လုၵ်ႈႁဵၼ်း ႁူင်းႁဵၼ်းၸိူဝ်ႉၸၢတ်ႈ ဢၼ်မီးတီႈငဝ်ႈၸိုင်ႈ လွႆတႆးလႅင်း လႆႈႁပ်ႉလွင်ႈ ၵူတ်ႇထတ်းပၢႆးယူႇလီ လႄႈ လႆႈထွမ်ႇပႃးၵႂၢမ်းႁူႉလွင်ႈလုမ်းလႃးတူဝ်ၵဝ်ႇ တီႈမေႃယႃ ၶွင်ႇသီႇဢဝ်ၶိုၼ်းၸိုင်ႈတႆး ၼႆယဝ်ႉ။

မိူဝ်ႈဝႃးဝၼ်းထီႉ 2 June 2021 ယၢမ်းၵၢင်ၼႂ် 09:00 မူင်းထိုင်ယၢမ်းၵၢင်ဝၼ်း 12:45 မူင်း မေႃယႃၽၢႆႇပၢႆးယူႇလီ ၶွင်ႇသီႇဢဝ်ၶိုၼ်းၸိုင်ႈတႆး လႆႈဢဝ်ၶိူင်ႈၵမ်ႉၵႅမ်ပၢႆးယူႇလီသေ ၵႂႃႇၵူတ်ႇထတ်းလုမ်းလႃး တူၺ်းထိုင်ပၼ်ပၢႆးယူႇလီ လုၵ်ႈႁဵၼ်း ၸဵမ်ယိင်းၸဵမ်ၸၢႆး လႄႈ ယူႇတီႈမေႃယႃ ၽၢႆႇပၢႆးယူႇလီ လႆႈပၼ်ပႃးၵႂၢမ်းႁူႉ ၵဵဝ်ႇလူၺ်ႈလွင်ႈပၢႆးယူႇလီ ၸွမ်းၶၢဝ်းရႃႇသီႇ ၼႆယဝ်ႉ။

ငဝ်ႈၸိုင်ႈလွႆတႆးလႅင်း ၼႆႉ ပဵၼ်ပိုၼ်ႉတီႈသုင်သေ ၾိင်ႈၾႃႉရႃႇသီႇၵေႃႈ တေပႅၵ်ႇပိူင်ႈၵၼ်တင်း တၢင်ႇၸႄႈဝဵင်းဝႆႉ လႄႈ ပေႃးႁွတ်ႈထိုင်ၶၢဝ်းၼႂ်းလိူၼ် May, June ၼႆၸိုင် မွၵ်ႇၵုမ်ႈၵႆႉသုမ်ႇဝၢၼ်ႈ သုမ်ႇလွႆဝႆႉလႄႈ သမ်ႉမီးၾူၼ်ၵႆႉၵႆႉတူၵ်းၸွမ်းတင်းဝၼ်းသေ မၢင်ဝူင်ႈသမ်ႉ ဢမ်ႇႁၼ်လႅတ်ႇ သေဢိတ်းၵေႃႈ ယၢမ်ႈမီးမႃးယူႇယဝ်ႉ။

မိူဝ်ႈဝၼ်းထီႉ 8 February 2021 ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ၸတ်းႁဵတ်း ပၢင်မွပ်ႈဝႂ်ၽၢၼ်ႇပူၼ်ႉၸၼ်ႉပၼ် လုၵ်ႈႁဵၼ်း (ၵူႈၸၼ်ႉၸၼ်ႉ) ႁူမ်ႈ 204 ၵေႃႉသေ  မီးႁူဝ်ပဝ်ႈလူင် RCSS/SSA ၸွမ်သိုၵ်းလူင် ယွတ်ႈသိုၵ်း လႆႈမွပ်ႈဢၢပ်ႈသူးပၼ် လုၵ်ႈႁဵၼ်းၽၢၼ်ႇပူၼ်ႉၸၼ်ႉၵႂႃႇယူႇ ၼႆယဝ်ႉ။

တႆးလွတ်ႈလႅဝ်း
“ၶႅပ်းႁၢင်ႈ − Loi Tai Leng School”