ၸုမ်းတႆးၽွမ်ႉၵၼ် ထုင်ႉမၢဝ်း ၸွႆႈလူႇတၢၼ်းငိုၼ်း ၼႂ်းၵၢၼ်သႃႇသၼႃႇ လႄႈ ၸွႆႈထႅမ်  ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်တူင်ႉၼိုင်ဝႆႉယူႇတီႈၼႂ်းၼႃႈသိုၵ်းတီႈၼိုင်ႈ ဝႃႈၼႆ။

မိူဝ်ႈဝၼ်းထီႉ 4 September 2022 (လိူၼ်သိပ်းမႂ်ႇ 10 ၶမ်ႈ ပီႊတႆး 2116 ၼီႈ) ၸုမ်းတႆးၽွမ်ႉၵၼ် လႆႈဢဝ်တူဝ်ငိုၼ်း ဢၼ်ၽူႈမီးၼမ်ႉၸႂ် ၸေႇတၼႃႇၽိူၵ်ႇၸိုၼ်ႈၶၢဝ်သႂ် ႁူမ်ႈႁွမ်းမႃး ၵူႈတီႈၵူႈတၢင်းၼၼ်ႉ ၶိုၼ်းလႆႈသိုပ်ႇ ၸွႆႈလူႇတၢၼ်းပၼ်တီႈ ၸဝ်ႈၶူးၺႃႇၼသီႇရိ (ၸဝ်ႈမၢၼ်ႇ တႃဢွၼ်ႇ) ဢၼ်ပဵၼ်ႁူဝ်ၼႃႈၵိင်ႇၽႄ မုၵ်ႉၸုမ်းလူင်သင်ႇၶၸိုင်ႈတႆး မိူင်းတႆးပွတ်းဢွၵ်ႇၶူင်း တႃႇသၢင်ႉငိုၼ်းမၢၼ်ႈ 20 သႅၼ်ပျႃး ပိူဝ်ႈတႃႇႁူင်းႁေႃၼႄပိုၼ်း ၸဝ်ႈပေႃႈသိလ်ထမ်းၶူးဝႃး ဝုၼ်းၸုမ်ႉ သေဢမ်ႇၵႃး ၸွႆႈလူႇတၢၼ်းပၼ်တီႈ ၽူႈမီးပုၼ်ႈၽွၼ်း ၵွင်းမူးပုတ်ႉထၵႃႇယႃႇ မိူင်းၽူင်း 30 သႅၼ်ပျႃး မိူၼ်ၵၼ် ဝႃႈၼႆ။

ၼႂ်းဝၼ်းလဵဝ်ၵၼ်ၼႆႉၵူၺ်းၼင်ႇၵဝ်ႇ ၸုမ်းတႆးၽွမ်ႉၵၼ်ၵေႃႈ လႆႈၸွႆႈထႅမ်ငိုၼ်းတွင်းတီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA တႃႇသၢင်ႉငိုၼ်းမၢၼ်ႈ 500,000 ပျႃး (ႁႃႈသႅၼ်ပျႃးတဵမ်တဵမ်) ဢိၵ်ႇတင်း ၸွႆႈထႅမ်ပၼ်တီႈ ႁွင်ႈၵၢၼ်ၽၢႆႇပိုၼ်ၽၢဝ်ႇ ၶွင်ႇသီႇဢဝ်ၶိုၼ်း ၸိုင်ႈတႆး (RCSS) တႃႇသၢင်ႉငိုၼ်းမၢၼ်ႈ 500,000 ပျႃး (ႁႃႈသႅၼ်ပျႃးတဵမ်တဵမ်) ႁႂ်ႈလႆႈပဵၼ် ငိုၼ်းတွင်းတႃႇသိုဝ်ႉၶိူင်ႈၵမ်ႉၵႅမ်ၵူႈလွင်ႈလွင်ႈ ၼႂ်းႁွင်ႈၵၢၼ်ၵႂႃႇ ဝႃႈၼႆ။

ယူႇတီႈၽူႈမီးပုၼ်ႈၽွၼ်း RCSS/SSA ၵေႃႈ လႆႈတၢင်တူဝ်ၵေႃႉသိုၵ်းၵေႃႉႁၢၼ်ၶဝ်တင်းသဵင်ႈသေ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၸုမ်းတႆးၽွမ်ႉၵၼ် ထုင်ႉမၢဝ်း လႄႈ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ႁဝ်းၶဝ် ၵူႈၵေႃႉၵူႈၸဝ်ႈ တေႉတေႉဝႃႈဝႃႈ ယူႇယဝ်ႉ။

မိူဝ်ႈဝၼ်းထီႉ 7 August 2022 ပူၼ်ႉမႃးၼႆႉၵေႃႈ ဢၼ်ပဵၼ် ယိင်းဢွၼ်ႇ၊ ယိင်းႁၵ်ႉၶိူဝ်း၊ ၸၢႆးၶိူဝ်းႁၢၼ် လႄႈ ထႅင်ႈလၢႆလၢႆၵေႃႉ ၼႂ်းၸုမ်းတႆးၽွမ်ႉၵၼ် လႆႈဢဝ်ငိုၼ်းမၢၼ်ႈ 100 သႅၼ်ပျႃး လူႇတၢၼ်းပၼ်တီႈ ပၢင်ႁပ်ႉပၢင်းဢွၵ်ႇထမ်ႈလႄႈ ၶၢဝ်းတၢင်းပိုၼ်ၽႄႈသႃႇသၼႃႇ ၸဝ်ႈပေႃႈသိလ်ထမ်းၶူးဝႃးဝုၼ်းၸုမ်ႉ မိူၼ်ၵၼ် ဝႃႈၼႆ။

သင်ဝႃႈၽူႈမီးၼမ်ႉၸႂ် ၸေႇတၼႃႇၽိူၵ်ႇၸိုၼ်ႈၶၢဝ်သႂ်ႁဝ်း မီးလွင်ႈၶႂ်ႈၸွႆႈထႅမ် ငိုၼ်းတွင်း ပီႈၼွင်ႉပၢႆႈၽေးလႄႈသင်၊ ၵေႃႉသိုၵ်း တပ်ႉသိုၵ်းၸိုင်ႈတႆး ဢၼ်တူင်ႉၼိုင်ဝႆႉ ၼႂ်းၼႃႈသိုၵ်း လႄႈသင်၊ ၶႂ်ႈႁူမ်ႈႁွမ်းလူႇတၢၼ်းငိုၼ်း ၼႂ်းၼႃႈၵၢၼ်သႃႇသၼႃႇ ဢိၵ်ႇတင်း ၶႂ်ႈၸွႆႈထႅမ် ပၢႆးပၺ်ႇၺႃႇ လႄႈ ပၢႆးယူႇလီ ပေႃးၼႆၸိုင် ၵပ်းသိုပ်ႇလႆႈတီႈ ၸုမ်းတႆးၽွမ်ႉၵၼ် ၸၢႆးၶိူဝ်းႁၢၼ် မၢႆၾူၼ်းမၢၼ်ႈ 09 960 217 636၊ ယိင်းဢွၼ်ႇ မၢႆၾူၼ်းမၢၼ်ႈ 09 787 441 018၊ မွၵ်ႇၵွၼ် မၢႆၾူၼ်းၶႄႇ 158 875 349 49 လႆႈယူႇၶႃႈဢေႃႈ။

တႆးလွတ်ႈလႅဝ်း