RCSS/SSA ၸတ်းႁဵတ်းပၢင်ၵႅဝ်ႈ ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 66 ပီႊ တီႈငဝ်ႈၸိုင်ႈလွႆတႆးလႅင်း

ဢဝ်တိုဝ်ႉတၢင်းဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 66 ပီႊ ၼႆႉသေ ၼင်ႇႁိုဝ်ပေႃးတေပဵၼ်ၵၢၼ်ၶုၵ်းထူပ်း ၽူႈႁတ်ႈႁၢၼ်ၸိူဝ်းလႆႈ ၸုၼ်ႉလူႇၼိူဝ်ႉလိူတ်ႈသၢႆၸႂ် လႄႈဢၢင်ႇၵႃႇတူဝ်ၶိင်းၸိူဝ်းၼၼ်ႉ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸင်ႇလႆႈၸတ်းႁဵတ်း ပၢင်ၵႅဝ်ႈဝၼ်းလုၵ်ႉၽိုၼ်ႉလႄႈ ပၢင်ဝၢင်းတူင်ႇမွၵ်ႇမွင်ၸႂ် ၶုၵ်းထူပ်းၽူႈႁတ်းႁၢၼ် ၼႆယဝ်ႉ။

မိူဝ်ႈၼႆႉဝၼ်းထီႉ 21 May 2024 (လိူၼ်ႁူၵ်းမႂ်ႇ 14 ၶမ်ႈ ပီႊတႆး 2118 ၼီႈ) ပဵၼ်ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 66 ပီႊ (the 66^th Anniversary of Shan State Resistance Day) ၼႆသေ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸင်ႇလႆႈၸတ်းႁဵတ်း ပၢင်ၵႅဝ်ႈဝၼ်းလုၵ်ႉၽိုၼ်ႉ လႄႈ ပၢင်ဝၢင်းတူင်ႇမွၵ်ႇမွင်ၸႂ် တီႈငဝ်ႈၸိုင်ႈ လွႆတႆးလႅင်းသေ မီးၽူႈယႂ်ႇၵူၼ်းလူင်ၼႂ်းမုၵ်ႉၸုမ်း လႄႈပီႈၼွင်ႉၶႅၵ်ႇ ဢိၵ်ႇပေႃႈမႄႈၵူၼ်းမိူင်း၊ ၵူၼ်းသိုၵ်း ၶိုၼ်းႁွတ်ႈတင်းၼမ် ၼႆယဝ်ႉ။

ၸွမ်းၼင်ႇၶပ်းမၢႆပၢင်ၵႅဝ်ႈမီးၼၼ်ႉသေ ၶၢဝ်းယၢမ်း 07:30 မူင်း သင်ႇၶႃႇၸဝ်ႈ လႄႈ ၽူႈယႂ်ႇၵူၼ်းလူင်၊ ၵူၼ်းသိုၵ်း၊ ၵူၼ်းမိူင်း ႁွတ်ႈၽႅဝ်ဢဝ်တီႈယူႇ ၼႂ်းပၢင်ၵႅဝ်ႈသေ ယၢမ်း  07:50 မူင်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA  ၸွမ်သိုၵ်းလူင် ယွတ်ႈသိုၵ်း ႁွတ်ႈၽႅဝ်ဢဝ်တီႈယူႇ ဝၢႆးၼၼ်ႉၽူႈမီးပုၼ်ႈၽွၼ်း တၢင်ႇၶၢဝ်ထိုင်ႁူဝ်ပဝ်ႈလူင်သေ ၽူႈၶိုၼ်ႈႁွတ်ႈတင်းသဵင်ႈ သိုပ်ႇႁွင်ႉၵႂၢမ်းၸိူဝ်ႉၸၢတ်ႈလႄႈ ၼပ်ႉယမ်ၸွမ်ပိဝ်ၵႂႃႇ ၼႆယဝ်ႉ။

ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ “တီႈလႆႈၸတ်းႁဵတ်းပၢင်ၵႅဝ်ႈ ဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်းမိူင်းၸိုင်ႈတႆးၼႆႉ ယိူင်းဢၢၼ်ႁႂ်ႈလႆႉၼပ်ႉယမ် ၽူႈႁတ်းႁၢၼ်ႁဝ်ႈၵူႈၵေႃႉ ၸိူဝ်းဢၼ်လႆႈၸုၼ်ႉလူႇ ၼိူဝ်ႉလိူတ်ႈသၢႆၸႂ် ပုၼ်ႈတႃႇၸိူဝ်ႉၸၢတ်ႈဝၢၼ်ႈမိူင်းႁဝ်းလႄႈ ႁႂ်ႈလႆႈလူႇတၢၼ်းဝူၺ်ႇဝၢၵ်ႈၵူသူဝ်ႇပၼ်ၸိူဝ်းလႆႈလူႇၼိူဝ်ႉလူႇလိူတ်ႈၵႂႃႇၸိူဝ်းၼၼ်ႉၼႆယဝ်ႉ” ၼႆယဝ်ႉ။

ဝၢႆးသေၼၼ်ႉယဝ်ႉ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) ၶိုၼ်းလႆႈသိုပ်ႇမွတ်ႈဢၢပ်ႈပၼ် ဝႂ်ယုၵ်ႉယွင်ႈ ဢဝ်ၵုင်ႇမုၼ် ၽူႈႁတ်ႈႁၢၼ်ဢၼ်လႆႈၸုၼ်ႉလူႇဢၢင်ႇၵႃႇတူဝ်ၶိင်း ၽွင်းယၢမ်းသိုၵ်း တိုၵ်းဢဝ်မိူင်းတႆးလွတ်ႈလႅဝ်းၵွၼ်းၶေႃၼၼ်ႉ ၼႆယဝ်ႉ။

ဝၢႆးၼၼ်ႉ မီးသင်ႇၶႃႇၸဝ်ႈ ပၼ်ဢေႃးဝႃႇတၵႂႃႇ မီးႁူဝ်ၶေႃႈဝႃႈ “တူဝ်ၽွမ်ႉၵၼ်၊ ၸႂ်ၽွမ်ႉၵၼ်၊ တၢင်းဝူၼ်ၽွမ်ႉၵၼ်” ၼႆသေ သိုပ်ႇၼၼ်ႉ ၽူႈမီးပုၼ်ႈၽွၼ်းၶိုၼ်းလူဢၢၼ်ႇၼႄ ၶေႃႈပိုၼ်ၽၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး ၼႂ်းတိုဝ်ႉတၢင်း ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 66 ပီႊ လႄႈ ဢွၼ်ၵၼ်လူႇတၢၼ်းယၢတ်ႇၼမ်ႉသေ ပၢင်ၵႅဝ်ယဝ်ႉတူဝ်ႈၵႂႃႇ ၼႆယဝ်ႉ။

ၼင်ႇႁိုဝ်တေပဵၼ်ၵၢၼ်ၶုၵ်းထူပ်း ၽူႈႁတ်းႁၢၼ်ၸိူဝ်းလႆႈလူႉၼိူဝ်ႉလိူတ်ႈသၢႆၸႂ်ၵႂႃႇၼၼ်ႉ ဝၢႆးပၢင်ၵႅဝ်ႈယဝ်ႉ သိုပ်ႇမီးပၢင်ဝၢင်းတူင်ႇမွၵ်ႇမွင်ၸႂ် တီႈႁုၼ်ႇႁၢင်ႈၸဝ်ႈသိူဝ်ၶၢၼ်ႇၾႃႉ လႄႈ ၸဝ်ႈၵွၼ်းၸိူင်း သေ မီးႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး လႄႈ ၽူႈယႂ်ႇၵူၼ်းလူင်၊ ၵူႈႁွင်ႈၵၢၼ်၊ ၵူႈထႃႇၼ ဝၢင်းတူင်ႇမွၵ်ႇမွင်ၸႂ်ၵႂႃႇ ၼႆယဝ်ႉ။

တႆးလွတ်ႈလႅဝ်း