UNOCHA ပိုၼ်ၽၢဝ်ႇဝႃႈ ၼႂ်းလိူၼ် August 2022 ၼႆႉၵူၺ်း ၵူၼ်းပၢႆႈၽေး တိူဝ်းမႃးထႅင်ႈ 1 သႅၼ်ပၢႆ

မိူဝ်ႈဝၼ်းထီႉ 5 September 2022 (လိူၼ်သိပ်းမႂ်ႇ 11 ၶမ်ႈ ပီႊတႆး 2116 ၼီႈ) ၸုမ်းႁၼ်ထိုင်ၸွႆႈထႅမ်ၵူၼ်းၼင်ႇၵၼ် ၸၢတ်ႈၸိုင်ႈလုမ်ႈၾႃႉ UNOCHA ပိုၼ်ၽၢဝ်ႇဝႃႈ ၼႂ်းလိူၼ် August 2022 ပူၼ်ႉမႃးၼႆႉၵူၺ်း ၵူၼ်းပၢႆႈၽေး တီႈၼႂ်းမိူင်းႁူမ်ႈတုမ် တိူဝ်းမႃးထႅင်ႈ 1 သႅၼ်ပၢႆ ဝႃႈၼႆ။

တေႃႇထိုင်သဵင်ႈလိူၼ် July 2022 ၼၼ်ႉ ၵူၼ်းပၢႆႈၽေး မီး 860,000 ပၢႆၵူၺ်း ဝႃႈၼႆသေတႃႉ ထိုင်မႃးၼႂ်းလိူၼ် August 2022 သမ်ႉ ၵူၼ်းပၢႆႈၽေး မီးထိုင် 970,000 ပၢႆ၊ သဵၼ်ႈသၢႆမၢႆၵူၼ်းပၢႆႈၽေးၼႆႉ ပေႃးမႃးႁူမ်ႈၵၼ်တင်း ႁူဝ်ၼပ်ႉၵူၼ်းပၢႆႈၽေး 330,000 ပၢႆ မိူဝ်ႈသိုၵ်းမၢၼ်ႈ ဢမ်ႇပႆႇယိုတ်းဢၢမ်းၼၢတ်ႈၼၼ်ႉပေႃးၼႆၸိုင် ၵူၼ်းပၢႆႈ ၽေးႁူမ်ႈတင်းမူတ်း မီးၵႂႃႇ 1.3 လၢၼ်ႉပၢႆယဝ်ႉ  ဝႃႈၼႆ။

ဝၢႆးသိုၵ်းမၢၼ်ႈ ယိုတ်းဢၢမ်းၼၢတ်ႈယဝ်ႉ ၵူၼ်းမိူင်းဢၼ်လႆႈပၢႆႈၽေးၼမ်သေပိူၼ်ႈ ပဵၼ်ၼႂ်းတိူင်းၸႄႈၵႅင်းသေ ႁူဝ်ၼပ်ႉၵူၼ်းပၢႆႈၽေး မီး 520,000 ပၢႆ၊ တီႈတိူင်းမၵူၺ်းသမ်ႉ ႁူဝ်ၼပ်ႉၵူၼ်းပၢႆႈၽေး မီး 98,000 ပၢႆ၊ လိူဝ်သေၼၼ်ႉတႄႉ ပဵၼ်တီႈ မိူင်းယၢင်း၊ မိူင်းယၢင်းလႅင်၊ မိူင်းရၶႅင်ႇ၊ မိူင်းၶၢင်၊ မိူင်းတႆး၊ မိူင်းမွၼ်း၊ တိူင်းပႃႇၵိူဝ်၊ တိူင်းတၼိၼ်းတႃႇယီႇ(တၼၢင်းသႃႇယီႇ) ၸိူဝ်းၼႆႉ ဝႃႈၼႆ။

ၵမ်ႈၼမ်တႄႉၵေႃႈ ပဵၼ်ပိုၼ်ႉတီႈဢၼ်မီးလွင်ႈယၢပ်ႇၽိုတ်ႇ တႃႇတေၵႂႃႇၸွႆႈထႅမ် လူလွမ်တူၺ်းထိုင်ၵူၼ်းၼင်ႇၵၼ်ၼၼ်ႉ ဝႃႈၼႆ။

ပႅၵ်ႉသမ်ႉဝႃႈ မီးလွင်ႈယၢပ်ႇၽိုတ်ႇသေတႃႉ မိူဝ်ႈၵၢင်ပီႊ 2022 ၼႆႉ ၸုမ်းႁၼ်ထိုင် ၸွႆႈထႅမ်ၵူၼ်းၼင်ႇၵၼ်ႇ လႆႈၸွႆႈထႅမ်ၵူၼ်းပၢႆႈၽေးၶဝ်ၵႂႃႇ တႃႇႁူဝ်ၼပ်ႉၵူၼ်း 3.1 လၢၼ်ႉသေ ၸိူဝ်းဢၼ်ဢမ်ႇပႆႇလႆႈႁပ်ႉတၢင်းၸွႆႈထႅမ်ၼၼ်ႉၵေႃႈ တိုၵ်ႉၶတ်းၸႂ်ႁဵတ်းသၢင်ႈ ႁႂ်ႈလႆႈႁပ်ႉတၢင်းၸွႆႈထႅမ်ယူႇ ဝႃႈၼႆ။

ဝႃႈၼၼ်သေတႃႉၵေႃႈ တႃႇၵူၼ်းပၢႆႈၽေး ၼႂ်းၸိုင်ႈတႆးတႄႉ တိုၵ်ႉလႆႈႁပ်ႉတၢင်းၸွႆႈထႅမ်တီႈ ၸုမ်းသင်ႇၶတႆး လႄႈ ၸုမ်းတူင်ႇဝူင်းၵူၼ်းတႆး ၼႂ်းမိူင်း/ၼွၵ်ႈမိူင်း ႁူမ်ႈပႃး ၽူႈမီးၼမ်ႉၸႂ် မိူင်းၵျႃႇပၢၼ်ႇ  Japan Myanmar Friendship Association (JMFA) & MSFF (Japan) ၶဝ်ၸွႆႈထႅမ်ဝႆႉၵူၺ်း ၼႆယဝ်ႉ။

တႆးလွတ်ႈလႅဝ်း