Pentagon လၢတ်ႈဝႃႈ ရၢတ်ႉသျႃးသိုပ်ႇတိုၵ်းယူႇၶရဵၼ်းႁၢဝ်ႉႁႅင်း လႄႈ ၸတ်းဢဵၼ်ႁႅင်းသိုၵ်းမႂ်ႇထႅင်ႈ

မိူဝ်ႈဝၼ်းထီႉ 31 March 2022 (ဝၼ်းလိူၼ်သီႇလပ်း ပီႊတႆး 2116 ၼီႈ) လႅင်ႇၶၢဝ်ႇပိုၼ်ႉတီႈၼႂ်းယူႇၶရဵၼ်း လၢတ်ႈဝႃႈ တပ်ႉသိုၵ်းရၢတ်ႉသျႃး တိုၵ်ႉသိုပ်ႇတိုၵ်းတေႃးယူႇၶရဵၼ်း ဢမ်ႇထၢတ်ႇဢမ်ႇဝၢႆးလႄႈပွႆႇမၢၵ်ႇသႂ်ႇ ႁိမ်းၶႅပ်ႇဝဵင်းလူင် Kiev လႄႈ Chernihiv ဢၼ်ရၢတ်ႉသျႃး ယၢမ်ႈလၢတ်ႈဝႃႈ တေလူတ်းပၢင်တိုၵ်း ၸိူဝ်းႁိမ်းႁွမ်း 2 ဝဵင်းၼၼ်ႉဝႃႈၼႆ။

မိူဝ်ႈဝၼ်းထီႉ 30 March 2022 ပူၼ်ႉမႃးၼႆႉ Vladislav Astroshenko တႅၼ်းၽွင်း ဝဵင်းလူင်ၶျႄးၼီးႁိပ်ႉ(ၾ်) လၢတ်ႈတီႈသိုဝ်ႇၶၢဝ်ႇ CNN ဝႃႈ “ၼႂ်းၶၢဝ်းတၢင်း 24 ၸူဝ်ႈမူင်းပူၼ်ႉမႃးၼႆႉ တပ်ႉသိုၵ်းရၢတ်ႉသျႃး ယင်းတိုၵ်ႉသိုပ်ႇပိုတ်းယိုဝ်းၵွင်ႈလူင်သႂ်ႇ ၸွမ်းသၢပ်ႇဝဵင်းလူင် Kiev လႄႈ ဝဵင်းလူင်ၶျႄးၼီးႁိပ်ႉ(ၾ်) ဢိၵ်ႇတင်း ၸႂ်ႉၵွင်ႈမေႃႇထႃႇ ပိုတ်းယိုဝ်းၶဝ်ႈၼႂ်းၵၢင်မိူင်း ၶျႄးၼီးႁိပ်ႉ(ၾ်) တၢင်းႁဵတ်းသၢင်ႈၸိူဝ်းၼႆႉ ပဵၼ်ၶိူင်ႈယိုၼ်ယၼ်ဝႃႈ ရၢတ်ႉသျႃးဢမ်ႇႁဵတ်းၸွမ်း ၵႂၢမ်းမၼ်ႈ ၶေႃႈတူၵ်းလူင်းၵၼ် ဢၼ်ဝႃႈ တေလူတ်းယွမ်းၵၢၼ်ၶဝ်ႈတိုၵ်း မိူင်းလူင်လႄႈ ဝဵင်းႁိမ်းႁွမ်းၼႂ်း ယူႇၶရဵၼ်းပွတ်းႁွင်ႇၼၼ်ႉ” ဝႃႈၼႆ။

ၸိူင်ႉႁိုဝ်ၵေႃႈလီ ၽၢႆႇရၢတ်ႉသျႃးတႄႉ ဢမ်ႇဢွၵ်ႇမႃးလၢတ်ႈၸွမ်းသင် ၵဵဝ်ႇလူၺ်ႈလွင်ႈ သိုဝ်ႇၶၢဝ်ႇ ဢွၵ်ႇမႃးလၢတ်ႈဝႃႈ ရၢတ်ႉသျႃးသိုပ်ႇတိုၵ်း ယူႇၶရဵၼ်းႁၢဝ်ႉႁႅင်း သိုဝ်ႇၶၢဝ်ႇ Reuters လၢႆးငၢၼ်းဝႃႈ ႁွင်ႈၵၢၼ်လူင်ၽၢႆႇၵႅတ်ႇၶႄ ဢမေႇရိၵၢၼ်ႇ ဢမ်ႇၼၼ် pentagon လႆႈပိုတ်ႇလၢတ်ႈမိူဝ်ႈဝၼ်းထီႉ 30 March 2022 မိူဝ်ႈဝႃးၼႆႉဝႃႈ “ရၢတ်ႉသျႃးလႆႈၸတ်းတပ်ႉသိုၵ်းမႂ်ႇ သေ တူင်ႉၼိုင်ႁႅင်းသိုၵ်း မွၵ်ႈ 20% လုၵ်ႉတီႈၸိူဝ်းႁိမ်းႁွမ်း ဝဵင်းလူင် Kiev လႄႈ ဝဵင်းလူင်ၶျႄးၼီးႁိပ်ႉ(ၾ်) ၶိုၼ်ႈၵႂႃႇတၢင်းမိူင်းယူႇၶရဵၼ်း ပွတ်းႁွင်ႇ ၵမ်ႈၽွင်ႈသမ်ႉၶဝ်ႈၵႂႃႇၼႂ်း ပေႇလႃႇရုတ်ႉသ်  ၼႆယဝ်ႉ။

ၵျွၼ်ၵႃႇ John Kieby ၽူႈၶၢၼ်ပၢၵ်ႇ ၽႅၼ်ႊတၵွၼ်ႊ pentagon လၢတ်ႈဝႃႈ ဝဵင်းလူင် Kiev တိုၵ်ႉထုၵ်ႇ တပ်ႉလိၼ်လႄႈ တပ်ႉၵၢင်ႁၢဝ်ရၢတ်ႉသျႃးၶဝ်ႈတိုၵ်းႁၢဝ်ႉႁႅင်းယူႇ လိူဝ်ၼၼ်ႉ ယင်းပၼ်ၾၢင်ႉဝႃႈ ရၢတ်ႉသျႃးတေၸၢင်ႈ သူင်ႇၶဝ်ႈၼမ်ႉတၢင်းၵိၼ် ဢိၵ်ႇၶိူင်ႈၵွင်ႈၵၢင်ႇထႅင်ႈတၢင်းၼမ် တႃႇတပ်ႉသိုၵ်းရၢတ်ႉသျႃးပၵ်းတပ်ႉ သိုပ်ႇပိုတ်ႇပၢင်တိုၵ်းၼႂ်းယူႇၶရဵၼ်းၵႂႃႇၶၢဝ်းႁိုင် ဢမ်ႇႁၼ်သၢႆငၢႆဝႃႈ တေထွၼ်သိုၵ်း ဝႃႈၼႆ။

ၽူႈလူင်ႉလႅၼ်ႇမၢင်ၵေႃႉလၢတ်ႈဝႃႈ ရၢတ်ႉသျႃးတူၵ်းသုမ်းၼႂ်းယူႇၶရဵၼ်း ၼမ်တၢၼ်ႇလႂ်ၵေႃႈယဝ်ႉ တႃႇႁႂ်ႈႁၵ်ႉသႃဝႆႉသရေႇၼႃႈတႃရၢတ်ႉသျႃး လႄႈ တႃႇဝဵင်းလူင်မွတ်ႇသၵူဝ်ႇ ၸၢင်ႈပိုၼ်ၽၢဝ်ႇ လွင်ႈဢွင်ႇပေႉလႆႈၼၼ်ႉ ရၢတ်ႉသျႃးတေၸၢင်ႈလႅၵ်ႈလၢႆႈ ပဝ်ႉမၢႆပၢင်တိုၵ်းၼႆႉ ပဵၼ်ဢၼ်မႂ်ႇၼႆယူႇ ။

ႁွင်ႈၵၢၼ်လူင်ၽၢႆႇၵႅတ်ႇၶႄမိူင်းဢိင်းၵလဵတ်ႈၵေႃႈ လၢတ်ႈဝႃႈ ꧦဝၢႆးသေရၢတ်ႉသျႃး တူၵ်းသုမ်းတေႃႇ တပ်ႉသိုၵ်းယူႇၶရဵၼ်းတင်းၼမ်ယဝ်ႉၼၼ်ႉ  ရၢတ်ႉသျႃး တေၸၢင်ႈလႆႈထွၼ်တပ်ႉသိုၵ်းဢွၵ်ႇ ၼႂ်းမိူင်းယူႇၶရဵၼ်း  လႄႈ မိူင်းပေႇလႃႇရူတ်ႉသေ မႄးၶွတ်ႇၽွတ်ႈတပ်ႉသိုၵ်း ဢိၵ်ႇၶိူင်ႈၵမ်ႉၵႅမ် ဢၼ်ၶိုၵ်ႉၶႅမ်ႉ လိူဝ်ၵဝ်ႇ တႃႇသူင်ႇၶဝ်ႈတိုၵ်းတေႃးယူႇၶရဵၼ်းၶိုၼ်းꧦ ဝႃႈၼႆ။

ဢိင်းၵိတ်ႉဢွၵ်ႇမႃးလၢတ်ႈၵဵဝ်ႇၵပ်းလွင်ႈၼႆႉၵေႃႈ ဝၢႆးသေၽွင်းလူင်ၽၢႆႇၵႅတ်ႇၶႄ မိူင်းရၢတ်ႉသျႃး ပိုၼ်ၽၢဝ်ႇဝႃႈ ရၢတ်ႉသျႃးမုင်ႈပဝ်ႉၵႂႃႇတီႈပွတ်းတွၼ်ႈ တွၼ်းပၢတ်းလ် ၊ လူႇႁၼ်ႉ(သ်)၊ တေႃးၼဵတ်ႉ(သ်) ဢၼ်ရၢတ်ႉသျႃးယိုတ်းသိမ်းလႆႈသေ ဢုပ်ႉဝႆႉယူႇၼၼ်ႉ ဢိၵ်ႇတင်း ရၢတ်ႉသျႃးလႅၵ်ႈလၢႆႈပိူင်တိုၵ်းၼၼ်ႉ ပဵၼ်ယွၼ်ႉ ၼႃႈၵၢၼ်ၶိုၵ်ႉတွၼ်းပွၵ်ႈၼႆႉ ဢွင်ႇမၢၼ်ထိုင်တီႈၵႂႃႇၶၵ်ႉဢွၼ်တၢင်းသုတ်းယဝ်ႉ ႁူမ်ႈတင်းၵၢၼ်တတ်း ဢဵၼ်ႁႅင်းသိုၵ်းယူႇၶရဵၼ်းလႆႈၼၼ်ႉ ဝႃႈၼႆ။ ၽၢႆႇတပ်ႉသိုၵ်း ဢိင်းၵလဵတ်ႈတႄႉ လၢတ်ႈဝႃႈ လွင်ႈရၢတ်ႉသျႃးလႅၵ်ႈပိၼ်ႇပဝ်ႉမၢႆသေဝၢႆႇၼႃႈမုင်ႈၸူး လူႇႁၼ်ႉ(သ်) ၊တေႃးၼဵတ်ႉ(သ်) ၼၼ်ႉ မိူၼ်တင်းယွမ်းႁပ်ႉဝႃႈ ရၢတ်ႉသျႃး ႁူပ်ႉတၢင်းယၢပ်ႇ ၽိုတ်ႇၵဵဝ်ႇၵပ်းလွင်ႈယိုတ်းသိမ်း ပိုၼ်ႉတီႈလမ်ႇလွင်ႈ ၶွင်ယူႇၶရဵၼ်းလၢႆလၢႆတီႈၼၼ်ႉ ဝႃႈၼႆ။

တႆးလွတ်ႈလႅဝ်း