မီးၵူၼ်းမၢတ်ႇၸဵပ်း 2 ၵေႃႉ ယွၼ်ႉလွင်ႈပိုတ်းယိုဝ်းတီႈလၢၼ်ႉတၢင်းၵိၼ် ဝဵင်းၵျွၵ်းမႄး

မိူဝ်ႈဝႃးဝၼ်းထီႉ 25 January 2021 (လိူၼ်ၵမ်မႂ်ႇ13 ၶမ်ႈ ပီႊတႆး 2115 ၼီႈ) ယၢမ်းၵၢင်ၶိုၼ်းမွၵ်ႈ 21:30 မူင်း မီးၵူၼ်းဢမ်ႇႁူႉၸိုဝ်ႈ ဢမ်ႇႁူႉၸုမ်း (2) ၵေႃႉ ပႃးတင်းလူတ်ႉၶိူင်ႈသေ ဢဝ်ၵွင်ႈပိုတ်းယိုဝ်း ၵူၼ်းၼႂ်းလၢၼ်ႉတၢင်းၵိၼ် M2K ပွၵ်ႉ (8) ဝဵင်းၵျွၵ်းမႄး ၸႄႈတွၼ်ႈၵျွၵ်းမႄး ၸိုင်ႈတႆးပွတ်းႁွင်ႇလႄႈ မီးၵူၼ်းမၢတ်ႇၸဵပ်း (2) ၵေႃႉၼႆယဝ်ႉ။

ၵူၼ်းၼႂ်းပိုၼ်ႉတီႈလၢတ်ႈဝႃႈ − မိူဝ်ႈဝႃးယၢမ်းၵၢင်ၶိုၼ်းၼၼ်ႉ မီးၵူၼ်း (2) ၵေႃႉ ဢမ်ႇႁူႉၸိုဝ်ႈဢမ်ႇႁူႉၸုမ်း ႁေႃႈလူတ်ႉၶိူင်ႈၵႂႃႇၵိုတ်းၼႃႈလၢၼ်ႉတၢင်းၵိၼ်ယဝ်ႉ ဢဝ်ၵွင်ႈယိုဝ်းသႂ်ႇၼႂ်းလၢၼ်ႉ မွၵ်ႈ (7) ၵမ်းၸိူဝ်းၼႆႉသေ ၶိုၼ်းသိုပ်ႇႁေႃႈၵႂႃႇၼႂ်းဝဵင်းၼႆယဝ်ႉ။

မိူဝ်ႈၽွင်းဢဝ်ၵွင်ႈယိုဝ်း ၼႂ်းလၢၼ်ႉတၢင်းၵိၼ်ၼၼ်ႉ မီးၵူၼ်းၼုမ်ႇ (4) ၵေႃႉ ၼင်ႈၵိၼ်တၢင်းၵိၼ်ဝႆႉ ၽၢႆႇတၢင်းၼွၵ်ႈလၢၼ်ႉလႄႈ တႃႇ (2) ၵေႃႉ လႆႈတိူဝ်ႉမၢတ်ႇၸဵပ်းၵႂႃႇ တီႈၶႃသေ သူင်ႇတူဝ်ၵႂႃႇယူတ်းယႃ တီႈႁူင်းယႃဝဵင်းၵျွၵ်းမႄးၼႆယဝ်ႉ။

လႆႈႁူႉဝႃႈ ၵူၼ်းဢၼ်မၢတ်ႇၸဵပ်း (2) ၵေႃႉၼၼ်ႉ ပဵၼ်ၽူႈၶဝ်ႈၸုမ်း ပရႁိတၵျွၵ်းမႄး ၵူဝ်ႇလၢႆးၵျေႃႇထုၼ်း လႄႈ ၵူဝ်ႇဢွင်ႇတဵင်းၸူဝ်းဝႃႈၼႆ။

ၽၢႆႇၽူႈမီးပုၼ်ႈၽွၼ်း ပလိၵ်ႈမၢၼ်ႈ ဝဵင်းၵျွၵ်းမႄး လႆႈၵူတ်ႇထတ်းၸႅတ်ႈတူၺ်း ဢွင်ႈတီႈ ပိူင်ပဵၼ်ၼၼ်ႉသေ ထူပ်းႁၼ်ၶွပ်ႇမၢၵ်ႇၵွင်ႈ (မၢၵ်ႇၽၢင်း) ဢၼ်မီးလိၵ်ႈဢင်းၵိတ်း 38 Super (7) လုၵ်ႈ ၼႆယဝ်ႉ။

တႆးလွတ်ႈလႅဝ်း