ဢိတ်ႇသရေး တေၶဝ်ႈဢုပ်ႉပိူင်ႇ ၼႂ်းပိုၼ်ႉတီႈၵႃႇၸႃႉ

မိူဝ်ႈဝၼ်းထီႉ 17 December 2024 (လိူၼ်ၸဵင်လွင်ႈ 2 ၶမ်ႈ  ပီႊတႆး 2119 ၼီႈ) ၼၼ်ႉ ယူႇတီႈ ၽွင်းလူင်ၽၢႆႇၵႅတ်ႇၶႄဢိတ်ႇသရေး လႆႈဢွၵ်ႇမႃးလၢတ်ႈဝႃႈ ဝၢႆးသေၵႂၢတ်ႇ လၢင်ႉပႅတ်ႈ လူင်ပွင်ၸိုင်ႈႁႃးမၢတ်ႉသ်လႆႈတင်းမူတ်းယဝ်ႉၼၼ်ႉ ဢိတ်ႇသရေး တေၶဝ်ႈဢုပ်ႉပိူင်ႇ ၵုမ်းထိင်းလွင်ႈမၼ်ႈၼိမ်သဝ်းလွတ်ႈၽေး ၼႂ်းပိုၼ်ႉတီႈၵႃႇၸႃႉ လူၺ်ႈပၼ် လွင်ႈႁဵတ်းသၢင်ႈလႆႈၼင်ႇလွတ်ႈလွတ်ႈလႅဝ်းလႅဝ်း ၼႆယဝ်ႉ။

မိူဝ်ႈပူၼ်ႉမႃးၼၼ်ႉ ဢိတ်ႇသရေး ယၢမ်ႈလၢတ်ႈဝႆႉဝႃႈ ယိူင်းဢၢၼ်းပဝ်ႉမၢႆ ၼႂ်းပၢင် တိုၵ်းပွၵ်ႈၵမ်းၼႆႉ ပဵၼ်တႃႇၵႂၢတ်ႇလၢင်ႉပႅတ်ႈၸုမ်းသိုၵ်းႁႃးမၢတ်ႉသ်သေ ႁပ်ႉႁွင်း ဝႃႈ တေဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် တေပိုတ်းယိုဝ်းဢိတ်ႇသရေးထႅင်ႈ ၼင်ႇၸုမ်းသိုၵ်းႁႃးမၢတ်ႉသ်ပိုတ်းယိုဝ်း မိူဝ်ႈၼႂ်းလိူၼ် October 2023 ဢၼ်ႁဵတ်းႁႂ်ႈမီးၵူၼ်းလူႉသဵင်ႈတၢႆ 1,200 ၵေႃႉၼၼ်ႉ ဝႃႈၼႆ။

လွင်ႈဢၼ်ဢိတ်ႇသရေး တေၶဝ်ႈဢုပ်ႉပိူင်ႇ ၼႂ်းၵႃႇၸႃႉၼၼ်ႉ တေၵႂႃႇၶတ်းသၢၼ် ၵၼ်တင်း ဢမေႇရိၵၢၼ်ႇ၊ ၸၢတ်ႈၸိုင်ႈလုမ်ႈၾႃႉ လႄႈ ထႅင်ႈလၢႆလၢႆၸိုင်ႈမိူင်း ဢၼ်ပၼ်ႁႂ်ႈၵူၼ်းမိူင်းပႃႇလႅတ်ႉသ်တၢႆး မီးလွင်ႈလွတ်ႈလႅဝ်းၼႂ်းၵၢၼ်ဢုပ်ႉပိူင်ႇတူဝ် ၵဝ်ႇ ၼႆယဝ်ႉ။

မိူဝ်ႈၼႂ်းလိူၼ် October 2024 ၽွင်းလူင်ၽၢႆႇၼွၵ်ႈမိူင်း ဢမေႇရိၵၢၼ်ႇ လႆႈလၢတ်ႈဝႃႈ ပၢင်တိုၵ်းၼႂ်းၵႃႇၸႃႉ တေၵိုတ်းယိုတ်းလႆႈၼၼ်ႉ ၸွမ်းၼင်ႇၼႅဝ်းတၢင်းဢၼ်  ၸုမ်းသိုၵ်းႁႃးမၢတ်ႉသ် တေဢမ်ႇမီးဝၼ်းပွၵ်ႈမႃးၶိုၼ်း လႄႈ ဢိတ်ႇသရေး ၵေႃႈ တေဢမ်ႇယူႇၼႂ်းပိုၼ်ႉတီႈၵႃႇၸႃႉ ဝႃႈၼႆ။

ၽၢႆႇတၢင်းၸၢတ်ႈၸိုင်ႈလုမ်ႈၾႃႉ လၢတ်ႈဝႃႈ လူင်ပွင်ၸိုင်ႈပႃႇလႅတ်ႉသ်တၢႆး ဢၼ်ဢုပ်ႉပိူင်ႇယူႇ တီႈၼႂ်းပွတ်းတွၼ်ႈဝႅတ်ႉပႅင်ႉ ယၢမ်းၽွင်းတေႃႈလဵဝ်ၼႆႉ တေၶဝ်ႈ ဢုပ်ႉပိူင်ႇၼႂ်းပိုၼ်ႉတီႈၵႃႇၸႃႉၼႆ ၼႆႉပဵၼ်တႃႈယိူင်းဢၼ်ၸၢတ်ႈၸိုင်ႈလုမ်ႈၾႃႉ မုင်ႈမွင်းႁၼ် ၼႆယဝ်ႉ။

ၽၢႆႇပၢႆးယူႇလီၼႂ်းၵႃႇၸႃႇ ဢွၵ်ႇလၢတ်ႈမိူဝ်ႈၼႂ်းဝၼ်းထီႉ 16 December 2024 ၼၼ်ႉ ဝႃႈ တႄႇၸဵမ်မိူဝ်ႈဢိတ်ႇသရေး ၶဝ်ႈပိုတ်းယိုဝ်းၼႂ်းပိုၼ်ႉတီႈၵႃႇၸႃႉ မိူဝ်ႈၼႂ်းလိူၼ် October 2024 ၼၼ်ႉမႃး ႁဵတ်းႁႂ်ႈမီးၵူၼ်းလူႉသဵင်ႈတၢႆၵႂႃႇယဝ်ႉ ဢမ်ႇယွမ်း 450,000 ၵေႃႉ လႄႈ မီးၵူၼ်းမၢတ်ႇၸဵပ်းၸမ် 107,000 ၵေႃႉ ဝႃႈၼႆ။

တႆးလွတ်ႈလႅဝ်း