Noeleen Heyzer မႆႈၸႂ်ၸွမ်းပၢႆးယူႇလီ ဢွင်ႇသၢၼ်းသုၵျီႇ

ဝၢႆးသေၶွင်ႇသီႇသိုၵ်းမၢၼ်ႈ တႅပ်းတတ်းတြႃးပၼ်တၢမ်ႇၶွၵ်ႈ ဢွင်ႇသၢၼ်းသုၵျီႇ ထႅင်ႈ 3 ပီႊၼႆႉ Noeleen Heyzer ၵေႃႉပဵၼ် ၽွင်းတၢင်ၶိုၵ်ႉတွၼ်း ၸၢတ်ႈၸိုင်ႈလုမ်ႈၾႃႉ  ဢၼ်ၵဵဝ်ႇတင်းမိူင်းႁူမ်ႈတုမ် လၢတ်ႈတီႈ ISEAS – Yusof Ishak Institute ၼႂ်းမိူင်းသိင်ႇၵပူဝ်ႇဝႃႈ လွမ်မႆႈၸႂ်ၸွမ်းပၢႆးယူႇလီ ဢွင်ႇသၢၼ်းသုၵျီႇ တေႉတေႉ ဢၼ်ထုၵ်ႇၵုမ်းၶင်တူဝ်မႃး ၸဵမ်မိူဝ်ႈသိုၵ်းမၢၼ်ႈ ယိုတ်းဢၢမ်းၼၢတ်ႈ မိူဝ်ႈလိူၼ် February 2021 ၼၼ်ႉသေ ယင်းလၢတ်ႈပႃး ထႅင်ႈဝႃႈ ပေႃးဢမ်ႇပႆႇမီးမႃးၶိုၼ်း လူင်ပွင်ၸိုင်ႈၵူၼ်းမိူင်းမိူၼ်ၵဝ်ႇ တေဢမ်ႇသူႇၸႂ်းမိူင်းႁူမ်ႈတုမ် ပဵၼ်ပွၵ်ႈၵမ်း 2 ဝႃႈၼႆ။

Noeleen Heyzer သိုပ်ႇလၢတ်ႈဝႃႈ လွမ်မႆႈၸႂ်ပၢႆးယူႇလီ လႄႈ လွင်ႈယူႇသၢင်ႈၵိၼ် သဝ်း ဢွင်ႇသၢၼ်းသုၵျီႇ တေႉတေႉသေ ယင်းသၢၼ်ၶတ်းပႃး လွင်ႈၶွင်ႇသီႇသိုၵ်းမၢၼ်ႈ တႅပ်းတတ်းတြႃးပၼ်တၢမ်ႇၶွၵ်ႈထႅင်ႈ 3 ပီႊ ဢိၵ်ႇ ႁဵတ်းၵၢၼ်ၵျၢမ်း၊ မိူဝ်ႈလိူၼ် August ပူၼ်ႉမႃး ၽွင်းမၼ်းၼၢင်း သူႇၸႂ်းမိူင်းႁူမ်ႈတုမ်ၼၼ်ႉ လႆႈႁူပ်ႉထူပ်းဢုပ်ႇဢူဝ်းၸွမ်း ၸွမ်ၸိၵ်းသိုၵ်းမၢၼ်ႈ မိၼ်ႇဢွင်ႇလႅင်ႇ ၵႅဝ်ႇလူၺ်ႈလွင်ႈမႆႈၸႂ်ၸွမ်းပၢႆးယူႇလီ ဢွင်ႇသၢၼ်းသုၵျီႇသေ တုၵ်းယွၼ်း ႁႂ်ႈလႆႈႁူပ်ႉထူပ်း လႄႈ ႁႂ်ႈပွႆႇပၼ် ဢွင်ႇသၢၼ်းသုၵျီႇယူႇ ဝႃႈၼႆ။

ၵွၼ်ႇၼႃႈ တေႁူပ်ႉထူပ်းၸွမ်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ မိူဝ်ႈလိူၼ် August တီႈၼေႇပျီႇတေႃႇၼၼ်ႉ မၼ်းၼၢင်းလႆႈတုၵ်းယွၼ်း ၶွင်ႇသီႇသိုၵ်းမၢၼ်ႈ ဝႆႉ 6 ၶေႃႈ မိူၼ်ၼင်ႇ 1. ႁႂ်ႈၵိုတ်းယိုတ်းလွင်ႈပၼ်တၢမ်ႇတၢႆ၊ 2. ႁႂ်ႈပွႆႇပၼ်လုၵ်ႈ ဢွၼ်ႇ ၸိူဝ်းထုၵ်ႇၵုမ်းၶင်ဝႆႉၼၼ်ႉတင်းမူတ်း၊ 3. ႁႂ်ႈသူင်ႇလွင်ႈၸွႆႈထႅမ်ပၼ် ၵူၼ်းတူၵ်းယၢၵ်ႈ ၸွမ်းၼင်ႇသုၼ်ႇလႆႈသုၼ်ႇပဵၼ်မီးဝႆႉ၊ 4. ႁႂ်ႈၵိုတ်းယိုတ်း လွင်ႈႁဵတ်းႁၢႆႉၸႃႉၼိူဝ်ၵူၼ်းမိူင်း၊ 5. ႁႂ်ႈပွႆႇပၼ်ၶိုၼ်း ၽူႈထုၵ်ႇၵုမ်းၶင် ယွၼ်ႉၵၢၼ်မိူင်းၵူႈၵေႃႉ လႄႈ 6. ယွၼ်းႁူပ်ႉထူပ်း ဢွင်ႇသၢၼ်းသုၵျီႇ ဝႃႈၼႆ။

တႆးလွတ်ႈလႅဝ်း