SHRF ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်းမၢၼ်ႈပိုတ်းယိုဝ်းမၢၵ်ႇလူင် တီႈဝဵင်းမိူင်းပၢႆး

မိူဝ်ႈဝၼ်းထီႉ 12 October 2022 (လိူၼ်သိပ်းဢဵတ်းလွင်ႈ 3 ၶမ်ႈ ပီႊတႆး 2116 ၼီႈ) ၼၼ်ႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်းမၢၼ်ႈဢဝ်မၢၵ်ႇလူင်ယိုဝ်းသေ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းတၢႆ 8 ၵေႃႉ၊ ပႃးတင်းလုၵ်ႈဢွၼ်ႇ 3 ၵေႃႉ လႄႈ မၢတ်ႇၸဵပ်းထႅင်ႈ 14 ၵေႃႉ တီႈၸႄႈဝဵင်းမိူင်းပၢႆး ၸိုင်ႈတႆးပွတ်းၸၢၼ်း ဝႃႈၼႆ။

ၼႂ်းၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ၼၼ်ႉ လၢတ်ႈဝႆႉဝႃႈ မိူဝ်ႈၼႂ်းလိူၼ် September 2022 ၼၼ်ႉ သိုၵ်းမၢၼ်ႈပိုတ်ႇၼႃႈသိုၵ်း ဢဝ်မၢၵ်ႇလူင်ပိုတ်းယိုဝ်း ၼႂ်းၸႄႈဝဵင်းမိူင်းပၢႆး ၸိုင်ႈတႆးပွတ်းၸၢၼ်းသေ ႁဵတ်းႁႂ်ႈၵူၼ်းဝၢၼ်ႈလူႉသဵင်ႈတၢႆ 8 ၵေႃႉ၊ ၼႂ်းၼၼ်ႉ ပႃးတင်းလုၵ်ႈဢွၼ်ႇ 3 ၵေႃႉလႄႈ မၢတ်ႇၸဵပ်းထႅင်ႈ ဢမ်ႇယွမ်း 14 ၵေႃႉ ၼႆယဝ်ႉ။

မိူဝ်ႈဝၼ်းထီႉ 8 September 2022 ၼၼ်ႉ သိုၵ်းမၢၼ်ႈတပ်ႉၸုမ်းလူင် 66 (တပ်ႉမ) ဢဵၼ်ႁႅင်းမွၵ်ႈ 100 လုၵ်ႉတီႈဝၢၼ်ႈဝႃရီးပလၢႆႊ ဢၼ်မီးတၢင်းၸၢၼ်းဝဵင်း သေၶဝ်ႈမႃး ၼႂ်းဝဵင်းမိူင်းပၢႆး။ ဝၢႆးၼၼ်ႉ မီးပၢင် တိုၵ်းႁၢဝ်ႈႁႅင်းၸွမ်း ၸုမ်းၵႅတ်ႇၶႄၵူၼ်းမိူင်း PDF ဢၼ်တူင်ႉၼိုင်ယူႇတီႈ ပွႆးၵူင်း ပွၵ်ႉ 1 ၊ 2 လႄႈ ပွၵ်ႉ 3 ၼႂ်းဝဵင်းမိူင်းပၢႆးသေ သိုၵ်းမၢၼ်ႈဢဝ်မၢၵ်ႇလူင်ယိုဝ်းလူင်ၵႂႃႇၼႂ်းဝဵင်း ၵူႈႁူးၵူႈတၢင်း ၼႆယဝ်ႉ။

ယွၼ်ႉပၢင်တိုၵ်းႁၢဝ်ႉႁႅင်းၼႂ်းပွၵ်ႉပွႆးၵူင်း ပွၵ်ႉ 3 သေ ႁဵတ်းႁႂ်ႈၵူၼ်းဝၢၼ်ႈၼႂ်းပိုၼ်ႉတီႈ လႆႈၼီပၢႆႈၵႂႃႇ ပိုင်ႈႁူမ်ႈၼႂ်းသိုင်ႇဢွင်ႈၵဵပ်းၶွင် (ၵူဝ်ႇတွင်ႇ)။ ဝၼ်းၼၼ်ႉဝၢႆးဝၼ်း သိုၵ်းမၢၼ်ႈဢဝ်မၢၵ်ႇလူင်ယိုဝ်း တူၵ်းသႂ်ႇတီႈၵူဝ်ႇတွင်ႇၼၼ်ႉလႄႈ ႁဵတ်းႁႂ်ႈ ဢွၼ်ႇၸၢႆးၵေႃႉၼိုင်ႈ ဢႃယုပႃႈတႂ်ႈ 10 ၶူပ်ႇ မၢတ်ႇၸဵပ်း လိူတ်ႈတူၵ်းၼမ်သေ လႆႈလူႉတၢႆၵႂႃႇ၊ လိူဝ်ၼၼ်ႉ ၵူၼ်းဝၢၼ်ႈထႅင်ႈ 2 ၵေႃႉ လႆႈတၢင်းမၢတ်ႇၸဵပ်းၸွမ်း။

ပၢင်တိုၵ်းယႂ်ႇလူင်ၼၼ်ႉ သိုပ်ႇလၢမ်းထိုင်ဝၼ်းထီႉ 13 September 2022 သေ သိုၵ်းမၢၼ်ႈဢၼ်ပၵ်းတပ်ႉဢဝ်တီႈယူႇ တီႈၵျွင်းၽြႃးၼၢႆးၶၢဝ်(မေႇတေႃႇပယႃး) ၼၼ်ႉလႆႈထွႆ။ ဝၢႆးၼၼ်ႉသိုၵ်းမၢၼ်ႈဢၼ်ပၵ်း တပ်ႉယူႇတီႈၼႂ်းမိူင်းပၢႆး လႄႈ လွႆၵေႃႇၼၼ်ႉ ဢဝ်မၢၵ်ႇလူင်မွၵ်ႈ 30 လုၵ်ႈ ပိုတ်းယိုဝ်းသႂ်ႇလႄႈ မၢၵ်ႇတူၵ်း ၼႂ်းပွၵ်ႉပွႆးၵူင်း ပွၵ်ႉ 1 လႄႈပွၵ်ႉ 3 ဝဵင်းမိူင်းပၢႆးသေ ၵူၼ်းၼုမ်ႇသွင်ၵေႃႉ ဢႃႇယု မွၵ်ႈ 20 လႆႈတၢင်းမၢတ်ႇၸဵပ်း။

ၼႂ်းဝၼ်းထီႉ 15-16 September 2022 ၼၼ်ႉ ၼႂ်းမိူင်းပၢႆးဢမ်ႇမီးပၢင်တိုၵ်းသင်။ ၵူၺ်းၵႃႈ သိုၵ်းမၢၼ်ႈဢဝ် မၢၵ်ႇလူင်ယိုဝ်းလူင်ၵႂႃႇၵူႈႁူးၵူႈတၢင်းၼႂ်းဝဵင်းသေ ဝၼ်းထီႉ 16 September 2022 ၼၼ်ႉ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း 4 ၵေႃႉ လႆႈလူႉတၢႆ ၼႂ်းၼၼ်ႉ 2 ၵေႃႉ ပဵၼ်ဢွၼ်ႇယိင်းသွင်ၵေႃႉပီႈၼွင်ႉ ဢႃႇယုမွၵ်ႈ 7 ၶူပ်ႇ လႄႈ ၵူၼ်းၸၢႆး ဢႃႇယုမွၵ်ႈ 50 သွင်ၵေႃႉ။ လိူဝ်ၼၼ်ႉယင်းႁဵတ်းႁႂ်ႈၵူၼ်းပၢႆႈၽေး ၸိူဝ်းပိုင်ႈႁူမ်ႈ ယူႇတီႈဝတ်ႉမူၺ်ႇတေႃႇၼၼ်ႉ မၢတ်ႇၸဵပ်းထႅင်ႈ 10 ပၢႆ။

မိူဝ်ႈဝၼ်းထီႉ 19 September 2022 ၶၢဝ်းယၢမ်းဝၢႆးဝၼ်း မွၵ်ႈ 14:00 မူင်း သိုၵ်းမၢၼ်ႈၶဝ်ၸႅၵ်ႇႁဵတ်းသွင်ငႃးသေ ၶဝ်ႈၵႂႃႇၼႂ်းဝဵင်း။ သိုၵ်းမၢၼ်ႈၶဝ်ယူႇတီႈ ဝတ်ႉမူၺ်ႇတေႃႇ၊ ၸႂ်ႉဝတ်ႉမိူၼ်ပဵၼ်တပ်ႉၶဝ် ၶဝ်ႈဢွၵ်ႇတိုၵ်း ၸုမ်းၵႅတ်ႇၶႄၵူၼ်းမိူင်း PDF ၼႂ်းဝဵင်း။ တီႈဝတ်ႉမူၺ်ႇတေႃႇၼၼ်ႉ မီးၵူၼ်းပၢႆႈၽေးမွၵ်ႈ 100 ပိုင်ႈႁူမ်ႈယူႇဝႆႉသေ သိုၵ်းမၢၼ်ႈဢမ်ႇပၼ်ၶဝ် ၵႂႃႇမႃးတၢင်းလႂ်၊ ဢဝ်ၶဝ်ႁဵတ်းႁူဝ်ႉၶႄတူဝ် ၽွင်းပဵၼ်ပၢင်တိုၵ်းၸွမ်း PDF။

ၵူၼ်းပၢႆႈၽေး ၸိူဝ်းတိုၵ်ႉၵိုတ်းယူႇတီႈဝတ်ႉၼၼ်ႉ ၺႃးသိုၵ်းမၢၼ်ႈဢဝ်ၵွင်ႈငႃ ၵုမ်းၶင်ဝႆႉတီႈဝတ်ႉ တေႃႇထိုင်ဝၼ်းထီႉ 26 September 2022 တေႃႇၶဝ်ပေႃးထွၼ်တပ်ႉၶဝ်ဢွၵ်ႇၵႂႃႇ။ မီးၵူၼ်းပၢႆႈၽေးၵမ်ႈၽွင်ႈ ၵူၺ်းဢၼ်ၸၢင်ႈႁႃတၢင်း ပၢႆႈဢွၵ်ႇလွတ်ႈ။

လွင်ႈသိုၵ်းမၢၼ်ႈပိုတ်ႇၼႃႈသိုၵ်းၶၢဝ်းတၢင်းသၢမ်ဝူင်ႈၼႆႉ ႁဵတ်းႁႂ်ႈႁိူၼ်းယေး ၵူၼ်းဝၢၼ်ႈ 100 ပၢႆ ၼႂ်းပွၵ်ႉပွႆးၵူင်း ပွၵ်ႉ 1 ပွၵ်ႉ 2 လႄႈပွၵ်ႉ 3 မိူင်းပၢႆးလူႉၵွႆသေ ႁဵတ်းႁႂ်ႈၵူၼ်းဝၢၼ်ႈႁၢမ်းႁိူၼ်းယေးတီႈယူႇၼႂ်းဝဵင်း။

သိုၵ်းမၢၼ်ႈယင်းတိုၵ်ႉသိုပ်ႇပၵ်းတပ်ႉဢဝ်တီႈယူႇဝႆႉ တီႈလွႆသႅတ်ႉတေႃႇယႃႇ ဢၼ်မီးတၢင်းဝဵင်းမိူင်းပၢႆးသေ ႁဵတ်းႁႂ်ႈၵူၼ်းဝၢၼ်ႈလွမ်မႆႈၸႂ်ၵူဝ်ပဵၼ်ပၢင်တိုၵ်း ဢၼ်ၸၢင်ႈပဵၼ်လႆႈၵူႈၶၢဝ်းယၢမ်း ၼၼ်ႉယူႇၼႆယဝ်ႉ။

ၼႂ်းၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ၼၼ်ႉ တႅမ်ႈဢွၵ်ႇဝႆႉၼင်ႇပႃႈၼိူဝ်ၼၼ်ႉယူႇယဝ်ႉ။ လိူဝ်သေၼၼ်ႉ သင်ၶႂ်ႈတွင်ႈထၢမ်ၶေႃႈမုၼ်းၸိုင် ႁႂ်ႈၵပ်းသိုပ်ႇတွင်ႈထၢမ်လႆႈတီႈ ၸၢႆးႁေႃသႅင် +66 94-728-6696 ၽၢႆႇတႆး၊ ဢင်းၵိတ်း လႄႈ ယိင်းလႅင်းႁၢၼ် +66 62 569 5220 ၽၢႆႇမၢၼ်ႈ ၼႆယူႇယဝ်ႉ။

တႆးလွတ်ႈလႅဝ်း