵႂႃႇတီႈ လႅၼ်ၶႅၼ်ႈၼႃႈလိၼ် မိူင်းၵူဝ်းရီးယႃးႁွင်ႇ လႄႈ မိူင်းၵူဝ်းရီးယႃးၸၢၼ်း ပိူဝ်ႈတႃႇၽိူမ်ႉထႅမ်လွင်ႈၸမ်ၸႂ် ၼႂ်းၵၢၼ်ပဵၼ်ဢူၺ်းလီ ၵႄႈၵၢင် ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်းသေ ၼႄႁႂ်ႈႁၼ်ထိုင်ၵႂၢမ်းမၼ်ႈၶွင်ဢမေႇရိၵၢၼ်ႇ ဢၼ်တေၵႅတ်ႇၶႄႁႄႉၵင်ႈပၼ် ၵူဝ်းရီးယႃးၸၢၼ်း သင်ၸိူဝ်ႉ ၵူဝ်းရီးယႃးႁွင်ႇၶဝ်ႈမႃးပူၼ်ႉပႅၼ် ၼႆယဝ်ႉ။

မိူဝ်ႈပူၼ်ႉမႃးလၢႆဝၼ်းၼႆႉၵူၺ်း ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆး ၵွၼ်ႇၼႃႈ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း တေၽိုၵ်းၽွၼ်ႉၵၢၼ်သိုၵ်း ႁူမ်ႈၵၼ် သေဢမ်ႇၵႃး ယင်းပဵၼ်ဢွၼ်တၢင်းဢၼ် ၵႅမ်ၸွမ်ၸိုင်ႈဢမေႇရိၵၢၼ်ႇ Kamala Harris တေဢွၵ်ႇၶၢဝ်းတၢင်းၵႂႃႇတီႈ ၵူဝ်းရီးယႃးၸၢၼ်းသေ လၢႆလၢႆၽၢႆႇၵေႃႈ လႆႈပၵ်းတႃပႂ်ႉတူၺ်း ၵူဝ်းရီးယႃးႁွင်ႇ ၸွင်ႇတေၸၢမ်းယိုဝ်းမၢၵ်ႇမိတ်ႉသႆးထႅင်ႈတေႉယူႇႁိုဝ် ဢၼ်ဝႃႈၼၼ်ႉယဝ်ႉ။

တႆးလွတ်ႈလႅဝ်း