ပေႃႈလဵင်ႉမႄႈလဵင်ႉ ဢၼ်မီးၼႂ်းမိူင်းၼွၵ်ႈမိူင်း ၸွႆႈထႅမ်တပ်ႉသိုၵ်းၸိုင်ႈတႆး RCSS/SSA

ၼင်ႇႁိုဝ် ပေႃးတေပဵၼ်ႁႅင်းၸွႆႈၸိူဝ်ႉၸၢတ်ႈၼႆသေ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ် ဢၼ်မီးၼႂ်းမိူင်းၼွၵ်ႈမိူင်း ဢဝ်ငိုၼ်းတွင်း ၸွႆႈထႅမ်တီႈ တပ်ႉသိုၵ်းၸိုင်ႈတႆး RCSS/SSA ဝႃႈၼႆ။

မိူဝ်ႈဝၼ်းထီႉ 1 June 2021 (လိူၼ်ႁူၵ်းလွင်ႈ 7 ၶမ်ႈ ပီႊတႆး 2115 ၼီႈ) ၽူႈႁၵ်ႉၸၢတ်ႈ ဢၼ်ပဵၼ် ပေႃႈလုင်းသူၺ်ႇပၢၼ်း + မႄႈပႃႈမွၵ်ႇၶၢဝ် ၸူဝ်ႈၶၢဝ်းဝဵင်းၵဵင်းမႆႇ ၸိုင်ႈထႆး ဢဝ်ၶဝ်ႈလႅဝ်ႈ တႃႇ 20 တိူၵ်ႈ တူၵ်းမႅၼ်ႈသၢင်ႉငိုၼ်းမၢၼ်ႈ 1,000,000 ပျႃး (ၼိုင်ႈလၢၼ်ႉပျႃးတဵမ်တဵမ်) ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်မီးဝႆႉ ၼႂ်းၼႃႈသိုၵ်းတီႈၼိုင်ႈ ဝႃႈၼႆ။

ၼႂ်းဝၼ်းထီႉ 1 June 2021 ၼၼ်ႉၵူၺ်းၼင်ႇၵဝ်ႇ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ် ဢၼ်ပဵၼ် ပေႃႈလဵင်ႉမႄႈလဵင်ႉ ဢမ်ႇၶႂ်ႈဢွၵ်ႇၸိုဝ်ႈ ၼႂ်းၼႃႈႁိူၼ်းၼိုင်ႈ တီႈယူႇၸိုင်ႈတႆးပွတ်းဢွၵ်ႇ ဢဝ်ႁုၼ်ႇႁၢင်ႈ ၸဝ်ႈပေႃႈသိၼ်ထမ်းၶူးဝႃးဝုၼ်ႉၸုမ်ႉ တႃႇ 1,000 သူႇ တွၼ်ႈပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်မီးဝႆႉ ၼႂ်းၼႃႈသိုၵ်း မိူၼ်ၵၼ်။

ယူႇတီႈၽူႈမီးပုၼ်ႈၽွၼ်း RCSS/SSA ႁူမ်ႈပႃးတင်း ၵေႃႉသိုၵ်း ၵေႃႉႁၢၼ်ၶဝ်တင်းသဵင်ႈၵေႃႈ ပဵၼ်ဢၼ်ယိၼ်းၸူမ်းၶွပ်ႈၸႂ် တေႉတေႉဝႃႈဝႃႈလႄႈ ၸင်ႇလႆႈႁဵတ်း ဝႂ်ယွင်ႈယေႃး ယိုၼ်ႈမွပ်ႈပၼ်တီႈ ၽူႈႁၵ်ႉၸၢတ်ႈၶဝ် ႁႂ်ႈပဵၼ်တီႈမၢႆတွင်းၵိုၵ်းပိုၼ်းၵႂႃႇယူႇယဝ်ႉ။

မိူဝ်ႈဝၼ်းထီႉ 30-31 May 2021 ၼၼ်ႉၵေႃႈ ၸုမ်းႁူမ်ႈႁႅင်းလႅင်းပိူင်း ဢၼ်မီးတီႈထုင်ႉမၢဝ်း ႁူမ်ႈပႃးတင်း မုၵ်ႉၸုမ်းၸၢဝ်းၶိူဝ်းတႆး လႄႈ ပီႈၼွင်ႉႁႅင်းၵၢၼ်ယၢၼ်မိူင်း ဢၼ်မီးဝႆႉၼႂ်းၸိုင်ႈထႆး ဢဝ်ငိုၼ်းမၢၼ်ႈ 1,280,000 ပျႃး (ၼိုင်ႈလၢၼ်ႉသွင်သႅၼ်ပႅတ်ႇမိုၼ်ႇပျႃးတဵမ်တဵမ်) ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်မီးၼႂ်းၼႃႈသိုၵ်း ၸိုင်ႈတႆးပွတ်းႁွင်ႇ ၼႆယဝ်ႉ။

လွင်ႈဢၼ် ၽူႈႁၵ်ႉၸၢတ်ႈ ၼႂ်းမိူင်း/ၼွၵ်ႈမိူင်း ၸွႆႈထႅမ်တပ်ႉသိုၵ်းၸိုင်ႈတႆး RCSS/SSA ၼႆႉ ယူႇတီႈ မုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး RCSS ၵေႃႈ ပဵၼ်ဢၼ်ယိၼ်းၸူမ်းလႄႈ ယွင်ႈယေႃး ဢဝ်ၵုင်ႇမုၼ် ၵူႈၵေႃႉၵူႈၸဝ်ႈယူႇယဝ်ႉ။

တႆးလွတ်ႈလႅဝ်း