RCSS ၸတ်းႁဵတ်းပၢင်လူင်းၵၢၼ်သွၼ် ဢုပ်ႉပိူင်ႇပိုၼ်ႉတီႈ ၸုပ်ႈ 1/24 ၼႂ်းၸႄႈဝဵင်းမိူင်းပၼ်ႇ

မိူဝ်ႈၼႆႉဝၼ်းထီႉ 21 December 2024 (လိူၼ်ၸဵင်လွင်ႈ 6 ၶမ်ႈ ပီႊတႆး 2119 ၼီႈ) ၶၢဝ်းယၢမ်းၵၢင်ၼႂ် 10:00 မူင်း မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်လူင်းၵၢၼ်သွၼ် ၵၢၼ်ဢုပ်ႉပိူင်ႇပိုၼ်ႉတီႈ ၸုပ်ႈ (1) ပီႊ 2024 ၼႂ်းၸႄႈဝဵင်းမိူင်းပၼ်ႇ ၼႆယဝ်ႉ။

ၼႂ်းပၢင်လူင်းၵၢၼ်သွၼ်ၼၼ်ႉ ၽူႈယႂ်ႇၵူၼ်းလူင် ၼႂ်းမုၵ်ႉၸုမ်း RCSS/SSA ဢိၵ်ႇပႃးလုၵ်ႈႁဵၼ်း ၶိုၼ်ႈႁွတ်ႈႁူမ်ႈ(118)ၵေႃႉ ​​သေ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) မွၵ်ႇလၢတ်ႈ​​ၶေႃႈၵႂၢမ်းၵႂႃႇ လွင်ႈလႆႈပိုတ်ႇၵၢၼ်သွၼ်ၸွမ်းၼင်ႇၶေႃႈယိူင်းဢၢၼ်းမုၵ်ႉၸုမ်းမီး၊ ၵၢၼ်ဢွၼ်ႁူဝ် ဢုပ်ႉပိူင်ႇၽွင်းငမ်းပိုၼ်ႉတီႈ ႁႂ်ႈတမ်းဝၢင်းၸွမ်းၶၵ်ႉတွၼ်ႈဢုပ်ႉပိူင်ႇ (ဢုပ်ႉပိူင်ႇ၊တႅပ်းတတ်းတြႃး၊ၵႅတ်ႇၶႄ)၊ လႄႈသူင်ႇသင်ႇၽူႈဢွၼ်ႁူဝ် ၽူႈမီးပုၼ်ႈၽွၼ်းၵႂႃႇ ၵဵဝ်ႇၵၢၼ်ဢုပ်ႉပိူင်ႇပိုၼ်ႉတီႈ ဢၼ်လူဝ်ႇႁဵတ်းလူဝ်ႇသၢင်ႈ ထုၵ်ႇမႅၼ်ႈၸွမ်းပိူင် ၼႆယဝ်ႉ။

ဝၢႆးၼၼ်ႉ လႆႈမီးၵၢၼ်ယိုၼ်ႈမွပ်ႈပၼ်ဝႂ်ၽၢၼ်ႇပူၼ်ႉၵၢၼ်သွၼ် တီႈၸဝ်ႈၼႃႈတီႈ ၽူႈမီးပုၼ်ႈၽွၼ်း ဢုပ်ႉပိူင်ႇ တပ်ႉသိုၵ်းၸိုင်ႈတႆး (RCSS/SSA) လႄႈ ၶူးပူင်သွၼ် မွၵ်ႇလၢတ်ႈၶေႃႈၵႂၢမ်းသူင်ႇသင်ႇလုၵ်ႈႁဵၼ်းသေ လုၵ်ႈႁဵၼ်းၵေႃႉၼိုင်ႈတၢင်တူဝ် လုၵ်ႈႁဵၼ်းတင်းသဵင်ႈ လႆႈလၢတ်ႈၵႂၢမ်းငိၼ်းၸူမ်းၶွပ်ႈၸႂ်ထိုင်ၵႂႃႇယူႇယဝ်ႉ။

ပၢင်သွၼ်ၵၢၼ်ဢုပ်ႉပိူင်ႇပိုၼ်ႉတီႈ ၸုပ်ႈ (1) ပီႊ2024 ၼႆႉ လႆႈတႄႇပိုတ်ႇသွၼ်မႃးမိူဝ်ႈဝၼ်းထီႉ 04 December 2024 ထိုင် 20 December 2024 ဝႃႈၼႆ။

တႆးလွတ်ႈလႅဝ်း