သၢႆမၢႆဢွင်ႇပူၼ်ႉၸၼ်ႉသိပ်း ၶဝ်ႈတူၺ်းလႆႈတီႈ ဝႅပ်ႉသၢႆႉထ် ႁွင်ႈၵၢၼ်ပၢႆးပၺ်ႇၺႃႇ ၼႂ်းဝၼ်းထီႉ 9 August 2020

မိူဝ်ႈဝႃးဝၼ်းထီႉ 4 August 2020 (တု−လိူၼ်ပႅတ်ႇလွင်ႈ 1 ၶမ်ႈ ပီႊတႆး 2114 ၼီႈ) ႁွင်ႈၵၢၼ်ပၢႆးပၺ်ႇၺႃႇ မိူင်းႁူမ်ႈတုမ် ပိုၼ်ၽၢဝ်ႇပဵၼ်တၢင်းၵၢၼ်ၵႂႃႇဝႃႈ သၢႆမၢႆဢွင်ႇပူၼ်ႉၸၼ်ႉသိပ်း ၼႂ်းပီႊ 2020 ၼႆႉ တေပိုၼ်ၽႄႈပၼ် ၼႂ်းဝၼ်းထီႉ 9 August 2020 (တု−လိူၼ်ပႅတ်ႇလွင်ႈ 6 ၶမ်ႈ ပီႊတႆး 2114 ၼီႈ) ယၢမ်းၵၢင်ၼႂ်ၸဝ်ႉ 24:30 မူင်း ၼိူဝ်ဝႅပ်ႉသၢႆႉထ် ႁွင်ႈၵၢၼ်ပၢႆးပၺ်ႇၺႃႇ www.moe.gov.mm လႄႈ www.myanmarexam.org ၼႆယဝ်ႉ။

လိူဝ်သေၼၼ်ႉ ၼင်ႇႁိုဝ်ပေႃးတေတွင်ႈထၢမ်လႆႈ ၶေႃႈမုၼ်း ဢၼ်ဢမ်ႇပွင်ႇလႅင်း ၵဵဝ်ႇလူၺ်ႈ သၢႆမၢႆဢွင်ႇပူၼ်ႉၸၼ်ႉသိပ်းၼၼ်ႉ ယူႇတီႈႁွင်ႈၵၢၼ်ပၢႆးပၺ်ႇၺႃႇ မိူင်းႁူမ်ႈတုမ် တေပိုတ်ႇၽုၺ်ႇဝႆႉပၼ် သုၼ်တွင်ႈထၢမ်ၶေႃႈမုၼ်း Call Center (7) ဢွင်ႈတီႈ တူဝ်ႈတင်းမိူင်းႁူမ်ႈတုမ်ဝႃႈၼႆ။

သင်ၸိူဝ်ႉဝႃႈ ၶႂ်ႈတွင်ႈထၢမ် လွင်ႈသၢႆမၢႆဢွင်ႇပူၼ်ႉၸၼ်ႉသိပ်းၼႆၸိုင် ၵပ်းသိုပ်ႇလႆႈတီႈ မၢႆၾူၼ်း − 067 340 7821, 067 340 7811, 067 340 7691, 067 340 7686, 067 340 7819, 067 343 0169, 01 653 509 ၵပ်းသိုပ်ႇတွင်ႈထၢမ်လႆႈ ၼႂ်းဝၼ်းပိုၼ်ၽႄသၢႆမၢႆဢွင်ႇပူၼ်ႉၸၼ်ႉသိပ်း ဝၼ်းထီႉ 9 August 2020 လႆႈယူႇ ဝႃႈၼႆ။

ပုၼ်ႈတႃႇၵူၼ်းဢၼ်ယူႇသဝ်းၼႂ်းပိုၼ်ႉတီႈ ဢမ်ႇမီးလႅင်းဢိၼ်ႇတိူဝ်ႇၼႅတ်ႇၼၼ်ႉတႄႉ တေပိုၼ်ၽၢဝ်ႇပၼ် လၢႆးရေႇတီႇဢူဝ်ႇ လႄႈ ၶဝ်ႈတူၺ်းလႆႈတီႈ ငဝ်းႁၢင်ႈသဵင် Sky Net Education Channel လႆႈယူႇၼႆယဝ်ႉ။

ဝၢႆးသေပိုၼ်ၽၢဝ်ႇပၼ် သၢႆမၢႆဢွင်ႇပူၼ်ႉၸၼ်ႉသိပ်းၼိူဝ်ဝႅပ်ႉသၢႆႉထ်ယဝ်ႉ ထႅင်ႈဝၼ်းၼိုင်ႈ ဝၼ်းထီႉ 10 August 2020 (တု−လိူၼ်ပႅတ်ႇလွင်ႈ 7 ၶမ်ႈ ပီႊတႆး 2114 ၼီႈ) တႄႇယၢမ်းၵၢင်ၼႂ် 9 မူင်းထိုင် ယၢမ်းတၢမ်းၶမ်ႈ 16:00 မူင်း ၵႂႃႇတူၺ်း သၢႆမၢႆဢွင်ႇပူၼ်ႉၸၼ်ႉသိပ်းလႆႈတီႈ ႁူင်းႁဵၼ်းၸႄႈဝဵင်းၽႂ်မၼ်း မိူၼ်ၼင်ႇမိူဝ်ႈပူၼ်ႉမႃးၼၼ်ႉလႆႈယူႇ ၼႆယဝ်ႉ။

ပေႃးတေၵႂႃႇတူၺ်း သၢႆမၢႆဢွင်ႇပူၼ်ႉၸၼ်ႉသိပ်း တီႈႁူင်းႁဵၼ်း ပေႃးၼႆၸိုင် ၼင်ႇႁိုဝ် ပေႃးတေဢမ်ႇမီးလွင်ႈ တိတ်းၸပ်း ၸိူဝ်ႉမႅင်းတၢင်းပဵၼ် COVID-19 ၼၼ်ႉ လုၵ်ႈႁဵၼ်းလႄႈပေႃႈမႄႈလုၵ်ႈႁဵၼ်းၶဝ် တေလႆႈတိုဝ်းၵမ် ႁဵတ်းသၢင်ႈၸွမ်းပၵ်းပိူင် မိူၼ်ၼင်ႇ ၵေႃႉၼိုင်ႈလႄႈ ၵေႃႉၼိုင်ႈ တေလႆႈယူႇႁၢင်ႇၵႆၵၼ်၊ တေလႆႈၸႅၼ်ႇထႅဝ်ၵၼ်၊ တေလႆႈသႂ်ႇၽႃႈတူမ်းသူပ်း လႄႈ Face Shield (မၢၼ်ႇဢၼ်ႁႄႉၵင်ႈၼႃႈ) ၸိူဝ်းၼႆႉ ၼႆယဝ်ႉ။

ၼႂ်းပီႊသွၼ်လိၵ်ႈ 2019−2020 ၼႆႉ တူဝ်ႈတင်းမိူင်းႁူမ်ႈတုမ် မီးလုၵ်ႈႁဵၼ်း တွပ်ႇလိၵ်ႈၸၼ်ႉသိပ်းဝႆႉ 900,000 (ၵဝ်ႈသႅၼ်) ပၢႆၼႆယဝ်ႉ။

ၵူႈပီႊပီႊတႄႉ သၢႆမၢႆဢွင်ႇပူၼ်ႉၸၼ်ႉသိပ်းၼႆႉ တေပိုၼ်ၽၢဝ်ႇပၼ် ၼႂ်းလိူၼ်ထူၼ်ႈႁူၵ်း June ၼႆသေတႃႉ ပီႊ 2020 ၼႆႉတႄႉ ယွၼ်ႉဝႃႈ ၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းသေယဝ်ႉ လႆႈၵိုတ်းလိုဝ်ႈဝႆႉ လွင်ႈၸႅတ်ႈထတ်းလိၵ်ႈၸၼ်ႉသိပ်း မွၵ်ႈၶၢဝ်းတၢင်းသွင်လိူၼ်ပၢႆလႄႈ ၸင်ႇလႆႈပိုၼ်ၽၢဝ်ႇတူၵ်းလိုၼ်းလိူဝ် ၵူႈပီႊပီႊၼႆယဝ်ႉ။

တႆးလွတ်ႈလႅဝ်း