မိူဝ်ႈဝၼ်းထီႉ 6 September 2022 (လိူၼ်သိပ်းမႂ်ႇ 12 ၶမ်ႈ ပီႊတႆး 2116 ၼီႈ) သိုၵ်းၶၢင် KIA လႄႈ PDF ႁူမ်ႈၵၼ်သိမ်းဢဝ်လၢႆၵႃးမုၼ်ၸဝ်ႈ ဝၢၼ်ႈၵုင်းတူၵ်း ဢၼ်တိုၵ်ႉ ဢၢင်ႈၵႂႃႇယူတ်းယႃတူဝ် တီႈႁူင်းယႃၵျွင်ႇလႄႇ ၸႄႈဝဵင်းမိူင်းမွၵ်ႇ တိူင်းၸႄႈၵႅင်း ၼၼ်ႉသေဢမ်ႇၵႃး တီႉၺွပ်းဢဝ်ပႃး လုင်းထူၺ်းပူဝ်ႇ ႁူဝ်ၼႃႈၽၢႆႇၶႄၾႆး လႄႈ လုင်းဝိၼ်းပူဝ်ႇ ပူႇၵၢင်ႉဝၢၼ်ႈ ဢၼ်ဢၢင်ႈၵႂႃႇထုတ်ႇဢဝ်ၶိုၼ်းၵႃးမုၼ်ၸဝ်ႈၼၼ်ႉ ၼႆယဝ်ႉ။

မိူဝ်ႈဝၼ်းထီႉ 4 September 2022 ၼၼ်ႉၵေႃႈ သိုၵ်းၶၢင် KIA လႄႈ PDF ႁူမ်ႈၵၼ် ႁႅင်းသိုၵ်းမွၵ်ႈ 10 ၵေႃႉ ၶဝ်ႈၵႂႃႇၼႂ်းဝၢင်းၵျွင်းမုၼ်ၸဝ်ႈ ဝၢၼ်ႈၼွင်ပၢတ်ႇသေ ဢထမ်ႇမတီႉၺွပ်းဢဝ် ၸဝ်ႈသြႃႇၵၼ်ႇထမႃႇ (မုၼ်ၸဝ်ႈတႆးလႅင်) ၵႂႃႇၶႃႈႁႅမ်တၢႆ ယဝ်ႉ ဢဝ်ၽင်လိၼ်ပႅတ်ႈတီႈၼႂ်းထိူၼ်ႇ ဢၼ်မီးႁိမ်းဝၢၼ်ႈၼၢၼ်ႉသ ၼႆယဝ်ႉ။

လွင်ႈ KIA+PDF တီႉၺွပ်းၸဝ်ႈသြႃႇၵၼ်ႇထမႃႇ ၵျွင်းဝၢၼ်ႈၼွင်ပၢတ်ႇၵႂႃႇသေ ၶႃႈႁႅမ် တၢႆပႅတ်ႈၼႆႉ ယူႇတီႈတပ်ႉသိုၵ်းၸိူဝ်ႉၶိူဝ်းတႆးလႅင် (SNA)၊ ပႃႇတီႇတႆးလႅင် Shanni Solidarity Party (S.S.P)၊ ၵေႃလိၵ်ႈလၢႆးလႄႈ ၾိင်ႈငႄႈတႆးလႅင် ၸႄႈဝဵင်းမိူင်းယၢင်း ၸႄႈမိူင်းၶၢင်၊ မုၵ်ႉၸုမ်းသင်ႇၶႃႇတႆးလႅင် မိူင်းႁူမ်ႈတုမ်ပတ်းပိုၼ်ႉၵေႃႈ ဢွၼ်ၵၼ် ဢွၵ်ႇၶေႃႈပိုၼ်ၽၢဝ်ႇ သၢၼ်ၶတ်းႁၢဝ်ႈႁၢဝ်ႈႁႅင်းႁႅင်း ယူႇယဝ်ႉ။

မိူဝ်ႈဝၼ်းထီႉ 3 September 2022 ယၢမ်းၵၢင်ၼႂ် 09:00 မူင်းၼၼ်ႉၵေႃႈ KIA+PDF ဢထမ်ႇမတီႉၺွပ်းဢဝ် လုင်းဢွင်ႇၵွႆႇ ပူႇၵၢင်ႉဝၢၼ်ႈတူၵ်း၊ လုင်းထုၼ်းသူၺ်ႇ ဢႃႇယု 60 ပီႊ လႄႈ လုင်းၸိင်ႇတၢၼ်း ဢႃႇယု 50 ပီႊ သေဢမ်ႇၵႃး မိူဝ်ႈလိူၼ် August 2022 ၼၼ်ႉၵေႃႈ တီႉၺွပ်းၵႂႃႇ ပူႇႁဵင် ဢိူင်ႇပၢင်ၶႃး၊ ပူႇၵၢင်ႉ ဝၢၼ်ႈပၢင်ၶႃး လႄႈ ၵူၼ်းၼုမ်ႇၵေႃႉၼိုင်ႈသေ တေႃႇထိုင်ယၢမ်းလဵဝ် ယင်းဢမ်ႇပႆႇပွႆႇပၼ်ၶိုၼ်း ၼႆယဝ်ႉ။

PDF ၼႆႉ ယူႇၽၢႆႇတႂ်ႈၵုမ်းၵမ် လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ဝႃႈၼႆ သေတႃႉ လွင်ႈသိုၵ်းၶၢင် KIA လႄႈ PDF ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း ၼႂ်းပိုၼ်ႉတီႈတႆးလႅင်ၼႆႉ ယူႇတီႈ NUG ဢမ်ႇမီးလွင်ႈၵုမ်းထိင်း တုမ်ႉတွပ်ႇ လၢတ်ႈသင်သေလွင်ႈ ၼႆယဝ်ႉ။

တႆးလွတ်ႈလႅဝ်း

ဢိင်ၶေႃႈမုၼ်း – The Voice of Shan-Ni