SSPP ၽေႃႇပၢင်တိုၵ်းပွတ်း လၢႆးၶႃႈ၊ မိူင်းၼွင် လႄႈ ထႅမ်ႁႅင်းသိုၵ်း တင်းၼမ် ၽွင်းၶၢဝ်းၵိၼ် ၶၢဝ်းလူႇ သၢင်းၵျၢၼ်ႇ

ၼႂ်းၶၢဝ်းတၢင်းလၢႆဝၼ်းမႃးၼႆႉ ၸုမ်းသိုၵ်းလေႃးလႄး SSPP ဢဝ်ႁႅင်းသိုၵ်းတင်းၼမ်သေ လေႃႇတိုၵ်းတပ်ႉ ပၢင်သဝ်း RCSS/SSA ၼႂ်းၸႄႈဝဵင်းမိူင်းၼွင်၊ ၸႄႈဝဵင်းလၢႆးၶႃႈ လၢႆလၢႆပိုၼ်ႉတီႈႁၢဝ်းႁႅင်းဝႆႉလႄႈ ႁဵတ်းႁႂ်ႈပေႃႈမႄႈၵူၼ်းမိူင်း လႆႈပၢႆႈလႆႈၼီ ယွၼ်ႉပၢင်တိုၵ်းၼႆႉတင်းၼမ် ၽွင်းၶၢဝ်းသၢင်းၵျၢၼ်ႇ။

မိူဝ်ႈၼႆႉဝၼ်းထီႉ 14 April 2023 (လိူၼ်ႈႁႃႈလွင်ႈ 10 ၶမ်ႈ ပီႊတႆး 2117 ၼီႈ) တင်ႈတႄႇၶၢဝ်းယၢမ်းၵၢင်ၼႂ် 06:00 မူင်း မႃးၼႆႉ ယူႇတီႈၸုမ်းသိုၵ်းလေႃးလႄး ဢၼ်သႂ်ႇသိူဝ်ႈၶူဝ်းမိၵ်ႈမၢႆ SSPP ၼၼ်ႉ ဢဝ်ႁႅင်းသိုၵ်းတင်းၼမ်ၶိုၼ်ႈလေႃႇတိုၵ်း တပ်ႉပၢင်သဝ်း RCSS/SSA တီႈလွႆတိင်ႇ ဢၼ်ပၵ်းသဝ်းဝႆႉ ၽၢႆႇၸဵင်ႇႁွင်ႇဝၼ်းတူၵ်းဝၢၼ်ႈၸိင်း ၸႄႈဝဵင်းမိူင်းၼွင် ႁၢဝ်ႈႁႅင်းဝႆႉလႄႈ တေႃႇထိုင်ၶၢဝ်းယၢမ်း 08:30 ၼႆႉၵေႃႈ သဵင်ၵွင်ႈယင်းပႆႇယဵၼ် ၼႆယဝ်ႉ။

မိူဝ်ႈဝႃးဝၼ်းထီႉ 13 April 2023 ၼၼ်ႉၵေႃႈၸုမ်းသိုၵ်းလေႃးလႄး SSPP ၶဝ်ဢဝ်ၶိူင်ႈလူင် မိူၼ်ၼင်ႇ ၵွင်ႈၸၢၵ်ႈ 54 လႄႈ မၢၵ်ႇ 60 mm 80 mm ၸိူဝ်းၼႆႉယိုဝ်းၶိုၼ်ႈတီႈတပ်ႉပၢင်သဝ်း RCSS တီႈလွႆတိင်ႇလႄႈ သွင်ၽၢႆႇၸင်ႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း လႆႈႁူႉဝႃႈၸုမ်းသိုၵ်းလေႃးလႄးၶဝ် ၸႂ်ႉႁႅင်းသိုၵ်းၵူၼ်းမိူင်း ၶိုၼ်ႈၼႃႈသေ ဢၼ်ယူႇၽၢႆႇလင်သမ်ႉဢဝ်ၶိူင်ႈလူင်ယိုဝ်းပိုတ်ႇတၢင်းပၼ်လႄႈ ႁဵတ်းႁႂ်ႈၽၢႆႇၶိုၼ်ႈၼႃႈ ၼၼ်ႉ လူႉတၢႆမၢတ်ႇၸဵပ်းၼမ်ၼႆယူႇ၊ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈၵုင်းယိုဝ်ႉ၊ ၼွင်ၵိုၼ်၊ ပၢင်သၢင်း လၢႆးၶႃႈ၊  ၽၢႆမွင်ႉ ၸမ်ႁိမ်းဝၢၼ်ႈတူင်ႈ မိူင်းၼွင်၊ ၼႃးႁူဝ်ၽၢႆႇတူၵ်းၼမ်ႉမွင် မိူင်းယၢင်း ၸိူဝ်းၼႆႉၵေႃႈ သွင်ၽၢႆႇပိုတ်းယိုဝ်းၵၼ်ႁၢဝ်ႈႁႅင်း။

မိူဝ်ႈၼႂ်းဝၼ်းထီႉ 12 April 2023 ၶၢဝ်းယၢမ်းၵၢင်ၼႂ် 07:00 မူင်းပၢႆၼၼ်ႉ ယွၼ်ႉၽၢႆႇၸုမ်းသိုၵ်းလေႃးလႄး SSPP ၶဝ် သွၵ်ႈတဝ်ႁႃၵေႃႉႁၢၼ် RCSS/SSA ပွတ်းဝၢၼ်ႈတူင်ႈ၊ လူင်ယၢၼ်း ဢၼ်မီးၽၢႆႇၸၢၼ်း မိူင်းၼွင်ၸိူဝ်းၼၼ်ႉလႄႈ သွင်ၽၢႆႇလႆႈၽႃႇၺႃးၵၼ်သေ လႆႈပိုတ်းယိုဝ်းၵၼ်ႁၢဝ်ႈႁႅင်း ယူႇယဝ်ႉ။ ၼႂ်းဝၼ်းလဵဝ်ၵၼ်ၼၼ်ႉၵူၺ်း ၶၢဝ်းယၢမ်း 10:00 မူင်းပၢႆ ၽၢႆႇၵေႃႉႁၢၼ် RCSS လူင်းၵူတ်ႇထတ်း လွင်ႈႁူမ်ႈလူမ်ႈပိုၼ်ႉတီႈလႄႈ လႆႈၽႃႇၺႃး ၸုမ်းသိုၵ်းလေႃးလႄး SSPP ၶဝ်သေ သွင်ၽၢႆႇလႆႈပိုတ်းယိုဝ်း ၵၼ်ၼႂ်းၵႄႈ ဝၢၼ်ႈမွၵ်ႇၸၢမ် လႄႈ ဝၢၼ်ႈႁူဝ်တိုဝ်ႉႁၢဝ်ႈႁႅင်းဝႆႉ ၼႆယဝ်ႉ။

ၼႂ်းဝၼ်းထီႉ 11 April 2023 ၼၼ်ႉၵေႃႈ ၸုမ်းသိုၵ်းလေႃးလႄး SSPP ၶဝ် ပိုတ်းယိုဝ်းသၢႆသိုၵ်း RCSS/SSA ဢၼ်တူင်ႉၼိုင်ပွတ်း ဝၢၼ်ႈမၢၵ်ႇလၢင်း၊ ဝၢၼ်ႈၼွင်ၵိုၼ် ၸွမ်းၸိူဝ်းၼမ်ႉတွၼ် ၽၢႆႇဢွၵ်ႇဝဵင်းလၢႆးၶႃႈ ၼၼ်ႉလႄႈ သွင်ၽၢႆႇၶိုၼ်းလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇယဝ်ႉ။ လိူဝ်သေၼၼ်ႉဢမ်ႇၵႃး မိူဝ်ႈပူၼ်ႉ မႃးၼႂ်းဝၼ်းထီႉ 9 April 2023 ၼၼ်ႉ ၸုမ်းသိုၵ်းလေႃးလႄးဢဝ်ႁႅင်းသိုၵ်းတင်းၼမ် တင်ႈၸႂ်မႃးပိုတ်းယိုဝ်း ပၢင်သဝ်းၸူဝ်ႈၶၢဝ်း RCSS/SSA တီႈလွႆတဝ်ႇ ႁိမ်းၸလၢႆးလွႆ ၽၢႆႇဢွၵ်ႇဝဵင်းလၢႆးၶႃႈႁၢဝ်ႈႁႅင်းဝႆႉ ၼႆယဝ်ႉ။

ယွၼ်ႉၸုမ်းသိုၵ်းလေႃးလႄး ဢဝ်ႁႅင်းသိုၵ်းၸွမ်းပိုတ်းယိုဝ်း RCSS/SSA လၢႆလၢႆပိုၼ်ႉတီႈၼႂ်း ၸႄႈဝဵင်းမိူင်း ၼွင်၊ လၢႆးၶႃႈ ႁၢဝ်ႈႁႅင်းလႄႈ ႁဵတ်းႁႂ်ႈပေႃႈမႄႈၵူၼ်းမိူင်းဢၼ်ယူႇၼႂ်းပိုၼ်ႉတီႈ မိူၼ်ၼင်ႇ ဝၢၼ်ႈမၢၵ်ႇလၢင်း၊ ဝၢၼ်ႈမွၼ်း၊ ဝၢၼ်ႈၵၢင်းဢုၼ်၊ ဝၢၼ်ႈၸလၢႆးလွႆ၊ ဝၢၼ်ႈသၢင်း၊ ဝၢၼ်ႈမၢၵ်ႇၵွၵ်ႇ၊ ဝၢၼ်ႈႁူဝ်ၼမ်ႉၸိူဝ်းၼႆႉ လႆႈပၢႆးၽေးပၢင်တိုၵ်းသိုၵ်းသိူဝ် ႁၢဝ်ႈႁႅင်းဝႆႉ၊ ၵဵဝ်ႇလူၺ်ႈလွင်ႈၼႆႉသေ သိုဝ်ႇၶၢဝ်ႇ SSPP Info ဢၼ်ပဵၼ်သိုဝ်ႇတၢင်တူဝ်မုၵ်ႉၸုမ်း SSPP ၼၼ်ႉ တင်ႈၸႂ်ဢွၵ်ႇၶၢဝ်ႇၽိတ်းၽူၼ်ဝႆႉဝႃႈ RCSS ပဵၼ်ၽၢႆႇပိုတ်ႇပၢင်တိုၵ်းၸူးၸုမ်း SSPP ဢွၼ်တၢင်းၼႆယဝ်ႉ၊ တီႈတႄႉမၼ်းၸွမ်းပိုၼ်ႉတီႈၸိူဝ်းဢၼ် ပဵၼ်ပၢင်တိုၵ်းယူႇၼႆႉ ပဵၼ်ပိုၼ်ႉတီႈဢၼ်တပ်ႉသိုၵ်ႈၸိုင်ႈတႆး RCSS/SSA တူင်ႉၼိုင်ယူႇသဝ်းတႃႇသေႇ၊ ၼႆယဝ်ႉ။

မိူဝ်ႈလဵဝ်ၵေႃႈ SSPP ၸုမ်းလေႃးလႄး ဢဝ်ႁႅင်းသိုၵ်းပွတ်းႁွင်ႇ တိုၵ်ႉၽိူမ်ႉထႅမ်ႁႅင်းမုင်ႈၼႃႈပၢင်တိုၵ်းပွတ်း လၢႆးၶႃႈ၊ မိူင်းၼွင် တင်းၼမ်ၼႆယဝ်ႉ။

တႆးလွတ်ႈလႅဝ်း