ရၢတ်ႉသျႃးပိုၼ်ၽၢဝ်ႇၽိူမ်ႉထႅမ်ႁႅင်းသိုၵ်းထႅင်ႈ ပွတ်းၸဵင်ႇႁွင်ႇဝၼ်းတူၵ်း

ၽွင်းလူင်ၽၢႆႇၼွၵ်ႈမိူင်းရၢတ်ႉသျႃး ပိုတ်ႇလၢတ်ႈၼႄဝႃႈ သင်ၸိူဝ်ႉ  ၸုမ်း NATO တေတင်ႈတပ်ႉၼႂ်း ၾိၼ်ႇလႅၼ်ႇ လႄႈ သဝိတ်ႇတဵၼ်ႇ ၸိုင် ရၢတ်ႉသျႃးၵေႃႈ တေၽိူမ်ႉထႅမ်ႁႅင်းသိုၵ်း ၼႂ်းမိူင်းရၢတ်ႉသျႃး ပွတ်းတွၼ်ႈၸဵင်ႇႁွင်ႇဝၼ်းတူၵ်းထႅင်ႈ ဝႃႈၼႆ။

သိုပ်ႇလၢတ်ႈထႅင်ႈဝႃႈ မိူဝ်ႈလႂ် ၸုမ်း NATO ပၵ်းတမ်းၵၢၼ်သိုၵ်း တီႈၼႂ်းၾိၼ်ႇလႅၼ်ႇ လႄႈ သဝိတ်ႇတဵၼ်ႇမႃးၸိုင် ရၢတ်ႉသျႃးယုမ်ႇဝႃႈ ဢမေႇရိၵၢၼ်ႇ တေပဵၼ်ၽူႈၵုမ်းထိင်း။ ယွၼ်ႉၼၼ် ရၢတ်ႉသျႃးတေၽိူမ်ႉထႅမ်ႁႅင်းသိုၵ်း ၼႂ်းမိူင်းရၢတ်ႉသျႃး ပွတ်းၸဵင်ႇႁွင်ႇဝၼ်းတူၵ်းထႅင်ႈၼႆယူႇ။ ယင်းလၢတ်ႈထိုင်ပႃးဝႃႈ သင်မီးၵၢၼ်ပၵ်းတင်ႈတပ်ႉ ၼႂ်းမိူင်းၾိၼ်ႇလႅၼ်ႇ လႄႈ သဝိတ်ႇတဵၼ်ႇ မႃးတေႉၼႆ ရၢတ်ႉသျႃးၵေႃႈတေတုမ်ႉတွပ်ႇၵႂႃႇၶိုၼ်းမိူၼ်ၵၼ် ၼႆယဝ်ႉ။

ၾိၼ်ႇလႅၼ်ႇမီးလႅၼ်လိၼ်တိတ်းၸပ်းရၢတ်ႉသျႃး 1,300 ၵီႇလူဝ်ႇမီႇတိူဝ်ႇသေ လၢတ်ႈလႆႈဝႃႈ ပဵၼ်ၸိုင်ႈမိူင်းၼႂ်းႁူမ်ႈတုမ်ယူးရူပ်ႇ ဢၼ်မီးလႅၼ်လိၼ်တိတ်းၸပ်း ရၢတ်ႉသျႃးယၢဝ်းလိူဝ်ပိူၼ်ႈ ၼႆယဝ်ႉ။

ၾိၼ်ႇလႅၼ်ႇ လႄႈ သဝိတ်ႇတဵၼ်ႇ  လႆႈယွၼ်းၶဝ်ႈႁူမ်ႈၸွမ်းၸုမ်း NATO  မိူဝ်ႈဝၼ်းထီႉ 18 May 2022 ပူၼ်ႉမႃးၼၼ်ႉသေ လႆႈတႅပ်းတတ်းၶဝ်ႈႁူမ်ႈၵႂႃႇ ၸွမ်းလူၺ်ႈငဝ်းလၢႆးၼႂ်းယူႇၶရဵၼ်း ဢၼ်လႆႈပဵၼ်ပၢင်တိုၵ်းၵၼ် တင်းရၢတ်ႉသျႃးယူႇ ၼၼ်ႉယဝ်ႉ။ မိူဝ်ႈဝၼ်းထီႉ 5 July 2022 ၼၼ်ႉၵေႃႈ လႆႈပဵၼ်ၽူႈၶဝ်ႈၸုမ်း NATO ၵႂႃႇလီငၢမ်းၼႆယဝ်ႉ။

တႆးလွတ်ႈလႅဝ်း