လုၵ်ႈႁဵၼ်း ဢၼ်ၶဝ်ႈတွပ်ႇလိၵ်ႈၸၼ်ႉသိပ်း ပီႊ 2020 ၼႂ်းမိူင်းတႆး မီး (62,432) ၵေႃႉသေ ဢၼ်ဢွင်ႇပူၼ်ႉသမ်ႉ မီး (17,621) ၵေႃႉ

မိူဝ်ႈဝၼ်းထီႉ 9 August 2020 (တု-လိူၼ်ပႅတ်ႇလွင်ႈ 6 ၶမ်ႈ ပီႊတႆး 2114 ၼီႈ) ႁွင်ႈၵၢၼ်ၽၢႆႇပၢႆးပၺ်ႇၺႃႇ မိူင်းႁူမ်ႈတုမ် ပိုၼ်ၽၢဝ်ႇၵႂႃႇဝႃႈ လုၵ်ႈႁဵၼ်း ဢၼ်ၶဝ်ႈတွပ်ႇလိၵ်ႈၸၼ်ႉသိပ်း ပီႊ 2020 ၼႂ်းမိူင်းတႆးပတ်းပိုၼ်ႉ မီး (62,432) ၵေႃႉ သေတႃႉ ဢၼ်ဢွင်ႇပူၼ်ႉသမ်ႉ မီး (17,621) ၵေႃႉၵူၺ်း ဝႃႈၼႆ။

ၸွမ်းၼင်ႇႁွင်ႈၵၢၼ် ၽၢႆႇပၢႆးပၺ်ႇၺႃႇ မိူင်းႁူမ်ႈတုမ် ပိုၼ်ၽၢဝ်ႇၵႂႃႇၼၼ်ႉသေ လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈ ၸၼ်ႉသိပ်း  တီႈမိူင်းတႆးပွတ်းႁွင်ႇ မီး (18,123) ၵေႃႉ ဢၼ်ဢွင်ႇပူၼ်ႉသမ်ႉ မီး (5,651) ၵေႃႉ၊ တီႈမိူင်းတႆးပွတ်းၸၢၼ်း လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈၸၼ်ႉသိပ်း မီး (39,263) ၵေႃႉ ဢၼ်ဢွင်ႇပူၼ်ႉ မီး (10,318) ၵေႃႉ၊ တီႈမိူင်းတႆးပွတ်းဢွၵ်ႇသမ်ႉ လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈၸၼ်ႉသိပ်း မီး (5,037) ၵေႃႉ ဢမ်ဢွင်ႇပူၼ်ႉသမ်ႉ မီး (1,052) ၵေႃႉ ဝႃႈၼႆ။

လုၵ်ႈႁဵၼ်း ဢၼ်ဢွင်ႇပူၼ်ႉၸၼ်ႉသိပ်း ပီႊ 2020  ၼႂ်းမိူင်းတႆးပတ်းပိုၼ်ႉ မီး (17,621) ၵေႃႉ သေ ၼႂ်းၼၼ်ႉ ဢၼ်လႆႈပႃးလၢဝ်ၸွင်ႈသမ်ႉ တီႈမိူင်းတႆးပွတ်းႁွင်ႇ မီး (1,015) ၵေႃႉ၊ တီႈမိူင်းတႆးပွတ်းၸၢၼ်း မီး (1,833) ၵေႃႉ၊ တီႈမိူင်းတႆးပွတ်းဢွၵ်ႇ သမ်ႉ မီး (128) ၵေႃႉ ႁူမ်ႈလုၵ်ႈႁဵၼ်းဢၼ်လႆႈလၢဝ်ၸွင်ႈ ၼႂ်းမိူင်းတႆး မီး (2,976) ၵေႃႉ ၼႆယဝ်ႉ။

ၸၢႆးသႅင်ဢေၾႃႉ ၵေႃႉပဵၼ်လုၵ်ႈၸၢႆး ၸၢႆးသႅင်ၸွမ်ၾႃႉ ၽူႈႁွင်ႉၵႂၢမ်းတႆးၸိုဝ်ႈသဵင်ယႂ်ႇၵေႃႈ ဢွင်ႇပူၼ်ႉၸၼ်ႉသိပ်း ပီႊ 2020 သေ လႆႈပႃးလၢဝ်ၸွင်ႈႁႃႈလုၵ်ႈ မိူၼ်ၵၼ်။

တီႈၼႂ်းမိူင်းႁူမ်ႈတုမ်ၼႆႉ လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈၸၼ်ႉသိပ်း ပီႊ 2020 ႁူမ်ႈတင်းသဵင်ႈ မီး (910,229) ၵေႃႉ သေ ၼႂ်းၼၼ်ႉ ဢၼ်ဢွင်ႇပူၼ်ႉ မီး (291,798) ၵေႃႉ၊ ဢၼ်တူၵ်းသုမ်းသမ်ႉ မီး (618,431) ၵေႃႉ လႄႈ လုၵ်ႈႁဵၼ်းဢၼ်ဢွင်ႇ ပူၼ်ႉၸၼ်ႉသိပ်း ႁူမ်ႈတင်းမိူင်းႁူမ်ႈတုမ် မီးႁူဝ်ပၢၵ်ႇ (32.06) (32.06%) ၵူၺ်း ၼႆယဝ်ႉ။

တႆးလွတ်ႈလႅဝ်း