ၸွမ်းၼင်ႇပေႃႇလသီႇၽဵဝ်ႈမူၺ်ႉယႃႈမဝ်းၵမ် ၶွင်ႇသီႇဢဝ်ၶိုၼ်းၸိုင်ႈတႆး (RCSS) မီးၼၼ်ႉသေ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ၵူတ်ႇထတ်းတီႉၺွပ်းလႆႈ ယႃႈမဝ်းၵမ် ဢိၵ်ႇတင်း ၵူၼ်းတေႃႉတၢင်ႇယႃႈမဝ်းၵမ် တီႈၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။

မိူဝ်ႈဝၼ်းထီႉ 17 October 2022 (လိူၼ်သိပ်းဢဵတ်းလွင်ႈ 8 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ်ၸဝ်ႉ 04:30 မူင်းၼၼ်ႉ ၸုမ်းၸွပ်ႇသွၵ်ႈ ၼႂ်းတပ်ႉၵွင် ဢၼ်ယူႇၽၢႆႇတႂ်ႈၵၢၼ်ၵုမ်းၵမ် ၼႃႈလိၼ်သိုၵ်း မၢႆ (1) ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇတူင်ႉၼိုင် ၵူတ်ႇထတ်းၼႂ်းပိုၼ်ႉတီႈလႄႈ တီႉၺွပ်းလႆႈ လူတ်ႉ TOYOTA FORTUNER သီၶၢဝ် ဢၼ်တေႃႉတၢင်ႇ ယႃႈမဝ်းၵမ်မႃး ၽွမ်ႉတင်းလူတ်ႉၶိူင်ႈထႅင်ႈ 2 လမ်း ဢၼ်မႃးၸွမ်းၵၼ် ၼိူဝ်သဵၼ်ႈတၢင်းၵႃး မိူင်းၶွၼ်−မိူင်းပၵ်ႉ လႄႈ ၼမ်ႉလိၼ်းတွင်း ၸႄႈဝဵင်းၵဵင်းတုင်သေ တီႉၺွပ်းၵုမ်းထိင်းလႆႈပႃး ၵူၼ်းတေႃႉတၢင်ႇယႃႈမဝ်းၵမ် တင်းမူတ်း 4 ၵေႃႉ 1. လူးတႃႇ ဢႃႇယု 43 ပီႊ ယူႇဝၢၼ်ႈပၢင်လီ ဢိူင်ႇမိူင်းၶွၼ် ၸႄႈဝဵင်းၵဵင်းတုင် (မီးဝႂ်ပျီႇတုၸိတ်ႉၵိုၵ်းတူဝ် ပဵၼ်ၵႅမ်ႁူဝ်ၼႃႈပျီႇတုၸိတ်ႉမိူင်းၶွၼ်)၊ 2. ယေးလ ဢႃႇယု 34 ပီႊ ယူႇဝၢၼ်ႈပၢင်ႇၼႃးယႃးလူင် မိူင်းၶွၼ် ၸႄႈဝဵင်းၵဵင်းတုင်၊ 3. ပေႃးလႃႇမီး ဢႃႇယု 33 ပီႊ ယူႇဝၢၼ်ႈပၢင်လီ မိူင်းၶွၼ် ၸႄႈဝဵင်းၵဵင်းတုင်၊ 4. တႃႇဝီႉ ဢႃႇယု 32 ပီႊ ယူႇဝၢၼ်ႈပႃႇပေးၵူဝ်ႇ−မိူင်းပၵ်ႉၼိူဝ် ဢိူင်ႇမိူင်းပၵ်ႉ ၸႄႈဝဵင်းၵဵင်းတုင် ႁူမ်ႈပႃးတင်း ယႃႈဢၢႆႉသ် (ၼမ်ႉၶႅင်) Methamphetamine 450 ၵီႇလူဝ်ႇၵရမ်ႇ၊ တူဝ်ငိုၼ်းမၢၼ်ႈ 40,000 ပျႃး၊ ငိုၼ်းထႆး 1,020 ဝၢတ်ႇ၊ ၾူၼ်း 5 ၶိူင်ႈ၊ Power Bank 1 ဢၼ်၊ ၵွင်ႈပွတ်း 2 လဝ်း၊ မႅၵ်ႉ 2 ဢၼ်၊ မၢၵ်ႇၵွင်ႈ 100 လုၵ်ႈ ဢိၵ်ႇ ဝႂ်ၵိုၵ်းတူဝ်ပျီႇတုၸိတ်ႉ 1 ဝႂ် ဝႃႈၼႆ။

မိူဝ်ႈၼႂ်းလိူၼ် July 2022 ပူၼ်ႉမႃးၼၼ်ႉၵေႃႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ၵူတ်ႇထတ်းတီႉၺွပ်းလႆႈ ယႃႈဢၢႆႉသ် (ၼမ်ႉၶႅင်) 21 ထူင်လူင် လႄႈ ယႃႈမ 4 ထူင်လူင် တီႈၼႂ်းၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း မိူၼ်ၵၼ် ဝႃႈၼႆ။

တႆးလွတ်ႈလႅဝ်း