ၼင်ႇႁိုဝ်ႁႂ်ႈပေႃးပဵၼ် လွင်ႈၵမ်ႉၸွႆႈထႅမ် ၶူဝ်းၶွင်ၸႂ်ႉတိုဝ်း လႄႈ ၽၵ်းၵပ်းၶဝ်ႈ ၵေႃႉသိုၵ်း ၵေႃႉႁၢၼ်ၶဝ်ၼႆသေ ၽူႈမီးၼမ်ႉၸႂ် ဢဝ်ၶူဝ်းၶွင်ၸႂ်ႉတိုဝ်း ဢိၵ်ႇ ၶွင်ၵိၼ်ယႅမ်ႉတင်းၼမ် ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဝႃႈၼႆ။

မိူဝ်ႈဝၼ်းထီႉ 21 January 2021 (လိူၼ်ၵမ်မႂ်ႇ 9 ၶမ်ႈ ပီႊတႆး 2115 ၼီႈ) ၽူႈမီးၼမ်ႉၸႂ် ဢၼ်ဢမ်ႇၶႂ်ႈဢွၵ်ႇၸိုဝ်ႈ ၼႂ်းၸိုင်ႈတႆးပွတ်းႁွင်ႇ ဢဝ်ၽႃႈမႆ 10 ၽိုၼ်၊ ၶွင်ၵိၼ်ယႅမ်ႉ တႃႇမိုဝ်ႉႁုင် 1 ထူင်၊ ၶႆႇၵႆႇ 5 ၽႃႇ၊ ၼမ်ႉမၼ်းၵိၼ် 1 ပုင်း၊ ထူဝ်ႇၽူးယႅၼ်ႈ 10 ဢႅပ်ႇ၊ ၽၵ်းၵၢတ်ႇသူမ်ႈ 1 ပုင်း၊ ထူဝ်ႇၼဝ်ႈၽဵတ်း ၼမ်ႉၼၵ်း 3 ၶၼ်၊ မၢၵ်ႇၶိူဝ်သူမ်ႈ 2 ၸွႆႉ၊ ငိုၼ်းမၢၼ်ႈ 50,000 ပျႃး၊ ၼွၵ်ႈလိူဝ်သေၼၼ်ႉ ၽူႈမီးၼမ်ႉၸႂ် ၼႂ်းၸႄႈဝဵင်းလၢႆးၶႃႈ လႄႈ ၸႄႈဝဵင်းသီႇပေႃႉ ႁူမ်ႈၵၼ်ဢဝ်ၶဝ်ႈသၢၼ် 31 ပွတ်း ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်ပၵ်းသဝ်းဝႆႉ ၼႂ်းၼႃႈတီႈၵုမ်းၵမ် ၼႆယဝ်ႉ။

ယူႇတီႈ ၽူႈမီးပုၼ်ႈၽွၼ်း RCSS/SSA ဢိၵ်ႇတင်း ၵေႃႉသိုၵ်း ၵေႃႉႁၢၼ်ၶဝ်ၵေႃႈ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ၶဝ် တႄႉတႄႉဝႃႈဝႃႈ လႄႈ ယွင်ႈယေႃးဢဝ်ၵုင်ႇမုၼ်ၵူႈၵေႃႉၵူႈၸဝ်ႈယူႇယဝ်ႉ။

မိူဝ်ႈဝၼ်းထီႉ 22 January 2021 (လိူၼ်ၵမ်မႂ်ႇ 10 ၶမ်ႈ ပီႊတႆး 2115 ၼီႈ) ၼၼ်ႉၵေႃႈ ၸွမ်းၼင်ႇ ပွင်ပဵၼ်လႆႈၼၼ်ႉသေ ပီႈၼွင်ႉႁႅင်းၵၢၼ်ယၢၼ်မိူင်း ဢၼ်ႁဵတ်းၵၢၼ်ယူႇတီႈ ၵဵင်းမႆႇ လႄႈ ၼႂ်းမိူင်းၵွၵ်ႇ ၸိုင်ႈထႆး လႆႈႁူမ်ႈၸူႉတုမ်ငိုၼ်းတွင်းၵၼ်သေ သိုဝ်ႉၶူဝ်းၶွင်ၸႂ်ႉတိုဝ်းတင်းၼမ် ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်ပၵ်းသဝ်းဝႆႉ ၼႂ်းၼႃႈတီႈၵုမ်းၵမ် ၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်းမိူၼ်ၵၼ်။

တႆးလွတ်ႈလႅဝ်း