RCSS/SSA လႄႈ SSPP ပဵၼ်ပၢင်တိုၵ်းၵၼ် ၽၢႆႇ RCSS တီႉလႆႈပႃးတူဝ်လိပ်းသိုၵ်း SSPP 5 ၵေႃႉ လႄႈၶိူင်ႈၵွင်ႈၵၢင်ႇ

မိူဝ်ႈဝႃးဝၼ်းထီႉ 21 July 2024  (လိူၼ်ပႅတ်ႇလွင်ႈ 1 ၶမ်ႈ ပီႊတႆး 2118 ၼီႈ) ယၢမ်းၵၢင်ၶိုၼ်းလိုၵ်း ၸုမ်းသိုၵ်းဢၼ်သႂ်ႇမိၵ်ႈမၢႆ SSPP ၸွမ်းသွၵ်ႈတဝ်ႁႃၵေႃႉႁၢၼ် တပ်ႉသိုၵ်းၸိုင်ႈတႆး RCSS/SSA လႄႈ သွင်ၽၢႆႇလႆႈပဵၼ်ပၢင်တိုၵ်းၵၼ် တီႈသၢႆလွၵ်ႉၸွၵ်ႇမိူင်းပဵင်းသေ ၽၢႆႇတပ်ႉသိုၵ်းၸိုင်ႈတႆး RCSS တီႉၺွပ်းလႆႈပႃး တူဝ်လိပ်း သိုၵ်း SSPP 5 ၵေႃႉလႄႈ ၶိူင်ႈယိပ်းၵွင်ႈၵၢင်ႇ 9 လဝ်း ဢိၵ်ႇမၢၵ်ႇမိုဝ်ႉၸိုၼ်းယၢမ်း လႄႈၶူဝ်းၶွင်ၵဵဝ်ႇၶွင်ႈၵမ်ႈၽွင်ႈ ၼႆယဝ်ႉ။

ၶၢဝ်းတၢင်းလၢႆဝၼ်းမႃးၼႆႉ ၽၢႆႇတၢင်းၸုမ်းသိုၵ်းဢၼ်သႂ်ႇမိၵ်ႈမၢႆ SSPP ဢဝ်ႁႅင်းသိုၵ်း ၸွမ်းသွၵ်ႈတဝ်ႁႃၵေႃႉႁၢၼ် RCSS/SSA လၢႆလၢႆပိုၼ်ႉတီႈၼႂ်းၸိုင်ႈတႆးပွတ်းၸၢၼ်းလႄႈ သွင်ၽၢႆႇၸင်ႇလႆႈမီးလွင်ႈပိုတ်းယိုဝ်းၵၼ်သေ ၵေႃႉႁၢၼ် SSPP ၵမ်ႈၽွင်ႈ ၸိူဝ်းပဵၼ်လုၵ်ႈမႄႈတႆး လႄႈဢၼ်ဢမ်ႇၶႂ်ႈယိုဝ်းၶိုၼ်းတႆးၼင်ႇၵၼ်ၼၼ်ႉ ဢွၼ်ၵၼ်လၵ်ႉပၢႆႈတပ်ႉသေ ၶဝ်ႈႁူမ်ႈႁွမ်းၼႂ်း RCSS/SSA ၵေႃႈမီး ၼႆယဝ်ႉ။

တႆးလွတ်ႈလႅဝ်း