သိုၵ်းမၢၼ်ႈ ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းသေ ဢဝ်ၽႃႉၽၼ်းၵူၼ်းမိူင်း ၵေႃႉၼိုင်ႈ ဢၼ်ယူႇသၢင်ႈၵိၼ်သဝ်း တီႈဝၢၼ်ႈၼွင်ယူမ်း ဢိူင်ႇမိူင်းၼိမ် ၸႄႈဝဵင်း ၵေးသီး ၸိုင်ႈတႆးပွတ်းၸၢၼ်းလႄႈ ႁဵတ်းႁႂ်ႈလႆႈတၢင်းမၢတ်ႇၸဵပ်းႁၢဝ်ႈႁႅင်း လႆႈဢဝ် တူဝ်သူင်ႇယူတ်းယႃတီႈႁူင်းယႃ၊ ၼွၵ်ႈလိူဝ်ၼၼ်ႉ ၽၢႆႇသိုၵ်းမၢၼ်ႈ ဢမ်ႇဢဝ်ပုၼ်ႈ ၽွၼ်းသင်သေလွင်ႈ ၼႆယဝ်ႉ။

မိူဝ်ႈဝၼ်းထီႉ 31 August 2022 (လိူၼ်သိပ်းမႂ်ႇ 6 ၶမ်ႈ ပီႊတႆး 2116 ၼီႈ) ယွၼ်ႉသိုၵ်းမၢၼ်ႈ ဢဝ်ၵွင်ႈပိုတ်းယိုဝ်းဝူဝ်း ဢၼ်လဵင်ႉဝႆႉတီႈၼႂ်းသူၼ် ႁိမ်းတပ်ႉ ၶလယ (131) ဝဵင်းၵေးသီးလႄႈ လုင်းသူၺ်ႇထုၼ်း ဢႃႇယုမွၵ်ႈ 60 ပီႊ ၵေႃႉပဵၼ်ၸဝ်ႈၶွင်ဝူဝ်း ၵႂႃႇႁႄႉႁၢမ်ႈၼၼ်ႉ သိုၵ်းမၢၼ်ႈ 3 ၵေႃႉ လုၵ်ႉၼႂ်းတပ်ႉၶဝ် ဢွၵ်ႇမႃးပေႃႉထုပ်ႉႁႅမ် လုင်းသူၺ်ႇထုၼ်း သေဢမ်ႇၵႃး ဢဝ်ၽႃႉၼႂ်းပႅမ်း လုင်းသူၺ်ႇထုၼ်းၼၼ်ႉ ၶိုၼ်းၽၼ်းသႂ်ႇၵၢၼ်ႈၶေႃးမၼ်းၸၢႆးထႅင်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ “ဝူဝ်းၵေႃႈဢမ်ႇလႆႈၶဝ်ႈၵႂႃႇ ၼႂ်းတပ်ႉသိုၵ်းမၢၼ်ႈၼၼ်ႉ လဵင်ႉဝႆႉတီႈၼႂ်းသူၼ်ၵူၺ်း၊ သိုၵ်းမၢၼ်ႈသမ်ႉ ဢဝ်ၵွင်ႈ ယိုဝ်းဝူဝ်း၊ ဢၢၼ်းတေယိုဝ်းၵိၼ်လၢႆလၢႆၼၼ်ႉယဝ်ႉ။ လုင်းသူၺ်ႇထုၼ်း ဢၼ်ပဵၼ် ၸဝ်ႈဝူဝ်းၵေႃႈ လႆႈၵႂႃႇႁႄႈႁၢမ်ႈၶဝ်၊ သိုၵ်းမၢၼ်ႈ 3 ၵေႃႉၼၼ်ႉသမ်ႉ လုၵ်ႉၼႂ်းတပ်ႉၶဝ် ဢွၵ်ႇမႃးသေ ဢွၼ်ၵၼ်ပေႃႉထုပ်ႉႁႅမ်ၸဝ်ႈဝူဝ်း သေဢမ်ႇၵႃး ဢဝ်ၽႃႉဢၼ်မီး ၼႂ်းပႅမ်းၸဝ်ႈဝူဝ်းလုင်းသူၺ်ႇထုၼ်းၼၼ်ႉ ၶိုၼ်းၽၼ်းသႂ်ႇမၼ်းၸၢႆးလႄႈ ႁဵတ်းႁႂ်ႈ လႆႈတၢင်းမၢတ်ႇၸဵပ်းႁၢဝ်ႈႁႅင်း လႆႈဢဝ်တူဝ်သူင်ႇယူတ်းယႃဝႆႉတီႈႁူင်းယႃ ဝဵင်းၵေးသီး ၶႃႈဢေႃႈ၊ ယၢမ်းလဵဝ် သၢႆငၢႆလုင်းသူၺ်ႇထုၼ်း ဢမ်ႇပေႃးလီ ႁွႆးမၢတ်ႇၸဵပ်း ဢၼ်သိုၵ်းမၢၼ်ႈၽၼ်းၼၼ်ႉ လႆႈယဵပ်ႉဢမ်ႇယွမ်း 40 ႁွႆး” လၢတ်ႈၼႄ ၼင်ႇၼႆ။

ဝၢႆးလွင်ႈပိူင်ပဵၼ်ၼႆႉ ပဵၼ်ၵႂႃႇယဝ်ႉ ၽူႈမီးပုၼ်ႈၽွၼ်းၽၢႆႇသိုၵ်းမၢၼ်ႈ လႆႈတီႉၺွပ်း ၵူၼ်းသိုၵ်း 3 ၵေႃႉ ဢၼ်ဢဝ်ၽႃႉၽၼ်းလုင်းသူၺ်ႇထုၼ်းၼၼ်ႉယဝ်ႉ ဝႃႈၼႆ သေတႃႉ လႆႈတီႉၺွပ်းဢဝ်တၢင်းၽိတ်းတေႉယူႇႁိုဝ် ဢမ်ႇဢဝ်တၢင်းၽိတ်းတေႉႁိုဝ် ၼႆၼၼ်ႉ ဢမ်ႇမီးၽႂ်လႆႈႁူႉႁၼ်ၸွမ်း ဝႃႈၼႆ။

လုင်းသူၺ်ႇထုၼ်းၼႆႉ ပဵၼ်ၵူၼ်းႁဵတ်းၵိၼ်ၵၢၼ်ယူဝ်းယူဝ်း ႁႃလဵင်ႉလုၵ်ႈလၢင်း ၵူၼ်းၼႂ်းၼႃႈႁိူၼ်းၵေႃႉၼိုင်ႈသေ လွင်ႈလုင်းသူၺ်ႇထုၼ်း ထုၵ်ႇသိုၵ်းမၢၼ်ႈ ဢဝ်ၽႃႉၽၼ်း လႆႈတၢင်းမၢတ်ႇၸဵပ်းႁၢဝ်ႈႁႅင်းၼႆႉ ၽၢႆႇသိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းသင်သေလွင်ႈ၊ ယၢမ်းၽွင်းတေႃႈလဵဝ် လူဝ်ႇတၢင်းၸွႆႈထႅမ် ၵႃႈယူတ်းယႃယူႇ ဝႃႈၼႆ။

တႆးလွတ်ႈလႅဝ်း