တပ်ႉသိုၵ်းမၢၼ်ႈ လႄႈ တပ်ႉသိုၵ်းရၶႅင်ႇ AA ႁူပ်ႉထူပ်းဢုပ်ႇဢူဝ်းၵၼ်တီႈ ပၢင်သၢင်း

မိူဝ်ႈဝႃး ဝၼ်းထီႉ 9 December 2020 (လိူၼ်သိပ်းသွင်လွင်ႈ 10 ၶမ်ႈ ပီႊတႆး 2114 ၼီႈ) ၽူႈတၢင်တူဝ် တပ်ႉသိုၵ်းမၢၼ်ႈ လႄႈ ၽူႈတၢင်တူဝ် တပ်ႉသိုၵ်းရၶႅင်ႇ AA ႁူပ်ႉထူပ်းဢုပ်ႇဢူဝ်းၵၼ်တီႈ ဝဵင်းပၢင်သၢင်း မိူင်းတႆးပွတ်းဢွၵ်ႇ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ဢူးၺီႇရၢၼ်း ၽူႈၶၢၼ်ပၢၵ်ႇ တပ်ႉသိုၵ်း UWSA လၢတ်ႈတီႈသိုဝ်ႇၶၢဝ်ႇဝႃႈ လွင်ႈၽူႈတၢင်တူဝ် တပ်ႉသိုၵ်းမၢၼ်ႈ လႄႈ ၽူႈတၢင်တူဝ် တပ်ႉသိုၵ်းရၶႅင်ႇ AA ႁူပ်ႉထူပ်းဢုပ်ႇဢူဝ်း ၵၼ်ၼႆႉ မၢၼ်ႇမႅၼ်ႈယူႇ၊ ၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ယွၼ်ႉပိူဝ်ႈဢမ်ႇပႃးႁဝ်းၶႃႈလႄႈ ႁူပ်ႉထူပ်းဢုပ်ႇဢူဝ်းၵၼ်သင် လၢႆလၢႆဢၼ်ဝႃႈၼၼ်ႉတႄႉ ႁဝ်းၶႃႈဢမ်ႇလႆႈႁူႉၸွမ်း ဝႃႈၼႆ။

မိူဝ်ႈဝၼ်းထီႉ 2 December 2020 (လိူၼ်သိပ်းသွင်လွင်ႈ 3 ၶမ်ႈ ပီႊတႆး 2114 ၼီႈ) ၼၼ်ႉ တပ်ႉသိုၵ်းရၶႅင်ႇ AA ပိုၼ်ၽၢဝ်ႇဝႆႉဝႃႈ ၽူႈမီးၸၼ်ႉသုင် သိုၵ်းမၢၼ်ႈ လႄႈ သိုၵ်းရၶႅင်ႇ AA ဢုပ်ႇဢူဝ်းၵၼ်ၼိူဝ်ဢွၼ်ႇလၢႆး Online တႃႇၶၢဝ်းတၢင်း (30) မိၼိတ်ႉ ဢမ်ႇၼၼ် ၶိုင်ႈၸူဝ်ႈမူင်း ၼႂ်းဝၼ်းထီႉ 25 November 2020 သေ ၼႂ်းပၢင်ဢုပ်ႇဢူဝ်းၼၼ်ႉ လႆႈဢုပ်ႇဢူဝ်းၵၼ်ၵႂႃႇ မီးယူႇ (3) ၶေႃႈ၊ (1) ဢုပ်ႇဢူဝ်းၵၼ် လွင်ႈတႃႇတေၸတ်းႁဵတ်းပၢင်လိူၵ်ႈတင်ႈ ၼႂ်း (9) ၸႄႈဝဵင်း မိူင်းရၶႅင်ႇ၊ (2) ဢဝ်လွင်ႈႁူမ်ႇလူမ်ႈ ၼႂ်းၵၢၼ်တေႃႉသူင်ႇၶဝ်ႈၼမ်ႉတၢင်းၵိၼ်၊ ၵမ်ႉထႅမ်ပၼ်လွင်ႈယူႇသၢင်ႈ ၵိၼ်သဝ်း၊ ၶိူင်ႈၵမ်ႉၵႅမ်ပၢႆးယူႇလီၵူၼ်းမိူင်း လႄႈ (3) ႁႂ်ႈသိုပ်ႇထိင်းသိမ်း လွင်ႈယုမ်ႇယမ်၊ လွင်ႈပွင်ႇၸႂ်လႄႈ လွင်ႈမိုတ်ႈၵိုဝ်းၼႂ်းၵႄႈၵၢင်သွင်ၽၢႆႇ ၼႆယဝ်ႉ။

ၽူႈမီးၸၼ်ႉသုင် သိုၵ်းမၢၼ်ႈ လႄႈ သိုၵ်းရၶႅင်ႇ AA လႆႈဢုပ်ႇဢူဝ်းၵၼ်ၼိူဝ် Online သေတႃႉ မိူဝ်ႈဝၼ်းထီႉ 1 December 2020 သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းၽၢႆႇလဵဝ်ၼၼ်ႉ ယင်းတိုၵ်ႉသႂ်ႇပႃးဝႃႈ ၼွၵ်ႈလိူဝ်သေပိုၼ်ႉတီႈ ဢၼ်ၸုမ်းၵေႃႇၵၢၼ်ႁၢႆႉ တူင်ႉၼိုင်ယဝ်ႉ သိုၵ်းမၢၼ်ႈတေၵိုတ်းတိုၵ်းၽၢႆႇလဵဝ် တႄႇဝၼ်းထီႉ 01 December 2020 တေႃႇထိုင် ဝၼ်းထီႉ 31 December 2020 တႃႇၶၢဝ်းတၢင်းထႅင်ႈ (1) လိူၼ် တေႃႇထိုင် ပီႊ 2020 သဵင်ႈ ၼႆယဝ်ႉ။ 

တႆးလွတ်ႈလႅဝ်း