ၵႆႉၶႂ်ႈၼွၼ်းၼႃႇ ယူဝ်ၸၢင်ႈပဵၼ်တၢင်းပဵၼ် 6 မဵဝ်းၼႆႉ

လၢႆလၢႆၵေႃႉ ဢၼ်ၼင်ႈႁဵတ်းၵၢၼ်ယူႇၸွမ်းၼႂ်းလုမ်းၼႂ်းၸႆးၸိူဝ်းၼႆႉ ပေႃးဝၢႆးဝၼ်းမႃးၼႆ ႁူဝ်ၼၵ်းတႃၼၵ်း ငဝ်ငုၵ်းငဝ်ငၢၵ်းမႃး သမ်ႉပေႃးလႆႈႁႃၵေႃႇၾီႇၵိၼ်ၵမ်းလဵဝ်ၸိူင်ႉၼၼ် ပေႃးႁိုင်ႁိုင်ပဵၼ်တႄႉ တေဢမ်ႇပေႃးၵႃႈႁိုဝ်၊ ၵူၺ်းၵႃႈ သင်ဝႃႈမၼ်းပဵၼ်ၵူႈဝၼ်းၼႆတႄႉ လီလႆႈထတ်းတူၺ်းပၢႆးယူႇလီယဝ်ႉ ယွၼ်ႉမၼ်းတေၸၢင်ႈပဵၼ် တၢင်းပဵၼ်သေၸိူဝ်ႉသေပိူင်မႃးလႆႈၼၼ်ႉယဝ်ႉ။

1. တၢင်းပဵၼ်ၼွၼ်းဢမ်ႇလပ်း

ယွၼ်ႉၼွၼ်းဢမ်ႇလပ်းလႄႈၸင်ႇၶႂ်ႈၼွၼ်း ၵွပ်ႈၼၼ် လီလႆႈတူၺ်းၶိုၼ်း တူဝ်ၸဝ်ႈၵဝ်ႇဝႃႈ ယွၼ်ႉသင်လႄႈၼွၼ်းဢမ်ႇလပ်း ဢမ်ႇၼၼ်ၵေႃႈ ပဵၼ်ယွၼ်ႉၼွၼ်းလိုၵ်းၼႃႇႁိုဝ်၊ ယွၼ်ႉႁဵတ်းၵၢၼ်ၼမ်၊ ၵွပ်ႈၸႂ်သုၵ်ႉသၵ်ႉဝူၼ်ႉၼမ်ႁိုဝ် ထိုင်တီႈႁဵတ်းႁႂ်ႈၶႂ်ႈၼွၼ်း၊ ၼွၼ်းယူႇၵေႃႈဢမ်ႇဢိမ်ႇ သင်ပဵၼ်ၸိူင်ႉၼႆမႃး လီလႆႈလူတ်းယွမ်း လွင်ႈသုၵ်ႉယုင်ႈၶမ်ၸႂ် လူတ်းယွမ်းလွင်ႈႁဵတ်းၵၢၼ်ၽွင်းယၢမ်းၵၢင်ၶိုၼ်း လႄႈ ထုၵ်ႇလီလႆႈၵႂႃႇဢုပ်ႇဢူဝ်းတူၺ်းတင်းမေႃယႃ ၸိူဝ်းၼႆႉယူႇ။

2. ႁိူဝ်ႉဢူၼ်ႈၶၢဝ်းယၢဝ်း

တၢင်းပဵၼ်ဢၼ်ၼႆႉ လႆႈဝႃႈႁၢႆႉႁႅင်းလိူဝ်သေ တၢင်းပဵၼ်ၼွၼ်းဢမ်ႇလပ်းလူးၵွၼ်ႇ၊ ၵွပ်ႈပိူဝ်ႈ ၼွၼ်းဢမ်ႇလပ်း ပဵၼ်ၶၢဝ်းယၢမ်းႁိုင်ၼႃႇလႄႈ တူဝ်ၶိင်းႁူမ်ႈဢဝ်လွင်ႈႁိူဝ်ႉဢူၼ်ႈ မႃးၼမ်တိၵ်းတိၵ်းၼၼ်ႉယဝ်ႉ၊ လိူဝ်သေၼၼ်ႉ ယင်းမီးထႅင်ႈဝႃႈ ၵွပ်ႈၵိၼ်တၢင်းၵိၼ် ဢၼ်မီးပႅင်ႈၼမ်လႄႈၵိူဝ်ဝၢၼ်ၼမ်ပူၼ်ႉတီႈၼၼ်ႉၵေႃႈ ယင်းၸၢင်ႈႁဵတ်းႁႂ်ႈ ႁိူဝ်ႉဢူၼ်ႈ၊ ၶႂ်ႈၼွၼ်း၊ လွင်ႈမၢႆတွင်းဢမ်ႇလီ၊ ႁူဝ်ၶႆႈ၊ ၵူၼ်ႉၵူၼ်ႉၶိုၼ်ႈၶိုၼ်ႈၸွမ်းတူဝ်ၸွမ်းၶိင်း၊ ၼွၼ်းဢမ်ႇလပ်းလီ၊ ၼွၼ်းမွၵ်ႈၵႃႈႁိုဝ်ၵေႃႈ ဢမ်ႇဢိမ်ႇ ပေႃးပဵၼ်ၵူၼ်းႁဵတ်းၵၢၼ်ၸိူဝ်းၼႆႉ ယိုင်ႈၶႅၼ်းၸၢင်ႈပဵၼ်လႆႈၼမ်ယဝ်ႉ။

3. တၢင်းပဵၼ်ယဵဝ်ႈဝၢၼ်

ၼင်ႇဢၼ်လၢတ်ႈမႃးဝႃႈ လွင်ႈဢၼ်ၵိၼ်ပႅင်ႈလႄႈၵိူဝ်ဝၢၼ်ၼမ် ႁဵတ်းႁႂ်ႈၶႂ်ႈၼွၼ်းလႆႈၼၼ်ႉ ယင်းၸၢင်ႈပဵၼ် တၢင်းပဵၼ်ယဵဝ်ႈဝၢၼ်ပႃးလႆႈထႅင်ႈ ယွၼ်ႉလိူတ်ႈမီးထၢတ်ႈၵိူဝ်ဝၢၼ်ၼမ်လႄႈ လွင်ႈဢၼ်ၶႂ်ႈၼွၼ်းၼၼ်ႉၵေႃႈ တေၸၢင်ႈပၼ်ၾၢင်ႉဝႃႈ တူဝ်ၶိင်းႁဝ်းၼၼ်ႉ မီးထၢတ်ႈၵိူဝ်ဝၢၼ်ၼႂ်းလိူတ်ႈၼမ်လႄႈ ၸၢင်ႈပဵၼ်တၢင်းပဵၼ်ယဵဝ်ႈဝၢၼ်လႆႈ ၼႂ်းၶၢဝ်းတၢင်းၼႃႈၼႆႉ ၼႆယူႇ။

4. တၢင်းပဵၼ်လူမ်းလပ်း

တၢင်းပဵၼ်ၼႆႉ ပဵၼ်တၢင်းပဵၼ်ဢၼ်ၶႂ်ႈၼွၼ်းတႄႉၼွၼ်းဝႃႈယဝ်ႉ မၼ်းတေၶႂ်ႈၼွၼ်းၼႃႇၽွင်းယၢမ်းၵၢင်ဝၼ်း ၵူၺ်းၵႃႈ ၵၢင်ၶိုၼ်းမႃးသမ်ႉ ၼွၼ်းဢမ်ႇလပ်း၊ ၼွၼ်းလပ်းဢမ်ႇလီ ပေႃးလႆႈၼွၼ်းၵေႃႈ သမ်ႉပေႃးၾၼ်မႃးၵမ်းလဵဝ်။ ႁဵတ်းႁႂ်ႈလွင်ႈၸႂ်ႉၸၢတ်ႈပၢၼ် ၵူႈဝၼ်းဝၼ်းၼၼ်ႉ ဢမ်ႇပေႃးလီမႃးယဝ်ႉ။ သင်ပဵၼ်လုၵ်ႈဢွၼ်ႇ တေၸၢင်ႈတူၺ်းႁၼ်ဝႃႈ ပဵၼ်ၵူၼ်းၶီႈၶၢၼ်ႉ လႄႈ ဢွၵ်းဢေႃႁဵတ်းၵၢၼ်ထိူင်း၊ ႁဵၼ်းဢမ်ႇၶႅၼ်ႇ။ သင်ပဵၼ်ၵူၼ်းလူင် လွင်ႈႁဵတ်းၵၢၼ်ၵေႃႈတေယွမ်းလူင်း ၸၢင်ႈပဵၼ်ၽေးတေႃႇသၢႆၸႂ်လႆႈ မိူဝ်ႈၶႂ်ႈၼွၼ်းသေႁေႃႈလူတ်ႉႁေႃႈၵႃး၊ ၸႂ်ႉတိုဝ်းၶိူင်ႈၸၢၵ်ႈသေမဵဝ်းမဵဝ်းၸိူဝ်းၼႆႉ။ လိူဝ်သေၼၼ်ႉ ယင်းၸၢင်ႈပဵၼ်ၵူၼ်းဢၼ် ၸႂ်လမ်ငၢႆႈ ယွၼ်ႉလိုဝ်ႈႁိူဝ်ႉဢမ်ႇဢိမ်ႇၼၼ်ႉထႅင်ႈလူးၵွၼ်ႇ။

5. တၢင်းပဵၼ်လိူတ်ႈၸၢင်

ၼႂ်းၽူႈယိင်းၼၼ်ႉ ၸၢင်ႈမီးတၢင်းပဵၼ်လိူတ်ႈၸၢင်လႆႈငၢႆႈ ယွၼ်ႉလႆႈႁပ်ႉထၢတ်ႈဢႁႃႇရ ဢၼ်ပၼ်ၽွၼ်းလီဢမ်ႇၵုမ်ႇထူၼ်ႈ (တွၼ်ႈတႃႇၵူၼ်းၸိူဝ်းဢၼ်လိူၵ်ႈၵိၼ်) လႄႈ ယင်းမီးႁူဝ်လိူၼ်ထႅင်ႈသေၼၼ်ႉယဝ်ႉ။ လွင်ႈတၢင်းတၢင်ႇလွင်ႈၵေႃႈ ယင်းပဵၼ်မႃးလႆႈထႅင်ႈ ယွၼ်ႉလိုဝ်ႈႁိူဝ်ႉဢမ်ႇၵုမ်ႇထူၼ်ႈ၊ ႁိူဝ်ႉဢူၼ်ႈ၊ တႃလပ်းသိင်ႇ၊ ႁိူဝ်ႉငၢႆႈ၊ ၼိုၵ်းထိူင်း ဢမ်ႇၸိုၼ်ႈဢမ်ႇပၢင်ႇၸိူဝ်းၼႆႉ ႁဵတ်းႁႂ်ႈၵႆႉၵႆႉၶႂ်ႈၼွၼ်းယူႇတႃႇသေႇ ၼၼ်ႉယဝ်ႉ။

6. ႁူင်းၶဝ်ႈၸဵပ်း ဢမ်ႇၼၼ် ၶိူင်ႈဢင်ႇၵႃးၼႂ်းတူဝ်ၶိင်း မီးႁွႆးၸဵပ်း

သင်ၸိူဝ်ႉဝႃႈသုမ်းလိူတ်ႈၼမ်တိၵ်းတိၵ်း မိူၼ်ၼင်ႇ မီးလိူတ်ႈဢွၵ်ႇၼႂ်းႁူင်းၶဝ်ႈ၊ ၵႆႉပဵၼ်တုမ်ႇၽီၸိူဝ်းၼႆႉၼႃႇၵေႃႈ ၸၢင်ႈပဵၼ်လွင်ႈတၢင်းဢၼ်ႁဵတ်းႁႂ်ႈဢမ်ႇမီးႁႅင်း ဢမ်ႇၼၼ် ယူႇၼႂ်းငဝ်းလၢႆး ဢၼ်ပဵၼ်တၢင်းပဵၼ်လိူတ်ႈၸၢင်ၶၢဝ်းယၢဝ်းသေ တေမီးၽၢင်ႁၢင်ႈ ႁိူဝ်ႉငၢႆႈ၊ တႃလပ်းသိင်ႇ၊ ပဵၼ်လူမ်းငၢႆႈ၊ ႁႅင်းဢူၼ်ႈ၊ ၶႂ်ႈၼွၼ်း ႁၢဝ်ႁိူမ်ႉၸိူဝ်းၼႆႉမႃးယဝ်ႉ။

တၢင်းပဵၼ်ၸိူဝ်းၼႆႉ ပဵၼ်ဢၼ်လႂ်ၵေႃႈ တိုၼ်းဢမ်ႇလီၼၼ်ႉယဝ်ႉ ၵွပ်ႈၼၼ် ပေႃးႁႂ်ႈလီတႄႉ ထုၵ်ႇလီမၵ်းတမ်းၶၢဝ်းယၢမ်းၼွၼ်း ႁႂ်ႈမႅၼ်ႈၶိင်ႇမႅၼ်ႈၶၢဝ်းလႄႈ ၶဝ်ႈၼွၼ်းၸဝ်ႉလုၵ်ႉၸဝ်ႉ၊ သင်ၼွၼ်းဢမ်ႇလပ်းၵေႃႈ ငိူင်ႉဝႄႈလွင်ႈဢၼ်ဢမ်ႇထုၵ်ႇလီႁဵတ်း မိူဝ်ႈၶၢဝ်းယၢမ်းတေၼွၼ်း ဢမ်ႇဝႃႈ လဵၼ်ႈၾူၼ်း၊ ၵိၼ်တၢင်းၵိၼ်ၵၢင်ၶမ်ႈၵၢင်ၶိုၼ်း၊ ၼွၼ်းဢမ်ႇမႅၼ်ႈၶိင်ႇမႅၼ်ႈၶၢဝ်း၊ တူၺ်းၸိူင်းဢၼ်လီၵူဝ်၊ ဢွၵ်ႇဢဵၼ်ႁႅင်းၵၢင်ၶိုၼ်း ၸိူဝ်းၼႆႉ ယူႇယဝ်ႉ။

ပိၼ်ႇတႅမ်ႈ−လွႆသွမ်ႇ

တႆးလွတ်ႈလႅဝ်း