PNLO ထွၼ်ပႅတ်ႈ ၶုၼ်ဢူၵ်ႉၵႃႇ လႄႈ ၽူႈၼမ်းၼႂ်း 2 ၵေႃႉ ဢွၵ်ႇပႅတ်ႈၼႂ်းၸုမ်း

မိူဝ်ႈဝၼ်းထီႉ 12 October 2024 (လိူၼ်သိပ်းမႂ်ႇ 10 ၶမ်ႈ ပီႊတႆး 2118 ၼီႈ) မုၵ်ႉၸုမ်းပူတ်းပွႆႇၸိူဝ်ႉၸၢတ်ႈပဢူဝ်း PNLO လႆႈႁဵတ်းပၢင်ၵုမ်ၶိုၵ်ႉၶၵ်ႉၵၼ်သေ တႅပ်းတတ်းထွၼ်ဢွၵ်ႇပႅတ်ႈ ၶုၼ်ဢူၵ်ႉၵႃႇ လႄႈ ၽူႈၼမ်းၼႂ်းထႅင်ႈ 2 ၵေႃႉ ပဵၼ်တၢင်းၵၢၼ်ၵႂႃႇယဝ်ႉ ဝႃႈၼႆ။

ၵဵဝ်ႇၵပ်းလူၺ်ႈလွင်ႈၼႆႉ မိူဝ်ႈဝၼ်းထီႉ 15 September 2024 ၼၼ်ႉ ၶုၼ်ဢူၵ်ႉၵႃႇ ၵေႃႉပဵၼ်ၼႃႇယၵ PNLO လႄႈ ၽူႈၼမ်းၼႂ်း 1 ၸဝ်ႈႁၢၼ်ၶုၼ်မိၼ်းတဵင်း၊ ၽူႈၼမ်းၼႂ်း 2 ၼၢင်းယဵၼ်ႇယဵၼ်ႇၸူဝ်း လႆႈထွၼ်တူဝ်ဢွၵ်ႇတီႈၼႂ်းမုၵ်ႉၸုမ်းသေ ထိုင်ဝၼ်းထီႉ 9 October 2024 ၶုၼ်ဢူၵ်ႉၵႃႇၶိုၼ်းပိုၼ်ၽၢဝ်ႇ ၵေႃႇတင်ႈထႅင်ႈၸုမ်းမႂ်ႇ PNLO-NCA-S လႄႈ တေသိုပ်ႇႁဵတ်းသၢင်ႈၵႂႃႇ ၸွမ်းၼင်ႇလိၵ်ႈႁူမ်ႈမၢႆ NCA မီးဝႆႉၼၼ်ႉယူႇ ၼႆယဝ်ႉ။

ၼႂ်းၽိုၼ်လိၵ်ႈဢၼ် ၶုၼ်ဢူၵ်ႉၵႃႇ လူင်းလၢႆးမိုဝ်းသေပိုၼ်ၽၢဝ်ႇၼၼ်ႉ ပႃးဝႆႉဝႃႈ ၵေႃႉပဵၼ်ႁူဝ်ပဝ်ႈ မုၵ်ႉၸုမ်းပူတ်းပွႆႇၸိူဝ်ႉၸၢတ်ႈပဢူဝ်း PNLO ယၢမ်းလဵဝ်ၼႆႉ သၢင်ႈပၢင်တိုၵ်းၼႂ်းပိုၼ်ႉတီႈ ၸၢဝ်းၶိူဝ်းပဢူဝ်း ယူႇသၢင်ႈၵိၼ်သဝ်းလႄႈ ယႃႉလွင်ႈၼိမ်သဝ်းၵတ်းယဵၼ် ၼႂ်းပိုၼ်ႉတီႈသေ ၵူၼ်းမိူင်းလႆႈလူႉသုမ်း ၶူဝ်းၶွင်ဢုၵ်ႉၸႃႇႁိူၼ်းယေး တင်းၼမ် ဝႃႈၼႆ။

ၵဵဝ်ႇလူၺ်ႈလွင်ႈ ၶုၼ်ဢူၵ်ႉၵႃႇ ၵေႃႇတင်ႈၶိုၼ်ႈမႃး ၸုမ်းမႂ်ႇၼႆႉသေ တၢင်းၽၢႆႇၸုမ်း PNLO ၵေႃႈ လႆႈၸတ်းႁဵတ်းပၢင်ၵုမ်ၶိုၵ်ႉၶၵ်ႉ ဝၼ်းထီႉ  11−12 October 2024 ၶၢဝ်းတၢင်း 2 ဝၼ်း၊ ၼႂ်းပၢင်ၵုမ်ၼၼ်ႉ မီးၽူႈၶဝ်ႈၵေႃႇမတီႇ၊ ၽူႈၵွၼ်းတပ်ႉၸိူဝ်းၼႆႉ ၶိုၼ်ႈႁွတ်ႈဢုပ်ႇဢူဝ်းၵၼ်ၵႂႃႇ လႄႈ ၶိုၼ်းလႆႈတႅပ်းတတ်း ထွၼ်ဢွၵ်ႇပႅတ်ႈ ၶုၼ်ဢူၵ်ႉၵႃႇ၊ ၸဝ်ႈႁၢၼ်မိၼ်းတဵင်း၊ ၼၢင်းယဵၼ်ႇယဵၼ်ႇၸူဝ်း တီႈၼႂ်းမုၵ်ႉၸုမ်းပဵၼ်တၢင်းၵၢၼ်ၵႂႃႇ ယူႇယဝ်ႉ။

လွင်ႈဢၼ် ၶုၼ်ဢူၵ်ႉၵႃႇ ဢဝ်ၸိုဝ်ႈသဵင် PNLO တင်ႈၸိုဝ်ႈၸုမ်းမႂ်ႇ ၶိုၼ်ႈမႃးထႅင်ႈၼၼ်ႉၵေႃႈ ယူႇတီႈမုၵ်ႉၸုမ်း PNLO လႆႈသၢၼ်ၶတ်းပႃးဝႆႉယူႇ။

တႆးလွတ်ႈလႅဝ်း