Slovakia ယိုၼ်ယၼ် တေသူင်ႇႁိူဝ်းမိၼ်တိုၵ်း MiG-29 ပၼ်ယူႇၶရဵၼ်း

ဝၢႆးသေ Czech Republic လႄႈ Slovakia တူၵ်းလူင်းလႆႈၸႂ်ၵၼ် တေဢွၵ်ႇလဵပ်ႈတူၺ်းပိုၼ်ႉတီႈၵၢင်ႁၢဝ်ၼႆသေ Slovakia ၵေႃႈယိုၼ်ယၼ် တေသူင်ႇႁိူဝ်းမိၼ်တိုၵ်း MiG-29 ပၢၼ်သူဝ်ႇပီႇယႅတ်ႉ ပၼ်ယူႇၶရဵၼ်း ဝႃႈၼႆ။

ၸွမ်ၽွင်းလူင် Petr Fiala လၢတ်ႈဝႃႈ Czech Republic တေၸွႆႈလိူဝ်ၽၢႆႇၵၢင်ႁၢဝ်ပၼ် Slovakia တေႃႇထိုင်ႁိူဝ်းမိၼ် F-16 ဢၼ် Slovakia သင်ႇသိုဝ်ႉဝႆႉၼၼ်ႉမႃးထိုင် ဝႃႈၼႆသေတႃႉ Slovakia တိုၵ်ႉယုမ်ႇယမ်ၼမ်ႉၵတ်ႉ ႁိူဝ်းမိၼ်တိုၵ်း MiG-29 လႄႈ တေသူင်ႇႁိူဝ်းမိၼ်သႅၼ်းၼႆႉ ပၼ်ယူႇၶရဵၼ်း တႃႇ 12 လမ်း ဝႃႈၼႆ။

ၸိူင်ႉႁိုဝ်ၵေႃႈလီ လွင်ႈ Slovakia  ပိုၼ်ၽၢဝ်ႇ ယိုၼ်ယၼ်တေသူင်ႇႁိူဝ်းမိၼ်တိုၵ်း MiG-29 ၸွႆႈပၼ်ယူႇၶရဵၼ်း ဝႃႈၼႆသေတႃႉ ၵူၺ်းၵႃႈ Slovakia တေသူင်ႇႁိူဝ်းမိၼ်တိုၵ်း MiG-29 ၶဝ်ႈၼင်လိၼ်ယူႇၶရဵၼ်းပွတ်းတွၼ်ႈလႂ် ၼႆၼၼ်ႉတႄႉပႆႇႁူႉတႅတ်ႈတေႃး။ ယွၼ်ႉဝႃႈ ၸၢင်ႈထုၵ်ႇရၢတ်ႉသျႃး ယိုဝ်းပႅတ်ႈ၊ ဢမ်ႇၸၢင်ႈထိုင် ယူႇၶရဵၼ်း လႄႈ လွင်ႈ Slovakia တေသူင်ႇႁိူဝ်းမိၼ်တိုၵ်း ၸွႆႈယူႇၶရဵၼ်းၼၼ်ႉ ၸၢင်ႈပဵၼ်ၵၢၼ်ၸၼ်ၸုမ်း NATO ၶဝ်ႈပၢင်တိုၵ်း ၸွမ်းၵမ်းသိုဝ်ႈ ဝႃႈၼႆ။

တႄႇၸဵမ်မိူဝ်ႈလိူၼ် February 2022 ပူၼ်ႉမႃး Slovakia လႆႈၸွႆႈပၼ် တပ်ႉသိုၵ်းယူႇၶရဵၼ်း မိူၼ်ၼင်ႇ ႁိူဝ်းမိၼ်မႅင်းမီႈ 5 လမ်း မၢၵ်ႇလူင်သႅၼ်းယိုဝ်းၵႆ 122 mm တူၵ်းမႅၼ်ႈသၢင်ႉငိုၼ်း 160 လၢၼ်ႉတေႃႇလႃႇဢမေႇရိၵၢၼ်ႇ  လႄႈတေတႅပ်းတတ်း ၸွႆႈၵႃးၵၢပ်ႇလဵၵ်း ပၼ်ယူႇၶရဵၼ်းထႅင်ႈတႃႇ 30 လမ်း ဝႃႈၼႆ။

သိုဝ်ႇၶၢဝ်ႇၼႂ်းပိုၼ်ႉတီႈလၢႆးငၢၼ်းဝႃႈ  ရၢတ်ႉသျႃး ၸႂ်ႉႁိူဝ်းမိၼ်တိုၵ်း ဢၼ်ၶိုတ်းၵၢပ်ႈ သႅၼ်း Sukhoi Su-57 ၶဝ်ႈတိုၵ်းၼႂ်းယူႇၶရဵၼ်းမႃး 3 ဝူင်ႈယဝ်ႉ ဝႃႈၼႆ။

တႆးလွတ်ႈလႅဝ်း