SSPP ၺွပ်းလုၵ်ႈဢွၼ်ႇလဵင်ႉဝူဝ်း

ၸုမ်းသိုၵ်း SSPP ၺွပ်းဢဝ်လုၵ်ႈဢွၼ်ႇလဵင်ႉ ဝူဝ်း 2 ၵေႃႉ တီႈဝၢၼ်ႈၵုင်းပဝ်း ဢိူင်ႇပၢင်ႇၵေႇတု ၸႄႈဝဵင်းမိူင်းၵိုင်။

ၵဵဝ်ႇၵပ်းလူၺ်ႈလွင်ႈၼႆႉ မိူဝ်ႈဝၼ်းထီႉ 15 December 2024 (လိူၼ်ၸဵင်မူၼ်း ပီႊတႆး 2119 ၼီႈ) ၽွင်းလုၵ်ႈဢွၼ်ႇ 2 ၵေႃႉ ဢႃႇယု 13 ၶူပ်ႇ လႄႈ 15 ၶူပ်ႇ သွင်ၵေႃႉပီႈၼွင်ႉ လဵင်ႉဝူဝ်း တီႈၼွၵ်ႈဝၢၼ်ႈယူႇၼၼ်ႉ ထုၵ်ႇၺႃးၸုမ်းသိုၵ်း SSPP ၵႂႃႇတီႉၺွပ်းဢဝ် တင်းပီႈတင်းၼွင်ႉ လႄႈ ၵေႃႉပဵၼ်ပီႈဢၢႆႈတႄႉ လႆႈလွတ်ႈဢွၵ်ႇမႃးၶိုၼ်း ၼႂ်းဝၼ်းထီႉ 16 December 2024 သေတႃႉ ၵေႃႉပဵၼ်ၼွင်ႉၸၢႆးမၼ်းတႄႉ ဢမ်ႇပႆႇလွတ်ႈဢွၵ်ႇမႃး တေႃႇထိုင်ဝၼ်းထီႉ 21 December 2024 ၼႆႉၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ပေႃႈမႄႈၶဝ်ဢွၼ်ၵၼ်ၵႂႃႇတုၵ်းယွၼ်း ႁႂ်ႈပွႆႇပၼ်ၶိုၼ်း လုၵ်ႈၸၢႆးၶဝ်ၼႆသေတႃႉ ၸုမ်းသိုၵ်း SSPP ဢမ်ႇယွမ်းပွႆႇပၼ် လႄႈ ၶိုၼ်းလၢတ်ႈတီႈၵူၼ်းမိူင်းဝႃႈ မိူဝ်ႈလဵဝ်ႁဝ်းတေၵဵပ်းသိုၵ်းထႅင်ႈ လႄႈ လုၵ်ႈသူ ဢႃႇယု 13 ၶူပ်ႇၼႆႉ ႁဝ်းတေဢဝ်ႁဵတ်းသိုၵ်း ပေႃးၶႂ်ႈလႆႈတူဝ်မၼ်းပွၵ်ႈမိူဝ်းၵေႃႈ ၶိုၼ်းဢဝ် လုၵ်ႈၸၢႆးသူ ၵေႃႉဢႃႇယု 15 ၶူပ်ႇၼၼ်ႉ မႃးတႅၼ်းတၢင်းတၢင်မၼ်း၊ ပေႃးပဵၼ်ငိုၼ်းႁဝ်းဢမ်ႇႁပ်ႉ တေဢဝ်ၵူၼ်းၵူၺ်း ဝႃႈၼႆ။

ၸုမ်းသိုၵ်း SSPP လႄႈ ၸုမ်းဢူၺ်းလီမၼ်း ဢၼ်ပၵ်းသဝ်းဝႆႉတီႈ ၸႄႈဝဵင်းမိူင်းၵိုင် ၸႄႈဝဵင်းႁူဝ်ပူင်းၼႆႉ တိုၵ်ႉမီးလွင်ႈပေႉၵိၼ်ၵူၼ်းမိူင်း ဢမ်ႇထၢတ်ႇဢမ်ႇဝၢႆး ယူႇယဝ်ႉ။

တႆးလွတ်ႈလႅဝ်း