UN ပၼ်ၾၢင်ႉ ႁႅင်းမႆႈတေတိူဝ်းသုင်ၶိုၼ်ႈႁႅင်း ထိုင်တီႈၵူၼ်းဢမ်ႇၸၢင်ႈယူႇလႆႈ

ၸၢတ်ႈၸိုင်ႈလုမ်ႈၾႃႉ UN ပၼ်ၾၢင်ႉဝႃႈ ႁႅင်းမႆႈတေႁၢႆႉႁႅင်းၶိုၼ်ႈမႃးထႅင်ႈ လၢႆပွတ်းတွၼ်ႈၶွင်လုမ်ႈၾႃႉ ၼႂ်းၶၢဝ်းတၢင်းလၢႆသိပ်းပီႊၼႆႉ တေႁဵတ်းႁႂ်ႈ ၵူၼ်းဢမ်ႇၸၢင်ႈယူႇသၢင်ႈသဝ်းလႆႈလႄႈ တေမီးၵူၼ်းလူႉသဵင်ႈတၢႆတင်းၼမ် ၼႆယဝ်ႉ။

လၢမ်းၶၢတ်ႈဝႆႉဝႃႈ ႁွၼ်ႁႅင်းမႆႈၼၼ်ႉ တေတိူဝ်းၶိုၼ်ႈသုင်ႁႅင်း ၼႂ်းပွတ်းတွၼ်ႈ Sahel ၊ ဢႅၾရိၵၸဵင်ႇႁွင်ႇဝၼ်းဢွၵ်ႇ ႁူမ်ႈပႃး ဢေးသျႃးပွတ်းၸၢၼ်း လႄႈ ပွတ်းၸဵင်ႇၸၢၼ်းဝၼ်းတူၵ်း ၸိူဝ်းၼႆႉ တေႁၢႆႉႁႅင်းၶိုၼ်ႈမႃးထႅင်ႈ၊ တေမီးပၼ်လွင်ႈယၢပ်ႇၽိုတ်ႇဢၼ်ယႂ်ႇလူင်လႄႈ တေမီးၵူၼ်းလူႉသဵင်ႈတၢႆတင်းၼမ် ၼႆၼၼ်ႉယဝ်ႉ။

ၸွမ်းၼင်ႇလၢႆးငၢၼ်းၼၼ်ႉ မီးၶေႃႈမၵ်းတမ်းၸႅင်ႈလႅင်းဝႃႈ ၵူၼ်းဢၼ်ႁူပ်ႉၺႃး ႁႅင်းမႆႈႁၢဝ်ႈႁႅင်း လႄႈ လွင်ႈၵတ်းႁႅင်းၼၼ်ႉ တေဢမ်ႇၸၢင်ႈမီးသၢႆၸႂ်ယူႇလွတ်ႈလႆႈ ၼႆယူႇ။

ယွၼ်ႉၼၼ် ၽွၼ်းတုမ်ႉယွၼ်ႈၼႆႉ တေႁဵတ်းႁႂ်ႈမီးလွင်ႈတုၵ်ႉယၢၵ်ႈႁၢဝ်ႈႁႅင်းမႃး၊ ၵၢၼ်လူႉသဵင်ႈတၢႆၼမ်မႃး၊ လွင်ႈၵူၼ်းၶၢႆႉတီႈယူႇၼမ်မႃးလႄႈ လွင်ႈဢမ်ႇၽဵင်ႇပဵင်းၵၼ် ၼၼ်ႉၵေႃႈ တေၵိူတ်ႇၶိုၼ်ႈမႃးၸွမ်း ယူႇယဝ်ႉ။

ႁႅင်းမႆႈသုင်ႁႅင်းၼႆႉ လၢတ်ႈလႆႈဝႃႈ ပဵၼ်ၽေးတဵတ်ႇယဵၼ်ႁၢႆႉႁႅင်း ဢၼ်ႁဵတ်းႁႂ်ႈၵူၼ်းလူႉသဵင်ႈတၢႆယူႇၵူႈပီႊ၊ ၽေးၶႅၼ်လူင်ၼႆႉၵေႃႈ တိူဝ်းၶိုၼ်ႈမႃးယူႇတိၵ်းတိၵ်း ထိုင်တီႈပဵၼ်ၽေးလူင်ဢၼ်တိုၼ်ႇသၢၼ်ႈၵူဝ်ဝႆႉ ယွၼ်ႉၾိင်ႈၾႃႉလႅၵ်ႈလၢႆႈ ၼၼ်ႉယဝ်ႉ။

ၼႂ်းလၢႆးငၢၼ်းၼၼ်ႉမီးဝႃႈ ႁူဝ်ၼပ်ႉၵူၼ်းလူႉသဵင်ႈတၢႆယွၼ်ႉႁႅင်းမႆႈသုင်ႁႅင်း ၼႂ်းၶၢဝ်းတၢင်းၼႃႈ ဢၼ်ၶၢတ်ႈလၢမ်းဝႆႉၼၼ်ႉ လႆႈဝႃႈလီတူၵ်းၸႂ်ဝႆႉယူႇ သင်ဢဝ်မႃးတႅၵ်ႈတူၺ်းတင်း လွင်ႈႁၢႆႉႁႅင်းၵူၼ်းပဵၼ်ၼၼ်ႉၼႆ မိူၼ်ၼင်ႇ ၵူၼ်းပဵၼ်ၵႅၼ်ႇသႃႇၵူႈမဵဝ်း၊ ၵူၼ်းတိတ်းၸပ်းတၢင်းပဵၼ်ၽႄႈလၢမ်းၸူးၵၼ်၊ ႁႅင်းၵၢၼ်ၽၢႆႇၽုၵ်ႇသွမ်ႈ၊ လုၵ်ႈဢွၼ်ႇ၊ ၵူၼ်းဢႃႇယုယႂ်ႇ၊ မႄႈပႃးတွင်ႉ၊ မႄႈလဵင်ႉၼူမ်းၸိူဝ်းၼႆႉ  ၸၢင်ႈႁဵတ်းႁႂ်ႈ ပဵၼ်ၶႆႈၸဵပ်းၼၢဝ်လႄႈ လူႉတၢႆလႆႈ ယွၼ်ႉႁႅင်းမႆႈၶိုၼ်ႈသုင်ၼၼ်ႉၼႆယဝ်ႉ။

သင်ၸိူဝ်ႉဝႃႈ ဢမ်ႇလူတ်းယွမ်းလွင်ႈပွႆႇလူမ်းဝူၺ်ႇႁင်ႈၼႆ တေပဵၼ်လွင်ႈတၢင်းဢၼ်ႁဵတ်းႁႂ်ႈ ၾိင်ႈၾႃႉလႅၵ်ႈလၢႆႈမႃးသေ လုမ်ႈၾႃႉၵေႃႈ တေလိူတ်ႇမႆႈမႃးတေႉတေႉယဝ်ႉ တေထူပ်းႁႅင်းမႆႈဢၼ်လိူတ်ႇႁွၼ်ႉလိူဝ်ပိူၼ်ႈ ဢၼ်ဢမ်ႇယၢမ်ႈထူပ်းမႃးသေပွၵ်ႈၼၼ်ႉယူႇ။

ယင်းပၼ်ၾၢင်ႉထႅင်ႈဝႃႈ ၽေးလူင်ဢၼ်လုၵ်ႉမႃးတီႈႁွၼ်ႁႅင်းမႆႈ လၢႆလၢႆမိူင်းၼႂ်းပီႊၼႆႉ မိူၼ်ၼင်ႇ Somalia လႄႈ ပႃႇၵိတ်ႉသ်တၢၼ်ႇၼၼ်ႉ ၼႄႁႂ်ႈႁၼ်ဝႃႈ မိူဝ်းၼႃႈမႃး တေမီးငဝ်းလၢႆးၶိုၵ်ႉၶၵ်ႉ ၽၢႆႇသုၼ်ႇလႆႈသုၼ်ႇပဵၼ်ၵူၼ်း ၵဵဝ်ႇလူၺ်ႈလွင်ႈႁႅင်းမႆႈတိူဝ်းၶိုၼ်ႈႁၢဝ်ႈႁႅင်းမႃးလိူဝ်ၵဝ်ႇ ၼႆယဝ်ႉ။

တႆးလွတ်ႈလႅဝ်း