NATO ႁူမ်ႈ 30 မိူင်း ၸတ်းပၢင်ႁပ်ႉ ၾိၼ်ႇလႅၼ်ႇလႄႈ သဝိတဵၼ်ႇ ၶဝ်ႈပဵၼ်လုၵ်ႈၸုမ်း ပဵၼ်တၢင်းၵၢၼ်ၵႂႃႇ

မိူဝ်ႈဝၼ်းထီႉ 5 July 2022 ( လိူၼ်ပႅတ်ႇမႂ်ႇ 8 ၶမ်ႈပီတႆး 2116 ၼီႈ) လုၵ်ႈၸုမ်း NATO ႁူမ်ႈ 30 မိူင်း ႁပ်ႉ ၾိၼ်ႇလႅၼ်ႇလႄႈ သဝိတဵၼ်ႇ ၶဝ်ႈပဵၼ်လုၵ်ႈၸုမ်း ၵိုတ်းၶၵ်ႉ ႁႂ်ႈသၽႃး ႁပ်ႉႁွင်းၼၼ်ႉ ပဵၼ်ၶၢၵ်ႉလိုၼ်းသုတ်းၵူၺ်း ဝႃႈၼႆ။

ၽွင်းလူင်ၽၢႆႇၼွၵ်ႈမိူင်း ၸိူဝ်းပဵၼ်ဝႆႉလုၵ်ႈၸုမ်း NATO ၼၼ်ႉ လႆႈတူၵ်းလူင်းႁူမ်ႈၵၼ်တႃႇႁႂ်ႈ ၾိၼ်ႇလႅၼ်ႇလႄႈ သဝိတဵၼ်ႇ ၶဝ်ႈပဵၼ်လုၵ်ႈၸုမ်း NATO ယဝ်ႉ ၵိုတ်းၶၵ်ႉတွၼ်ႈလိုၼ်းသုတ်း သင်ဝႃႈ သၽႃးမိူင်းလုၵ်ႈၸုမ်း NATO မၵ်းမၼ်ႈယဝ်ႉပေႃးၼႆ ၾိၼ်ႇလႅၼ်ႇ−သဝိတဵၼ်ႇ ၵေႃႈၶဝ်ႈပဵၼ် လုၵ်ႈၸုမ်း NATO ပဵၼ်တၢင်းၵၢၼ်ၵႂႃႇဝႃႈၼႆ။

Jens Stoltenberg ၽူႈၼမ်းၼႂ်းၵူႈလွင်ႈ NATO လႄႈၽွင်းလူင်ၽၢႆႇၼွၵ်ႈမိူင်း ၾိၼ်ႇလႅၼ်ႇလႄႈ သဝိတဵၼ်ႇ ႁူမ်ႈၵၼ်ပိုၼ်ၽၢဝ်ႇၵႂႃႇဝႃႈ “ၶၢဝ်းယၢမ်းမိူဝ်ႈလဵဝ် NATO မီးလုၵ်ႈၸုမ်း 32 မိူင်းယဝ်ႉၼႆလႄႈ မိူင်းၸိူဝ်းပဵၼ်လုၵ်ႈၸုမ်း NATO တေၵႅၼ်ႇၶႅင်ၵႂႃႇ” ဝႃႈၼႆ။

ၾိၼ်ႇလႅၼ်ႇလႄႈ သဝိတဵၼ်ႇ ၶဝ်ႈပဵၼ်လုၵ်ႈၸုမ်း NATO ၼႆႉတေႁဵတ်းႁႂ်ႈ 2 ၸိုင်ႈမိူင်း ႁပ်ႉႁူႉႁဵၼ်းႁူႉ ၵဵဝ်ႇလူၺ်ႈလွင်ႈ NATO ၼမ်ဝႆးၶိုတ်းတၼ်း လႄႈ တေလႆႈႁပ်ႉ လွင်ႈလူလွမ် တီႈ NATO သင်မီးမိူင်းၶဝ်ႈတိုၵ်း ယွၼ်ႉဝႃႈ NATO ပိုၼ်ၽၢဝ်ႇဝႆႉ သင်မီးသေမိူင်းမိူင်းပူၼ်ႉပႅၼ် ၶဝ်ႈတိုၵ်း လုၵ်ႈၸုမ်း NATO ၵေႃႈ မိူၼ်တိုၵ်း NATO တၢင်းမူတ်းဝႃႈၼႆ။

တႆးလွတ်ႈလႅဝ်း